On yekcaja kiktij ipan on ueyitiopan
8
Kemaj ne Jerusalén, Salomón okintekuitlan on uejueyixtokej tlakamej intech on israelitas, nochimej on tlayekankej ipan on tribus, niman on ueuentsitsimej intech on familias israelitas. Okintekuitlan para kiktiskej on yekcaja, yejuan kipiya ipacto* toTEKO, desde Sión yejuan no itoka Iueyikalpan David, hasta ipan on ueyitiopan. 2 Niman ipan on tonajli ijkuak nochiua on ueyi iluitl de kalmatsitsimej , ipan on metstli Etanim, yejuan ika chikome metstli de on xipan, onosentlalijkej nochimej on israelitas iuan on rey Salomón. 3 Ijkuak nochimej yonosentlalijkej on uejueyixtokej tlakamej, on tiopixkej oketstejkej on yekcaja, 4 niman on tabernáculo iuan nochi on tlajtlamach* tlatiochijtin yejuan ompa onkatka, niman okiktikej hasta iueyitiopan. 5 On rey Salomón niman nochimej on israelitas onosentlalijkej ixpan on yekcaja, niman okinuentlalijkej borregos niman uakaxtin. On yolkej sanoyej miyekej katkaj hasta xakaj ueliya kimpouaya.6 Kemaj on tiopixkej okiktikej on yekcaja yejuan kipiyaya ipacto* toTEKO ne ijtik on ueyitiopan ipan on kalijtik kampa Más Tlayekkan, niman okitlalijkej tlatsintlan de inmastlakapaluan on querubines*. 7 On querubines kimpatlajtikatkaj inmastlakapaluan niman kajkaltijtikatkaj iyekcaja toTEKO iuan on tlapalokojtin yejuan ika kechpanojtiayaj. 8 On tlapalokojtin sanoyej ueueyakej katkaj, hasta onnestikatkaj iminkuayak ne kalijtik kampa Tlayekkan yejuan nokauaya ixpan on kalijtik kampa Más Tlayekkan. Pero on tlapalokojtin, xonnestikatkaj hasta kiauak. Hasta aman ompa onokej. 9 Ipan on yekcaja san onkatka on ome tepatlachtli kampa tlajkuilolnestikaj itlanauatiluan Dios yejuan Moisés ompa okitlalijka ne ipan on tepetl Horeb ijkuak toTEKO okichiu on pacto* iminuan on israelitas sakin* ijkuak yokiskaj ne Egipto.
10 Ijkuak on tiopixkej uajkistiayaj ijtik on ueyitiopan ne kampa tlayekkan, on moxtli okitemiltij on iueyitiopan toTEKO. 11 Niman pampa on moxtli okitemiltij on ueyitiopan, on tiopixkej xok ouel okalakkej oksejpa para okimauistilijkej itech toTEKO, pampa iueyilis toTEKO okitemiltij on ueyitiopan.
Salomón kiyaxkatia toTEKO on ueyitiopan yejuan okichijchiu
12 Kemaj Salomón ijkin onoueyikatsajtsilij:
“NoTEKO, tejua otikijtoj ika tichanti ipan on tilauak moxtli
yejuan kitlapachojtikaj on ueyitiopan.
13 Pero aman, nejua yotimitschijchiuilij moueyitiopan
para nochipa ipan tichantis."
14 Kemaj on rey onokuep para ontlachix intechika on israelitas, niman okintiochiu. 15 Ijkin okijtoj: “Ma tikyekteneuakan toTEKO, iDios Israel, pampa yokichiu on tlen okiprometerouilij David, notataj, ijkuak ijkin okijlij: 16 ‘Desde ipan on tonajli ijkuak onikinkixtij on notlapejpeniluan israelitas ne Egipto, nejua xoniktlapejpenij nion se ueyikalpan intech nochimej itribus Israel para ompa kichijchiuaskej sen ueyitiopan para ma kitlakaitakan noyektokayotsin. Pero oniktlapejpenij David para ma kinyekana on notlapejpenluan israelitas.’ 17 Niman David, notataj, kinekiya kichijchiuas sen ueyitiopan para toTEKO, iminDios on israelitas.’ 18 Pero toTEKO okijlij notajta David: ‘Kuajli tikchiua ika tikneki tinechchijchiuilis sen ueyitiopan. 19 Pero xtejua yes yejuan tikchijchiuas, yej mokoneu yejuan motech kisas, yejua nechchijchiuilis on ueyitiopan.'
