On reina de Sabá okitato Salomón
(1R 10.1-13)
9
On reina de Sabá okak ken sanoyej kiteneuayaj Salomón. Yejua ika, oyaj Jerusalén para okitlatlatato, ikan miyek tlajtlamach tlen ouijtikaj* para okitak tla melauak sanoyej tlamatki*. Niman ijkuak oajsik Jerusalén sanoyej tojlantitiaya. Kinuikaya camellos yejuan tlamamajtiayaj ikan ajuiyalistli, ikan miyek oro niman ikan temej yejuan kualtsitsimej. Ijkuak oajsik itech Salomón, okitlajtoltij nochi on tlen yokinemilijka kitlajtoltis, 2 niman Salomón nochi kuajli okinankilij. Xitlaj oonyak tlen xouel okinankilij. 3 Niman ijkuak on reina de Sabá okitak ken sanoyej tlamatki* Salomón, niman okitak on palacio yejuan okichijchiu, 4 on uelik tlakuajli ipan imesa, on kampa notlaliayaj itlapeliuikauan, on ken kualtsin nesiyaj itekichiuilijkauan niman ken notlakentiayaj, on ken notlakentiayaj on yejuan kitemakayaj vino, niman ken kiuentlaliaya Salomón on uentli yejuan nochi tlatla ipan iueyitiopan toTEKO, nochi on sanoyej okitlatlatchaltij. 5 Niman ijkin okijlij on rey: “On ken onikak mitsteuaj ipan nopaís, de nochi on tlen yotikchiu niman de motlamatkilis*, tlakaj melauak. 6 Nejua xueliya nikneltoka tlinon nechijliayaj, pero aman nikneltoka pampa oniuajlaj, niman yonikitak nochi ikan nejua nixtololojuan. Niman aman nikita ika nion tlajkotipan xonechijlijkej ken titlamatki*, pampa tlakaj sanoyej titlamatki* niman sanoyej tikpiya riquezas xsan ken onechtlajtlajtouilijkej. 7 ¡Sanoyej pakanemij mosiuauan niman motekitkauan yejuan nochipa kaktokej on tlajtlamach* yejuan tikijtoua ikan tlamatkilistli*! 8 ¡Ma tikyekteneuakan moTEKO Dios, pampa sanoyej omitspakaitak, niman omitstlalij ipan itrono para titlamandaros ken rey! ¡Yejua sanoyej kintlajsojtla on israelitas, niman kintitia ika nochipa kintlajsojtlas. Yejua ika, yomitstlalij rey imintech yejuamej para xkinyekana melajki niman ken kitocaroua!”9 Kemaj on reina okimakak on rey 3 mil 960 kilos de oro, niman sanoyej miyek ajuiyalistli niman temej yejuan kualtsitsimej. Ne Israel xkaman ijkon miyek kipiyayaj ajuiyalistli kenon reina de Sabá okitlayokolij on rey Salomón.
10 (No ijki, itekitkauan Hiram niman itekitkauan Salomón yejuan okuajkikej oro de Ofir, no okuajkikej on kojtli* itoka sándalo de ne Ofir. Niman no, okuajkikej temej yejuan kualtsitsimej. 11 Niman ika on kojtli* sándalo, on rey okinchijchiu escaleras ipan iueyitiopan toTEKO niman ipan ipalacio. Niman no okinchijchiu on tlatsotsonaltin arpas niman salterios para on yejuan tlatsotsonaj. Nochi in tlajtlamach* yejuan okichijchijkej ikan on kojtli* sándalo, xkaman kitayaj ipan on país Judá. 12 Niman on rey Salomón, okimakak on reina de Sabá nochi tlen yejua okinek niman okitlajtlanilij. Aparte, Salomón okimakak on reina más miyek tlajtlamach xken on reina okimamak. Sakin, on reina onokuep ipan ipaís iminuan on itekitkauan.
