5
Niman ijkuak otlan kichiuaj nochi on tekitl yejuan Salomón otlanauatij ma kichiuakan ipan iueyitiopan toTEKO, Salomón ompa okiktik nochi on tlajtlamach* de oro niman de plata yejuan David, itataj, okimaktilijka toTEKO, niman okintlalij ipan iueyitiopan Dios kampa kimeuaj nochi on tlajtlamach* tlen patioj.Iyekcaja toTEKO okiktikej ipan on ueyitiopan
(1R 8.1-11)
2 Kemaj Salomón okinsentlalij ne Jerusalén on uejueyitlayekankej de Israel. Yejua okinsentlalij nochimej on tlayekankej de on tribus niman on tlayekankej ipan on familias israelitas, para kiktiskej on yekcaja yejuan kipiya ipacto* toTEKO, desde Sión, yejuan no itoka Iueyikalpan David, hasta ipan on ueyitiopan. 3 Niman ipan on tonajli ijkuak nochiuaya on ueyi iluitl de kalmatsitsimej, ipan on ika chikome metstli de on xipan, on israelitas nochimej onosentlalijkej iuan on rey Salomón. 4 Ijkuak nochimej on uejueyitlayekankej de Israel ompa nemiyaj, on levitas okixtikej on yekcaja, 5 niman iuan okiktikej on tabernáculo* kampa nonamikiyaj iuan Dios, iuan on tlajtlamach* tlatiochijtin yejuan ompa notekitiltiayaj. Nochi in, okiktikej on tiopixkej niman on levitas hasta on ueyitiopan. 6 On rey Salomón niman nochimej on israelitas yejuan onosentlalijkej iuan, nemiyaj ixpan on yekcaja, niman okiuentlalijkej sanoyej miyek borregos niman uakaxtin, hasta xouel okimpojkej. 7 Kemaj on tiopixkej okiktikej on yekcaja yejuan kipiya ipacto* toTEKO ne ijtik on ueyitiopan ipan on kalijtik kampa Más Tlayekkan, niman okitalijkej tlatsintlan de inmastlakapaluan on querubines*. 8 On querubines mastlakapalpajpatlajtikatkaj niman kajkaltijtikatkaj iyekcaja toTEKO iuan on tlapalokojtin yejuan ika kechpanojtiayaj. 9 On tlapalokojtin sanoyej ueueyakejkatkaj. Iminkuayak onestikatka hasta on kalijtik kampa Tlayekkan, yejuan onkatka ixpan on kampa Más Tlayekkan, pero xonestikatka hasta ikiauak on ueyitiopan. Niman ijki onokej hasta aman. 10 Ipan on yekcaja san onkatka on ome tepatlachtli yejuan Moisés ompa okintlalijka ijkuak nemiyaj ne ipan on tepetl Horeba. Ipan on tepatlachtin, Dios okijkuiloj on pacto* yejuan okichiu iminuan on israelitas ijkuak okiskej Egipto.
11 Kemaj on tiopixkej okiskej de on kalijtik kampa Más Tlayekkan. Niman nochimej on tiopixkej yejuan ompa nemiyaj onochipajkej ixpan toTEKO, on tiopixkej yejuan tekitij ipan on tonajli niman no on yejuan xtekitij ipan on tonajli. 12 Nochimej on levitas yejuan nokuikatiayaj (Asaf, Hemán niman Jedutún, iminuan inkoneuan niman oksekimej yejuan ken kintayaj,) ijkatikatkaj kampaka ikisayan tonaltsintli de on tlaixpan*, ikan imintlaken de lino. Ompa kimpiyayaj on imintlatsotsonaluan platillos, salterios niman arpas. Niman ompa iminuan nemiyaj 120 tiopixkej yejuan kimpitsayaj tlapitsaltin
13 Kemaj nochimej san seknek opeu kimpitsaj on tlapitsaltin niman nokuikatiaj para kimauistiliayaj toTEKO niman kimakayaj tlaxtlauijli. Chika nokuikatiayaj, kimpitsayaj tlapitsaltin, platillos niman oksekimej tlatsotsonaltin, niman ijkin nokuikatiayaj: “Xkuikatlalikan toTEKO, pampa yejua sanoyej kuajli iyojlo, pampa itetlajsojtlalis* xkaman tlami.” Kemaj ipan on momento, on iueyitiopan toTEKO oten ikan sen moxtli. 14 Niman pampa on moxtli okitemiltij on ueyitiopan, on tiopixkej okajkajkej ika kimauistiliayaj toTEKO pampa iueyilis toTEKO okitemiltij on ueyitiopan.