20 “Aman tej, toTEKO yokichiu on tlen okiprometeroj. Ijki yonochiu ken okijtoj. Aman, yonikpatlak notataj David niman yoninotlalij ipan itrono Israel, niman yonikchijchiuilij iueyitiopan para kitlakaitaj itoka toTEKO, iminDios on israelitas. 21 Niman ipan on ueyitiopan yonikchijchiu on kampa Más Tlayekkan kampa onyas on yekcaja yejuan kipiya on pacto* yejuan toTEKO okichiu iminuan toachtojtajuan ijkuak okinkixtij Egipto."
Salomón noueyikatsajtsilia para kiyaxkatia* Dios on ueyitiopan
22 Kemaj Salomón onotelkets ixpan on itlaixpan* toTEKO, chika on israelitas nochimej kitstikatkaj, niman okintelkets imauan ipan cielo, 23 niman ijkin onoueyikatsajtsilij: “NoTEKO, iminDios on israelitas, nion ipan cielo nion ipan tlaltikpaktli xnemi sen Dios ken tejua. Tejua tikchiua tlen tikprometeroua ipan mopacto*, niman tikintitia motetlajsojtlalis* on yejuan mitstekipanouaj ikan nochi iminyojlo. 24 Tejua, yotikchiu on tlen otikprometerouilij motekitkau David, notataj. In tonajli yotikchiu on tlen otikprometeroj ika motlajtoltsin. 25 Yejua ika tej, noTEKO, iDios Israel, no xchiua on tlen otikprometerouilij notataj David, motekitkau. Otikijlij ika tla iuejkakoneuan kuajli nouikaj ijkon ken yejua okichiu, nochipa nemis semej de on iuejkakoneuan yejuan kinmandaros on israelitas. 26 Ijkon tej, tejua, iDios Israel xchiua para ma nochiua on tlen otikprometerouilij notataj David, motekitkau.
27 "¿Pero kenijki uelis tonakis ijtik in ueyitiopan yejuan yonimitschijchiuilij, tla xueli tonaki ipan on cielo yejuan sanoyej ueyi? 28 Pero maski ma ijki tej, noTEKO Dios, xkaki tlinon nimitsiknotlajtlanilia. Xkaki in oración yejuan ika aman nimotekitkau nimitsnotsa. 29 Ipan tonajli niman ipan yeuajli maka tikixkauas in ueyitiopan kampa nochipa mitsmauistiliskej. Xkaki in oración yejuan ika nimitsnotsa. kampa nochipa nechmauistiliskej. 30 Nimitstlajtlanilia xnechkaki nejua niman xkinkaki motlapejpeniluan israelitas ijkuak noueyikatsatsiliskej kampaka onkaj in moueyitiopan. Xtechajkaki desde ne iluikak kampa tinemi niman xtechtlapojpolui.
31 “Tla yakaj yejuan xkuajli kitechiuilia, kichiualtiaj ma notlajtolmaka ika motokatsin ixpan motlaixpan* ipan in ueyitiopan, 32 tla ijkon, tejua xkaki desde ne iluikak niman xchiua tlen melajki para motekitkauan. Xcastigaro on yejuan kipiya tlajtlakojli. Xchiua para ipan ma uetsi castigo ipampa on tlen xkuajli okichiu. Niman no xchiua tlen melajki itech on yejuan xkipiya tlajtlakojli.
33 “Tla intlauelikniuan motlapejpeniluan israelitas kintlanij pampa tlajtlakouaj, niman tla noyolpatlaj, nokuepaj motech niman noueyikatsajtsiliaj kampaka onkaj in moueyitiopan para mitstlajtlaniliskej tikintlapojpoluis, niman para mitsyekteneuaskej, 34 tla ijkon, tejua xkinkaki desde ne iluikak niman xkintlapojpolui intlajtlakol. Niman kemaj xkinkuepa ipan on tlajli yejuan otikinmakak inachtojtajuan.