Iueyilis niman iriquezas Salomón
(1 R 10.14-29; 2 Cr 1.14-17)
13 On oro yejuan Salomón kiseliaya cada xipan ajsiya kanaj 22 mil kilos, 14 niman xteuan kipouayaj on impuestos yejuan kitlaxtlauayaj on tlasemankej niman on yejuan tlajtlanamakakej yejuan ualeuaj uejka. No ijki, nochimej on reyes de Arabia niman on gobernadores de on país kuajkuiliayaj Salomón oro niman plata. 15 On rey Salomón otlanauatij ma kinchijchiuakan 200 escudos* uejueyimej de oro yejuan tlatetsotsontli ikan martillo. Ipan cada escudo* okikuikej chikuasen kilo oro. 16 No otlanauatij ma kinchijchiuakan 300 escudos* yejuan pipitikej. Ipan cada se okikuikej más de yeyi kilo oro yejuan tlatetsotsontli ikan martillo. Niman on escudos* okintlalij ipan on palacio itoka “Ikojyoj Líbano". 17 No ijki, otlanauatij ma kichijchiuakan sen ueyi trono* de marfil, niman otlanauatij ma kalauilikan oro yejuan más kuajli. 18 On trono* kipiyaya chikuasen escalones, niman no kipiyaya kampa noseuiyayaj ikxiuan on rey yejuan iuan salijtikatka on trono. Nochi in tlachijchitli katka ikan oro. Inajnakastlan on kampa notlaliyayaj kipiyaya kampa nomaseuiyayaj, niman cada lado ijkaya ixnexkayo sen león. 19 Ipan on escalones no ijkayaj majtlaktli uan ome leones. Cada lado de on chikuasen escalones ijkaya ixnexkayo sen león. ¡In kenin xkaman kichijchiuayaj kampa oksekimej reyes tlamandaroua! 20 No ijki, icopas on rey nochi de oro katkaj. Niman nochi on yejuan ipan tlakuayaj ipan on palacio yejuan itoka “ikojyoj Líbano” no de oro yejuan más kuajli katka. Xitlaj onkatka yejuan de plata, pampa ijkuak Salomón yejua rey katka, on plata xueyi kijtosnekiya. 21 Ibarcos on rey Salomón yayaj ne Tarsis niman itekitkauan Hiram kinyekanayaj. Niman cada yeyi xipan kuajkiyaj oro, plata niman marfil. Niman no, kinuajuikayaj on yolkej monos niman pavo reales.
22 On rey Salomón kintlaniya nochimej on reyes ipan in tlaltikpaktli ikan iriquezas niman ikan itlamatkilis*. 23 Nochimej on reyes ipan in tlaltikpaktli kinekiyaj kitaskej Salomón niman kinekiyaj kakiskej on tlamatkilistli yejuan Dios okimakak. 24 Niman cada xipan nochimej yejuan uajlayaj kiktiliayaj itlaj para kitlayokoliayaj. Kiktiliayaj tlajtlamach* de plata niman de oro, capas, armastin, ajuiyalistli, caballos niman mulas.
Salomón okisemân carretas de guerra niman caballos
(1R 10.26-29; 2 Cr 1.14-17)
25 Salomón kipiyaya 4 mil kaltin kampa kinkalaktiaya icarretas de guerra niman icaballos yejuan kintilanaj on carretas. Niman no, kimpiyaya 12 mil caballos para isoldados yejtiuij. Niman kinmeuaya ipan on uejueyikalmej kampa kinmeuaya on carretas de guerra, niman oksekimej okinuikak ne Jerusalén kampa yejua nemiya. 26 Niman Salomón okinmandaroj nochimej on reyes yejuan nemiyaj desde on río Éufrates hasta ipan iminpaís on filisteos niman hasta itlamiyan Egipto. 27 On rey sanoyej okimiyekilij plata ne Jerusalén, ijkon ken miyej onkaj on temej. No okichiu para sanoyej ma onya cedrojkojtin, ijkon ken miyek onkaj on higueras ipan campo kampa ixtlauayoj. 28 Niman no, okinuauikakej caballos para Salomón de Egipto niman nochimej oksekimej países.
Omik Salomón
(1 R 11.41-43)
29 On okseki tlajtlamach* tlen okichiu Salomón desde ipeuyan hasta itlamiyan, tlajkuilolnestikaj ipan on amamoxtin yejuan ikin imintoka: Itenojnotsalis on tiotlajtojketl Natán, Itiotlajtol Ahías yejuan ualeua Silo, niman Itlatlachalis ken itemikpan on tiotlajtojketl Iddo, kampa kiteneua Jeroboam, ikoneu Nabat. 30 Salomón otlamandaroj ipan nochi Israel ken rey ne Jerusalén 40 xipan. 31 Niman ijkuak omik okitôkakej ipan iueyikalpan David, on itataj. Kemaj Roboam, ikoneu Salomón, kej yejua okalak rey.