Salomón okiyaxkatij* toTEKO on ueyitiopan
(1R 8.12-66)
6
Kemaj Salomón opeu kichiua oración niman ijkin okijtoj:“NoTEKO, tejua otikijtoj ika tichanti ipan on tilauak moxtli.
2 Pero aman, nejua yonimitschijchiuilij sen ueyitiopan
para nochipa ompa tichantis.”
3 Kemaj on rey ouajnomalakachoj para okinualixnamik nochimej on israelitas yejuan ijkatikatkaj, niman okintiochiu. 4 Okijtoj: “Ma tikyekteneuakan toTEKO, Dios de Israel, yejuan yokichiu on tlen okiprometerouilij David, notataj, ijkuak ijkin okijlij: 5 ‘Desde on tonajli ijkuak nokoneuan onikinkixtij Egipto, nejua xkaman niktlapejpeniaya sen ueyikalpan intech nochimej itribus Israel para ompa kichijchiuaskej sen ueyitiopan kampa nechyekteneuaskej, nion xkaman niktlapejpeniaya sen tlakatl yejuan kinyekanas on nokoneuan israelitas. 6 Pero aman, yoniktlapejpenij on ueyikalpan Jerusalén para ompa nechyekteneuaskej, niman no yonimitstlapejpenij tejua David para xkinyekana on notlapejpeniluan israelitas.’ 7 Niman David, notataj, sanoyej kinekiya kichijchiuas sen ueyitiopan para ompa kimauistiliskej toTEKO, Dios de Israel. 8 Pero toTEKO okijlij: ‘Kuajli ika tikneki ipan moyojli para tinechchijchiuilis sen ueyitiopan kampa nechyekteneuaskej, 9 pero xtejua yes yejuan tikchijchiuas, yej kichijchiuas sen mokoneu. Yejua yes yejuan nechchijchiuilis on ueyitiopan.’
10 “Aman tej, toTEKO yokichiu on tlen okiprometeroj. Aman nejua yonikalak rey para onikpatlak David, notataj, niman yoninotlalij ipan itrono Israel. Niman yonikchijchiu iueyitiopan toTEKO, Dios de Israel. 11 Niman no, ompa yoniktlalij on yekcaja kampa onkaj on pacto* yejuan toTEKO okichiu iminuan on israelitas.”
12 Kemaj Salomón oyaj itech itlaixpan* toTEKO, inmixpan nochimej on israelitas niman okintelkets imauan. 13 (Salomón okichijchiu niman okitlalij itlajkotian on tiopankiauak sen tlajtlapechtli de bronce yejuan kipiyaya ome metro ipan 25 centimetros ika ueyak niman ome metro ipan 25 centímetros ika patlauak, niman kipiyaya se metro ipan 35 centimetros ika tlakpak. Yejua onotekets ipan on tlajtlapechtli, niman kemaj ipan onotlakuantelkets inmixpan nochimej on israelitas, niman okintlejkoltij imauan ipan cielo, 14 niman ijkin okijtoj: “ToTEKO, Dios de Israel, nion ipan cielo nion ipan in tlaltikpaktli xnemi sen Dios ken tejua, yejuan tikchiua tlen tikprometeroua, niman tikintitia motetlajsotlalis on yejuan mitstekipanouaj ikan nochi iminyojlo. 15 Tejua yotikchiu on tlen otikprometerouilij David, notataj. Ipan in tonajli yonochiu on tlen otikprometeroj tikchiuas. 16 Yejua ika tej, toTEKO, Dios de Israel, no xchiua on tlen otikprometerouilij motekitkau David, notataj. Otikprometerouilij ika tla ikoneuan kuajli nouikaj niman kintlakamatij motlanauatiluan, ijkon ken yejua okintlakamat, nochipa nemis sen iuejkakoneu* yejuan notlalis ipan itrono Israel. 17 Ijkon tej, toTEKO, Dios de Israel, xchiua para ma nochiua on tlen otikprometerouilij motekitkau David.
18 “Pero noDios, ¿manin melauak uelis tichantis ipan in tlaltikpaktli iminuan in tlaltipaktlakamej? Tla nion ipan on cielo xtonaki maski sanoyej ueyi, tla ijkon, más xtonakis ipan in ueyitiopan yejuan yonimitschijchiuilij! 19 Pero tejua noTEKO Dios, xkaki tlinon nimitsiknotlajtlanilia nejua nimotekitkau. Xkaki nochijkajkatlajtlanilis niman nooración yejuan ika nimitsnotsa nejua nimotekitkau. 20 Ipan tonajli niman ipan yeuajli nochipa xmanaui in ueyitiopan kampa tejua yotikijtoj tinemis. Xkaki in oración yejuan ika nimitsnotsa nejua nimotekitkau ijkuak niuajtlacha nanika imelajkan in moueyitiopan. 21 Xkaki noueyikatsajtsilis niman iminueyikatsajtsilis motlapejpeniluan ijkuak tejuamej tikchiuaj oración, niman tiuajtlachaj nanika imelajkan in moueyitiopan. Xtechkaki ne iluikak kampa tichanti, niman xtechtlapojpolui.
22 "Ijkuak yakaj itlaj kitechiuilis tlen xkuajli, niman nikan ipan in moueyitiopan itech in motlaixpan* kichiualtiaj manoyolkuiti tla okichiu noso ka, 23 tejua xkaki desde ne iluikak niman xcastigaro tla kipiya tlajtlakojli. Xchiua tlen melajki intech motekitkauan. Xmaka tlen kitocaroua kiselis on yejuan kipiya tlajtlakojli niman xchiua para ipan ma uetsi on castigo ipampa ixompayejyeualis. Niman no, xchiua tlen melajki ken kitocaroua ipampa on yejuan xkipiya tlajtlakojli.