35 “Tla xok kiaui niman tlauajuaki pampa motlapejpeniluan otlajtlakojkej motech, tla uajlauij niman noueyikatsajtsiliaj kampaka onkaj in moueyitiopan, niman mitsajyekteneuaj, niman noyolpatlaj pampa tikincastigaroua, 36 tla ijkon, tejua xkinkaki desde ne iluikak niman xkintlapojpolui motekitkauan, motlapejpeniluan israelitas. Niman no tejua xkintiti on ojtli yejuan noneki kitokaskej, niman xchiua para ma kiaui ipan in tlajli yejuan otikinmakak motlapejpeniluan ken herencia.
37 “Tla ipan in país yejko apistli, noso sen temojtij kokolistli, noso uakis nochi xojtli pampa sanoyej tonas, noso uajlas on chauitstli kuitlakochin, noso uajlas chauistli de chapolimej niman yokatsitsimej yejuan kikuaj on xojtli, noso totlauelikniuan kinyejyeualoskej toueyikalpanuan niman techuijsokiskej, noso uajlas okse kokolistli niman okseki tlajtlamach* tlen temojtij, 38 niman tla yakaj israelita, noso nochi motlapejpeniluan israelitas noueyikatsajtsiliaj motech niman ketsteuaj inmauan kampaka onkaj in moueyitiopan pampa sanoyej tlajyouiyaj niman noyolkokouaj, 39 tla ijkon, tejua xkinkaki inueyikatsajtsilis desde ne iluikak niman xkintlapojpolui. Niman cada se xcastigaro ken kitocaroua, pampa san tejua tikixmati iyojlo cada tlakatl. 40 Ijki tej, mokoneuan nochipa mitstlakaitaskej chika nemij ipan in tlajli yejuan otikinmakak toachtojtajuan.
41 "Niman tla se yejuan xisraelita, yejuan xteuan nopoua intech motlapejpeniluan, ualeuas uejka san pampa okak de moueyilis, 42 niman noueyikatsajtsilis kampaka onkaj in moueyitiopan (pampa sanoyej miyekan kakiskej ika tejua sanoyej tiueyixtikaj niman tikpiya ueyi poder), 43 tla ijkon, tejua xkaki desde ne iluikak kampa tinemi, niman xmaka nochi tlen mitstlajtlanilia. Ijki, nochimej on naciones mitsixmatiskej niman mitstlakaitaskej, ijkon ken motlapejpeniluan israelitas mitstlakaita. Niman ijkon kimatiskej ika nikan mitsyekteneuaj ipan in ueyitiopan yejuan onikchijchiu.
44 “Tla motlapejpeniluan israelitas yaskej ipan nouijsokilistli, san kanon kampa tejua tikintitlanis, niman tla yejuamej noueyikatsajtsiliaj niman uajtlachaj kampaka onkaj in ueyikalpan yejuan tejua otiktlapejpenij niman kampa onkaj in moueyitiopan yejuan nejua yotimitschijchiuilij, 45 tla ijkon, tejua xkinkaki desde ne iluikak kampa tinemi, niman xkinpaleui.
46 “No ijki, tla mokoneuan tlajtlakouaj (pampa xnemi nion sen tlakatl yejuan xtlajtlakoua), manin sanoyej mitskualaniskej niman tikintekauilis intech intlauelikniuan para ma kintlanikan niman ma kinuikakan ipan okse país yejuan onkaj nisiu noso uejka. 47 Tla ijkon nochiua, niman yejuamej noyolpejpenaj ne ipan on país, niman mitsyemankatlajtlaniliaj: 'Xtechtlapopouili pampa yotitlajtlakojkej niman sanoyej xkuajli tlen otikchijkej', 48 niman tla yejuamej ika nochi inyojlo niman ika nochi inalma nokuepaj motech, niman kichiuaj inoración uajtlachaj kampaka onkaj in tlajli yejuan otikinmakak inuejkatajuan, niman uajtlachaj nanika kampaka onkaj in ueyikalpan yejuan tejua otiktlapejpenij, niman kampaka onkaj in moueyitiopan yejuan nejua yotimitschijchiuilij, 49 tla ijkon, tejua xkaki iminueyikatsajtsilis desde ne iluikak kampa tinemi, niman tejua xkimpaleui. 50 Xkintlapojpolui motlapejpeniluan imintlajtlakoluan niman nochi iminxompayejyeualis yejuan okichijkej. Niman xchiua para intlauelikniuan yejuan okinuikakej ipan impaís, ma kinmiknelikan. 51 Ijkon xchiua pampa in israelitas moyaxkauan* yejuan, tejua otikinkixtij Egipto kampa sanoyej tlajyouiyaya, ken itlaj ijtik sen horno yejuan temojtij totonki.
