On tlajtlamach* tlen onotekitiltij ipan on ueyitiopan
4
Salomón, no okichijchiu sen tlaixpan* de bronce yejuan kipiyaya chiknaui metro ika ueyak niman chiknaui metro ika patlauak, niman ika uejkapan kipiyaya naui metro uan tlajko. 2 No okichijchiu sen ueyi pila de bronce para ipan atekayaj. On ueyi pila yeualtik katka niman kipiyaya naui metro uan tlajko ika tenkoyauak. No, kipiyaya ome metro ipan 25 centimetros ika uejkapan niman majtlaktli uan yeyi metro ika tenyeualtik. 3 Tlatsintlan iyeualkan on ueyi pila, okitlalilijkej ome tlatekpantli de ixneskayouan uakaxtin, niman okitlalilijkej majtlaktli cada tlajko metro. Nochi in, san se ueyi tlachijchijtli katka iuan on ueyi pila. 4 Niman on ueyi pila onkatka ipan majtlaktli uan ome uakax tlachijchijtli de bronce. Yeyi uakax ontlachixtikatka kampaka norte, yeyi kampaka sur, yeyi kampaka ikisayan tonaltsintli niman yeyi kampaka ikalakiyan tonaltsintli. Ijkon tej, on uakaxtin notsijtsinnamiktikatkaj, niman on ueyi pila tlapani onkatka imimpan on uakaxtin. 5 On ueyi pila kipiyaya chikueyi centímetro ika tilauak, itempan tlajtlachaya ken sen lirioxochitl yejuan kemach yepontikaj, niman ijktik kalakiya 66 mil litros atl.6 Salomón, no okichijchiu majtlaktli pilitas de bronce. Makuijli okintlalij iyekmakopa on ueyi pila, niman on okseki makuijli okintlalij iopochmakopa. On atl yejuan ompa kitekayaj, ika kipajpakayaj nochi on tlen kitekitiltiayaj ijkuak kitlaliayaj on uentli yejuan nochi tlatla. Pero on atl de on ueyi pila katka para nopajpakayaj on tiopixkej.
7 No, okichijchiu majtlaktli lámpara de oro ken Dios otlanauatijka ma kichijchiuakan, niman okintlalij ipan on ueyitiopan. Makuijli okintlalij tlayekmakopa, niman on okse makuijli okintlalij tlaopochmakopa. 8 No ijki, Salomón okichijchiu majtlaktli mesa, niman no okintlalij ipan on ueyitiopan. Makuijli okintlalij tlayekmakopa, niman on okse makuijli okintlalij tlaopochmakopa. Niman no okinchijchiu 100 tazas de oro yejuan uejueyimej.
9 Salomón, no okichijchiu iminkiauak on tiopixkej niman on ueyikiauak. Okintlalilij itsakuijlouan niman okinalauilij bronce. 10 On ueyi pila okitlalij iyekmakopa on ueyitiopan kampaka ikisayan tonaltsintli.
11 No ijki, Hiram okinchijchiu on teposkontin, on teposxopiltin niman on teposuajkaltin, niman ijki otlan kichiua on tekitl yejuan Salomón okinauatij ma kichiua ipan iueyitiopan Dios. 12 Ipan on tekitl okichijchiu on ome pilar, on kuatlajmachyomej yeualtikej yejuan okintlalij inkuapan on pilares niman on ome tsatsastli yejuan okintlalij ipan on kuatlajmachyomej. 13 No, okinchijchiu 400 ixneskayouan granadas yejuan ika okitlajmachyotij on ome tsatsastli. Cada tsatsastli okitlalilij ome tlatekpantli granadas, niman on tsatsastin okintlalij ipan on kuatlajmachyomej yeualtikej yejuan okintlalij inkuapan on pilares. 14 No ijki, okinchijchiu on majtlaktli carretas niman on majtlaktli pilitas yejuan okintlalijkej impan on carretas. 15 No okichijchiu on ueyi pila kampa kitekayaj atl, iuan on itsinkax de ixneskayouan on majtlaktli uan ome uakaxtin. 16 Niman no okinchijchiu on teposkontin, on palas niman on teposchijkoltin.
Nochi on tlajtlamach* yejuan Hiram, on tlamachijchijketl, okichijchiuilij on rey Salomón para iueyitiopan toTEKO katka de bronce yejuan petlanki. 17 On rey otlanauatij ma kimpâtlakan ipan moldes de tlalajmojli, ipan on ixtlauatl de on río Jordán, itsajlan Sucot niman Saretán. 18 Salomón okichijchiu sanoyej miyek tlajtlamach* para on ueyitiopan, hasta nion xokimat keski kilo okitekitiltijkej on bronce.
19 Salomón, no otlanauatij ma kinchijchiuakan on okseki tlajtlamach* para okintlalijkej ipan iueyitiopan Dios: On tlaixpan* de oro, on mesas kampa kitlaliayaj on pan yejuan kiteititia ika toTEKO touan nemi, 20 on lámparas iuan intlauiltsitsiuan yejuan tlachijchijtin ikan oro yejuan más kuajli, yejuan okintlalijkej ixpan on kalijtik kampa itoka "Más Tlayekkan" ken toTEKO yotlanauatijka. 21 No okinchijchijkej on tlajmachyomej de xochimej ipan on lámaras, on intlauiltsitsiuan niman on itepostlakitskil. Nochi in, tlachijchijtin katkaj ikan oro yejuan más kuajli. 22 No, okinchijchijkej on tepostlakitskiltin para ika kinseuiyayaj intliyo on lámparas, on teposkontsitsimej, on teposuajkaltin niman on popochkontsitsimej. Nochi in, no tlachijchijtin katkaj ikan oro yejuan más kuajli. No ijki, okalauilijkej oro ikalakiyan on ueyitiopan, on itsakuijlouan yejuan okintlalijkej tlaijtik, on itsakuijlouan on kalijtik kampa Más Tlayekkan niman itsakuijlouan on ueyitiopan.