24 "Tla kamanian imintlauelikniuan in motlapejpeniluan, kintlanij in motlapejpenil israelitas pampa otlajtlakojkej mixpan, niman kinuikaj ipan okse país, pero tla kemaj yejuamej nokuepaj motech niman mitsyekteneuaj, niman ipan in moueyitiopan mitsiknotlajtlaniliaj para xkinkaki ipan iminoraciones, 25 tejua xkinkaki desde ne iluikak, xkintlapojpolui imintlajtlakoluan, niman oksejpa xkinuajuika ipan in país yejuan otikinmakak yejuamej niman iminuejkatajuan.
26 “Tla kamanian otlauajuak niman xok okiau pampa motlapejpeniluan otlajtlakojkej mixpan, pero tla ijkuak kichiuaj oración uajtlachaj nanika imelajkan in moueyitipan, niman mitsyekteneuaj, niman noyolkokouaj pampa otlajtlakojkej niman pampa tikincastigaroua, 27 tejua xkinkaki desde ne iluikak, niman xkintlapojpolui imintlajtlakoluan motekitkauan, in motlapejpeniluan israelitas, niman xkintiti on kuajli ojtli para yejua ma kitokakan. Kemaj tejua xkinuajtitlanili kiautli ipan in tlajli yejuan otikinmakak motlapejpeniluan ken herencia.
28 “Tla kamanian oyejkok mayantli ipan in país, noso sen temojtij kokolistli, noso tlauajuaki pampa sanoyej tona, noso uajlau chauistli de chapolimej niman kuilimej yejuan kikuaj xojtli, noso totlaueliniuan kinyejyeualouaj touejueyikalpanuan niman techuijsokij, noso uajlau okseki tlajtlamach* tlen temojtij, 29 tla ijkon, xkaki nochi on oraciones. Nochi oración niman chikajkatlajtlanilistli yejuan san akinon kichiuas noso nochimej on motlapejpeniluan israelitas, san akinon yejuan kimatis ikokolis niman inekokol ipan iyojlo, tla nanika kinuajtelketsas imauan, imelajkan in moueyitiopan, 30 xkaki desde ne ipan iluikak desde ne kampa tichanti. Xkintlapojpolui niman xmaka cada se ken yejua onouikak ipan inemilis, pampa tikinta ipan inyojlo. San tejua tikixmati inyojlo nochimej in tekoneuan intech in tlaltikpaktlakamej. 31 Ijki, mitstlakaitaskej niman mitstlakamatiskej chika nemij ipan in tlajli yejuan otikinmakak toachtojtajuan.
32 “Niman tla se yejuan xchanej, yejuan xisraelita, ualeua uejka pampa kaki ika sanoyej tiueyixtika niman ika tikpiya ueyipoder, ijkuak kichiua oración niman uajtlacha nanika imelajkan in moueyitiopan, 33 tejua xkaki desde ne iluikak kampa tinemi, niman xmaka nochi tlen mitstlajtlanilis, para ijki, nochimej on naciones ipan in tlaltikpaktli ma mitsixmatikan, niman ma mitstlakaitakan ken in motlapejpeniluan israelitas mitstlakaitaj, niman para ma kimatikan ika mitsmauistiliaj ipan in ueyitiopan yejuan nejua yonimitschijchiuilij.
34 “Ijkuak motlapejpeniluan yaskej kominuijsokiskej imintlauelikniuan, san kanon kampa tejua tikintitlanis, niman tla yejuamej kichiuaj oración niman uajtlachaj nanika imelajkan in ueyikalpan yejuan tejua otiktlapejpenij, kampa onkaj in ueyitiopan yejuan nejua yonimitschijchiuilij, 35 tejua xkaki iminoraciones niman iminiknotlajtlanilis desde ne iluikak, niman xkinmanaui.
36 “Niman ijkuak tlajtlakoskej mixpan, (pampa xnemi yejuan xtlajtlakoua), niman tejua sanoyej tikualanis iminuan niman tikintemaktilis intech intlauelikniuan para ma kinuikakan ipan okse país, nisiu noso uejka, 37 niman tla ipan on país kampa kinuikaj noyolkuepaj, noueyikatsajtsiliaj niman mitsijliaj ika sanoyej xkuajli tlen okichijkej, 38 niman nokuepaj motech ika nochi iminyojlo niman ika nochi iminalma ijkuak ompa nemiskej, niman kichiuaj oración niman uajtlachaj imelajkan in tlajli yejuan otikinmakak iminachtojtajuan, kampa onkaj in ueyikalpan yejuan otiktlapejpenij niman kampa onkaj in ueyitiopan yejuan yonimitschijchiuilij, 39 tejua xkaki iminoraciones niman iminiknotlajtlanilis desde ne iluikak kampa tinemi, niman xkinmanaui, niman xkintlapojpolui intlajtlakoluan yejuan kichiuaskej mixpan.
40 Aman tej noDios, xkita niman xkaki on iminoraciones yejuan kichiuaj ipan in ueyitiopan.
41 Xuajla tej noTEKO Dios, nikan kampa timoseuis tejua
niman moyekcaja yejuan kipiya mopoder.
NoTEKO Dios, motiopixkauan ma kipiyakan momakixtilis.
Niman ma pakanemikan on yejuan mitsneltokaj
pampa xitlaj kinpolouaj.
42 Xnechseli noTEKO Dios,
nejua yejuan yotinechtlapejpenij
niman yotinechtlalij rey.
Xkelnamiki motetlajsojtlalis*
yejuan otikmakak David, motekitkau.”