Ipacto* Salomón iuan Hiram, on rey de Tiro
(1 R 5.1-18; 7.13-14)
2
Salomón okitlalij ipan iyojlo para kichijchiuas sen ueyitiopan kampa on tlakamej kimauistiliskej toTEKO, niman yejua ipalacio. 2 Para onochiu on tekitl okintlalij 70 mil tlakamej yejuan kisakaskej tetl niman 80 mil tlakamej yejuan kinximaskej temej ipan tepetl, niman no okintlalij 3 mil 600 tlakamej yejuan kinyekanayaj on tekitkej.3 Salomón otlatitlan para ijkin ma kijlitij Hiram, on rey de Tiro: “Xnechajtitlanili cedrojkojtin ijkon ken otikuajtitlanilij David, notataj, para okichijchiu ipalacio kampa chantiya. 4 Nejua nimitsmachistia ika noTEKO Dios nikchijchiuilis sen ueyitiopan para nikyaxkatis, para ixpan tiktlatiskej kopajli, niman para nochipa tikuentlaliliskej on pan tlatiochijtli yejuan kitlaliaj ipan on mesa. No ijki, tikmakaskej on uentli yejuan nochi tlatla, ijkuak kualkan niman ijkuak tiotlak. Niman tikmakaskej on uentli yejuan nochipa tikmakaj ipan on tonaltin sábados, ijkuak yenkuik metstli, niman ijkuak tikchiuaj on oksekimej iluimej yejuan nikan Israel nochipa tikchiuaj para tikueyiliaj toTEKO Dios ken yejua otechnauatij. 5 On ueyitiopan yejuan nikchijchiuas noneki ueyi yes, pampa toDios yejua más ueyixtikaj xken nochimej on oksekimej dioses. 6 Maski on melahuak xakaj uelis kichijchiuilis sen ueyitiopan kampa chantis, pampa nion ipan on cielo maski sanoyej ueyi, xonaki. Yejua ika, ¿kenijki niuelis nikchijchiuilis iueyitiopan maski san para tiktlatiskej kopajli para tikueyiliskej? 7 Xnechajtitlanili tej, sen tlakatl yejuan kuajli ueli kitekiti oro, plata, bronce niman tepostli, niman yejuan ueli kichijchiua on tela azul, chichiltik niman morado. Niman no ijki yejuan ueli kinxima temej para kintlajmachyotia para tekitis iminuan on tlamachijchijkej yejuan tekitij notech ne Judá niman Jerusalén yejuan itekitkauan katkaj David, notataj. 8 No xnechajtitlanili kojtin* de ne Líbano, kojtin* de cedro, ciprés niman sándalo, pampa nikmatstikaj ika motekitkauan sanoyej uelij kitekij kojtli* de ne Líbano. Notekitkauan kimpaleuiskej motekitkauan, 9 para ma nechtekilikan miyek kojtli, pampa on ueyitiopan yejuan nikchijchiuas noneki yes sanoyej ueyi niman kualtsin. 10 On motekitkauan yejuan kitekiskej on kojtli, nikinmakas 4 millón ipan 400 mil litros de trigo niman 4 millón ipan 400 mil litros de cebada. Niman no, nikinmakas 440 mil litros de vino niman 440 mil litros de aceite de olivo."
11 Kemaj Hiram, on rey de Tiro, okinankilij Salomón ika sen amatlajkuilojli niman ijkin okonijlij: “ToTEKO kintlajsojtla on israelitas, itlapejpeniluan, yejua ika yomitstlalij rey imintech.” 12 Niman no kijtouaya: “¡Ma tikyekteneuan moTEKO, iDios Israel, yejuan okichijchiu on cielo niman in tlaltikpaktli, pampa okimakak on rey David se ikoneu yejuan sanoyej tlamatki*, tlamachilisyej niman kuajli tlanemilia, yejuan kichijchiuilis iueyitiopan moTEKO niman kichijchiuas yejua ipalacio! 13 Nimitstitlanilia tej, sen tlakatl itoka Hiram, yejuan sanoyej tlamachilisyej niman sanoyej tlamach ueli kichijchiua. 14 Yejua ikoneu sen siuatl yejuan kisa ipan itribu* Dan, iuan sen tlakatl yejuan chanej* ne Tiro. Niman yejua sanoyej ueli kitekiti oro, plata, bronce, tepostli, tetl, niman kojtli. No ijki, ueli kichijchiua on tela morada, azul, chichiltik niman tela de lino. Niman no, ueli tlaxima para kimixneskayotia sesentlamantikej ixneskayomej, niman ueli kixneskayotia* san tlinon se kitlajtlanilia. Hiram tekitis iuan motekitkauan niman iuan itekitkauan katka noteko, motataj David. 15 Yejua ika tej, noteko, xkinuajtitlanili in motekitkauan, on trigo, on cebada, on aceite de olivo niman on vino yejuan yotikijtoj titechmakas, 16 niman tejuamej tiktekiskej nikan Líbano nochi on kojtli* yejuan tiknekis. Kemaj timitsiktiliskej ipan mar ikan kojtlapechtli hasta ne Jope. Niman de ompa, sa tejua tikiktis ne Jerusalén.”
17 Sakin, Salomón okichiu on tlapouajli de nochimej on yejuan xchanejkej, yejuan chantiyaj ne Israel. In tlapouajli okichiu, sakin* de on tlapouajli yejuan okichiu David, itataj. Niman on yejuan okimpou Salomón katkaj 153 mil 600 tlakamej. 18 De yejuamej, okintlalij 70 mil yejuan tlasasakaskej, 80 mil yejuan kinximaskej temej ipan tepetl, niman 3 mil 600 yejuan kinyekanaskej on tekitkej.