52 "Xkaki tej, in motekitkau yejuan mitsnotlatlautia impampa motlapejpeniluan israelitas. Xtechkaki ijkuak timitsnotsaskej para titechpaleuis. 53 Xtechkaki pampa tejua toTEKO otikxeloj in país intech nochimej on oksekimej países ipan in tlaltikpaktli para otikmoyaxkatij ijkon ken otikijtoj itechkopa Moisés ijkuak otikinkixtij toachtojtajuan ne Egipto."
54 Salomón notlakuantelketstikatka ixpan on tlaixpan* ijkuak kichijtikatka oración, niman tlakpak kimpiyaya imauan. Niman ijkuak otlan kichiua oración kampa notlakuantelketztikatka ixpan on itlaixpan* toTEKO, 55 onotelkets, niman okitlajtlanilij Dios ma kintiochiua nochimej on israelitas. Niman ijkin okijtoj chikauak: 56 “¡Ma tikyekteneuakan toTEKO pampa yotechmakak yolseuilistli tiitlapejpeniluan israelitas, ijkon ken okiprometeroj! Yejua tej, nochi on tlen kuajli okiprometeroj itechkopa Moisés, itekitkau, nochi ye kichijtikaj.
57 “Niman aman, toTEKO Dios ma nemi touan ken onen iminuan toachtojtajuan. Maka kaman techtlalkauis nion maka techtlauelkauas, 58 yej ma kichiua para toyojlo ma tiktlalikan itech yejua, niman ijki, titouikaskej ken yejua kineki, niman ijki, tikintlakamatiskej itlanauatiluan niman ileyes yejuan okinmakak toachtojtajuan. 59 Nochi in yejuan yoniktlajtlanilij toTEKO Dios, niktlajtlanilia para maka kelkauas nion ipan tonajli nion ipan yeuajli para ma nochipa kichiua tlen melajki para nejua niitekitkau niman para on israelitas. 60 Ijkon nochimej on naciones de in tlaltikpaktli ma kimatikan ika toTEKO yejua Dios niman xnemi okse. 61 Yejua ika tej, nemejuamej nochipa xyolmelajkanemikan itech toTEKO Dios, niman xkintlakamatikan ileyes niman itlanauatiluan ken nenkichiuaj ipan in tonajli.”
Salomón okiyaxkatij Dios on ueyitiopan
62 Ijkuak on rey Salomón otlan tlajtoua, yejua, iuan nochimej on israelitas, okimakakej toTEKO miyek uentli. 63 Okiuentlalilij toTEKO 22 mil toros niman 120 mil borregos, ken uentin para yoltlalijli.
Ijkon onochiu ijkuak on rey niman nochimej on israelitas okiyaxkatijkej toTEKO on ueyitiopan. 64 Sano ipan on tonajli, on rey okiyaxkatij toTEKO ikiauak on ueyitiopan yejuan onkaj ixpan on ueyitiopan. Niman ompa ipan on ikiauak on ueyitiopan okiuentlalij on uentli yejuan nochi tlatla, on uentli de harina yejuan más kuajli niman inchajka on yolkej yejuan para uentli para yoltlalijli. Ompa okinuentlalij pampa ipan on tlaixpan* tlachijchijtli ikan bronce yejuan onkatka ixpan toTEKO, pitentsin katka, niman xonakiya nochi on uentli.
65 Niman ijkuak yoltlan kichiuaj on chikome tonajli de on iluitl para on tlaixpan*, Salomón niman nochimej on israelitas okichijkej okse chikome tonajli on iluitl de kalmatsitsimej para itlakaitalis toTEKO Dios. Kijtosneki otlaluichijkej majtlaktli uan naui tonajli. Sanoyej tojlamej katkaj pampa oualejkej de miyekan, desde Hamat hasta on ayajtok kampa tlami iueyitlalpan Egipto. 66 Uajmostla ononauatij iminuan on israelitas, niman yejuamej ueyi okitlajsojkamachilijkej on rey. Niman oyajkej iminchan, sanoyej opaktiajkej pampa toTEKO sanoyej kuajli tlen okichiu ipampa David, itekitkau, niman impampa on israelitas.