Okseki tlajtlamach* tlen okichijchiu Salomón
8
Ijkuak yopanok 20 xipan ika Salomón okichijchiu iueyitiopan toTEKO niman yejua ipalacio, 2 Salomón oksejpa okinchijchiu on uejueyikalpanmej yejuan Hiram okinmakaka, niman okintitlan sekimej israelitas para ompa okinchantij.3 Sakin, Salomón oyaj okuijsokito on ueyikalpan Hamat yejuan onkaj ipan iueyitlalpan Sobá, niman okinoyaxkatij*. 4 No ijki, oksejpa okichijchiu on ueyikalpan Tadmor ipan on xalpatlajkan. Niman nisiu on ueyikalpan Hamat, okinchijchiu oksekimej uejueyikalpanmej kampa keuaya tlakuajli niman okseki tlajtlamach. 5 No, oksejpa okinchijchiu on uejueyikalpanmej yejuan imintoka Bet-horón, yejuan se nokaua tlakpakopa, niman okse nokaua tlatsintlankopa. In uejueyikalpanmej okinyeualtsaku ikan tepantli. Okintlalilij tsakuijlomej niman ikan barras de tepostli. 6 Niman no, oksejpa okichijchiu on ueyikalpan itoka Baalat niman oksekimej uejueyikalpanmej kampa keuaya tlakuajli niman okseki tlajtlamach. No, okinchijchiu on uejueyikalpanmej kampa kimeuaya carretas de guerra niman kampa kimpiyayaj caballos. Salomón okichijchiu nochi tlen okinek ne Jerusalén, ne Líbano niman nochiuiyan kampa yejua tlamandarouaya. 7-8 Niman on yejuan xisraelitas katkaj, yejuan iminuejkakoneuan on hititas, amorreos, heveos, ferezeos niman jebuseos, yejuan onokajkej ipan on país Israel niman on israelitas xokinmiktijkej, Salomón okintekitiltij ipan on chikajkatekitl, niman hasta aman ijki kintekitiltiaj. 9 Pero on yejuan israelitas nion se xokitekitiltij ken esclavo ipan itekiu. Yej okintlalij para soldados, para tlapaleuijkej, para soldadostlayekankej niman para soldados yejuan kinyekanaj carretas de guerra niman on yejuan yayaj ipan caballos. 10 Niman Salomón okintlalij 250 israelitas ken tlayekankej para tlayekanayaj ipan on chikajkatekitl.
11 Salomón oksekan okichantito isiuau, yejuan ichpoch katka irey Egipto. Okejkuanij de Iueyikalpan David, niman okuikak ipan on palacio yejuan okichijchiuilij. Ijki okichiu pampa okinemilij ika xkuajli para isiuau chantis ipan ipalacio David, rey de Israel, pampa nochiuiyan kampa okitlalijkaj iyekcaja toTEKO, tlayekkan katka.
12 Salomón kimakaya toTEKO uentli yejuan nochi tlatla, ipan on tlaixpan* yejuan okichijchiu para toTEKO itech ikalixpan on ueyitiopan. 13 Kimakaya ipan on tonaltin ijkuak kitocarouaya kimakas, ken tlanauatia on ley de Moisés. Kijtosneki, ipan on tonaltin sábados niman ipan on iluimej de yenkuik metstli. No ijki, kimakaya uentli ipan on iluimej yejuan kichiuaj yexpa ipan se xipan: ipan on iluitl de pan yejuan xkipiya tlaxokolilistli*, ipan on iluitl de Semanas, niman ipan on iluitl de Kalmatsitsimej.
14 No ijki, Salomón okitlalij kamanon nopatlatiaskej on tiopixkej ipan imintekiu, ijkon ken David, itataj, otlanauatij. Niman on levitas okintlalij para yejuamej kuikatlaliskej toTEKO niman para kimpaleuiskej on tiopixkej ipan imintekiu yejuan mojmostla kichiuaj. Niman no, okitlalij kamanon nopatlatiaskej on tsakuijlotlajpixkej ipan cada tsakuijlotl, pampa ijki otlanauatijka David, itekipanojkau Dios. 15 Ijkon tej, nochi okichijkej kenon rey David otlatlajtlalij, ken tekitiskej on tiopixkej niman on levitas niman ken tlacuidaroskej kampa keuaj nochi on tlen patioj. 16 Salomón kuajli otlan kichiua nochi on tekitl ipan on ueyitiopan yejuan nonekiya kichiuas, desde on tonajli ijkuak okitlalijkej ipeuyan on ueyitiopan, hasta ijkuak otlankej. On iueyitiopan toTEKO kuajli otlan kichijchiuaj.
17 Kemaj Salomón oyaj ipan on kalpamej Ezión-geber niman Elat, itenko on mar, ipan iueyitlalpan Edom. 18 Niman on rey Hiram, okintitlan itlapeliuikauan para ma kinkauilitij barcos Salomón. Itlapeliuikauan katkaj tlakamej yejuan sanoyej uelij kistinemij ipan mar. Nochimej yejuamej oyajkej iuan itlapeliuikauan Salomón, niman oajsikej ne kampa itoka Ofir. Niman ompa okuikej kanaj 15 mil kilos oro, para okiktilijkej on rey Salomón.