7
Ijkuak Salomón otlan kichiua in oración, oualeu tlitl de ipan on iluikak, niman okitlatij on uentli yejuan nochi tlatla niman on oksekimej uentin. Niman iueyilis toTEKO okitemiltij on ueyitiopan. 2 Yejua ika tej, on tiopixkej xouelkej okalakkej ipan on ueyitiopan pampa iueyilis toTEKO okitemiltij on ueyitiopan. 3 Ijkuak nochimej on israelitas okitakej uajtemouaya on tlitl ipan on ueyitiopan niman iueyilis toTEKO, onotlakuantelketskej niman onopachojkej hasta ipan tlajli, niman okimauistilijkej toTEKO niman okimakakej tlaxtlauijli. Ijkin kijtouayaj: “ToTEKO sanoyej kuajli iyojlo niman itetlajsojtlalis* xkaman tlami.”4 Kemaj, on rey niman nochimej on israelitas okinuentlalilijkej yolkej toTEKO. 5 On rey Salomón okitemakak 22 mil uakaxtin niman 120 mil borregos para okinuentlalijkej.
Ijki tej, on rey Salomón niman nochimej on israelitas, okiyaxkatijkej* Dios on ueyitiopan.
6 Chika nochimej on israelitas majmaniyaj, on tiopixkej nemiyaj ipan se lado kimpitsayaj tlapitsaltin, niman on levitas nemiyaj ipan okse lado tlatsotsonayaj ikan on tlatsotsonaltin yejuan rey David okinchijchika. Niman nokuikatiayaj ikan tlaxtlauilij itech toTEKO on kuikatl itoka "Itetlajsojtlalis ToTEKO Xkaman Tlami”.
7 No ijki, Salomón okiyaxkatij toTEKO on kiauak yejuan nokauaya ixpan on ueyitiopan, niman ompa okinuentlalij on uentin yejuan nochi tlatlaj niman inchajka on yolkej yejuan okinmiktijkej para uentli para yoltlalijli iuan toTEKO. Ijki okichiu, pampa ipan on tlaixpan* de bronce yejuan okichijchiu, xoonak on uentli yejuan nochi tlatla, nion inchajka on yolkej, nion on uentli de harina.
8 Ipan on tiempo Salomón niman nochimej on israelitas okichijkej on iluitl de on kalmatsitsimej chikomej tonajli. Sanoyej tojlamej katkaj pampa desde on ueyikalpan Hamat kampaka norte hasta on río de Egipto kampaka sur miyekkej oualajkej ipan on iluitl. 9 Uajmostla, onosentlalijkej para okimauistilijkej toTEKO, pampa chikome tonajli otlaluichijkej para okiyaxkatijkej* toTEKO on tlaixpan*, niman okse chikome tonajli okichijkej on iluitl de kalmatsitsimej. 10 Ipan on tonajli 23 de on ika chikome metstli, on rey Salomón ononauatij iminuan nochimej on israelitas, niman okintitlan iminchajchan. Okinmijlij ma uiyan iminyolika niman ikan paktli, pampa toTEKO okichiu sanoyej kuajli ipampa David, ipampa Salomón niman impampa on israelitas, itlapejpeniluan.
ToTEKO okichiu sen pacto* iuan Salomón
11 Ijkuak Salomón otlan kichijchiua iueyitiopan toTEKO niman yejua ipalacio, niman nochi kuajli okis ken okijtoj kinchijchiuas 12 sen tlayoua, toTEKO okinotitij Salomón niman okijlij: “Yonikak mooración, niman yoniktlapejpenij in ueyikalpan para nikan onyas noueyitiopan kampa nechuentlaliliskej yolkej yejuan kinmiktiskej. 13 Tla ijkon tej, tla kamanian xok onikuajtitlan kiautli para ma tlauajuaki, noso nikinuajtitlanis chapolimej para ma kitlamikan nochi tlen onkaj ipan campo, noso nikuajtitlanis sen temojtij kokolistli imimpan notlapejpeniluan, 14 niman tla on notlapejpeniluan israelitas noueyikatsajtsiliskej ikan notokatsin, nokneliskej, kichiuaskej oración niman nechtejtemoskej niman kajkauaskej nochi tlin xkuajli, nejua nikinkakis desde ne iluikak, niman nikintlapojpoluis imintlajtlakoluan niman nikchiuas para imintlal oksejpa yenkuiyas. 15 Desde aman, niman para nochipa nikitas on tlen nokoneuan kimpoloua, niman nikakis on oraciones yejuan nikan ipan in ueyitiopan kichiuaskej, 16 pampa nejua yoniktlapejpenij in ueyitiopan niman yoniktiochiu para nochipa nikan nechmauistiliskej. Nejua nochipa nikcuidarojtias in ueyitiopan niman nochipa nikpiyas ipan noyojlo.
17 "Niman tla tejua kuajli timouika nixpan, ken motataj David kuajli onouikak, tla tikchiua nochi tlen yonimitsnauatij niman tikintlakamati nochi noleyes niman notlanauatiluan, 18 nejua nimitspaleuis para xkaman poliuis akinon tlamandaros intech mokoneuan, ijkon ken onikijtoj ijkuak onikchiu pacto* iuan motataj David, ijkuak onikijlij ika nochipa nemis sen iuejkakoneu* yejuan tlamandaros ipan in tlajli Israel: 19 Pero tla nemejuamej nennechtlalkauiyaj niman xnenkitlakamatij noleyes niman notlanauatiluan yejuan yonemechmakak, niman yej nenkintekipanouaj niman nenkinmauistiliaj oksekimej dioses, 20 nejua nemechkixtis ipan in tlajli yejuan yonemechmakak, niman niktlalkauis in ueyitiopan yejuan yoniktiochiu para ipan ma nechmauistilikan. Nikchiuas para nochimej on naciones nemoka ma uetskakan. 21 Niman in ueyitiopan yejuan aman sanoyej ueyixtikaj, xoxotonis, niman nochimej yejuan panoskej itechika, kimojkaitaskej niman ijkin notlajtoltiskej: '¿Hasta tline* iminTEKO ijkin okichiuilij in país niman in ueyitiopan?' 22 Niman ijkin kiminnankiliskej: 'Ijkin imimpan onochiu pampa okitlalkauijkej iminTEKO, on Dios yejuan okinkixtij iminuejkatajuan ipan on tlajli Egipto, niman no pampa okintekipanojkej niman okinmauistilijkej oksekimej dioses. Yejua ika tej, iminTEKO okinuajtitlanilij nochi in tlen xkuajli.' "