Dios kichiua sen pacto* iuan Salomón
9
Ijkuak on rey Salomón otlan kichijchiua iueyitiopan toTEKO niman ipalacio niman nochi on tlen okinek okichijchiu, 2 toTEKO ika okpa okinotitij Salomón, ijkon ken yokichijka ne Gabaón. 3 Niman okijlij: “Yonikak moueyikatsajtsilis niman tlinon yotinechtlajtlanilij ma nikchiua, niman yoniknoyaxkatij in ueyitiopan yejuan otikchijchiu kampa nochipa nechmauistiliskej. Nejua, nochipa nicuidaros niman xkaman nikauas. 4 Aman tej, tla tejua no kuajli timouikas notech ikan kuajli moyojlo niman chipauak ken okichiu motataj David, niman tla tikchiuas nochi tlen yonimitsnauatij, niman tikintlakamatis noleyes niman notlanauatiluan, 5 nejua nikchiuas ken onikprometerouilij motataj David, ijkuak onikijlij ika xkaman poliuis sen iuejkakoneu* yejuan tlamandaros ken rey intech on israelitas. 6 Pero tla tejua niman mouejkakoneuan nennechtlalkauiyaj, niman xnenkitlakamatij notlanauatiluan niman noleyes yejuan yonemechmakak, tla yej nenkintekipanouaj niman nenkinmauistiliaj on yejuan xmelauak dioses, 7 nejua nikominkixtis on israelitas ipan on tlajli yejuan yonikinmakak. Niman no, neka nikontlajkalis in ueyitiopan yejuan yoniknoyaxkatij, niman oniktlalij para nechtlakaitaj. Kemaj nochimej on naciones, sanoyej inka uetskaskej on israelitas. 8 De yejua in ueyitiopan, nochiuas sen olochojli de xoxotonilistli, niman nochimej yejuan panoskej itech kimojkaitaskej niman tlamach kijtoskej. Niman ijkin notlajtoltiskej: '¿Tline iminTEKO ijkin okichiuilij in país niman in ueyitiopan?' 9 Kemaj ijkin kiminnakiliskej: 'Ijkin onochiu pampa on israelitas okitlalkauijkej iminTEKO Dios, on Dios yejuan okinkixtij inuejkatajuan israelitas ne Egipto, niman pampa yej okintekipanojkej niman okinmauistilijkej oksekimej dioses. Yejua ika tej, okinuajtitlanilij nochi tlen xkuajli.' "Okseki tlajtlamach* yejuan Salomón okichiu
10 Ipan sempoajli xipan, Salomón otlan kichijchiua in ome uejueyimej kaltin, on iueyitiopan toTEKO niman ipalacio. 11 Para okinchijchiu, Hiram on rey de Tiro, sanoyej okipaleuij. Yejua okimakak kojtin* de cedro niman de pino. No ijki okimakak, nochi oro kech nonekiya para on kaltin. Niman rey Salomón ken sen tlajsojkamachilistli okimakak Hiram, sempoajli uejueyikalpanmej yejuan onkatkaj ipan iueyitlalpan Galilea. 12 Pero ijkuak Hiram oyaj okintato on uejueyikalpanmej yejuan okimakak Salomón, xokinuelitak, 13 niman okitlajtoltij: “Nokniu, ¿Tline kenin uejueyikalpanmej otinechinmakak?” Yejua ika, on región kampa onkatkaj on uejueyikalpanmej okitokayotij Cabula, niman hasta aman ijki itoka. 14 On oro yejuan Hiram okontitlanilij on rey Salomón, katka 3 mil 960 kilos.
15 Rey Salomón okinchiualtij otekitkej on tlakamej maski xokitlaxtlauilij, para okichijchijkej iueyitiopan toTEKO, ipalacio on rey, on tlalmantli niman on tepanchinantli yejuan ika okiyeualtsakukej Jerusalén. Niman no okinchiualtij para okuektlalikej on tepachinantli inyeualkan on uejueyikalpanmej Hazor, Meguido niman Gezer. 16 (On rey de Egipto, okinoyaxkatijka* on ueyikalpan Gezer, niman okinmiktij on cananeos yejuan ompa chantiyaj. Kemaj okitlatij on ueyikalpan. Sakin ijkuak ichpoch ononamiktij iuan Salomón okimakak on ueyikalpan ken tetlayokolijli*. 17 Niman kemaj, Salomón oksejpa okichijchiu on ueyikalpan Gezer.) Niman no okichijchiu on ueyikalpan Bet-horón, yejuan nokaua tlatsintlan. 18 No okichijchiu on ueyikalpan Baalat, niman on ueyikalpan Tamar yejuan nokaua ipan ixalpatlajkan Judá. 19 No ijki, oksejpa okinchijchiu nochimej on uejueyikalpanmej kampa keuaya tlakuajli, niman kampa kimeuayaj carretas de guerra niman on kampa kinkalaktiayaj caballos. Salomón okichijchiu nochi tlen okinek ne Jerusalén, ne Líbano niman ipan nochi ueyitlalpan kampa tlamandarouaya. 20-21 Ipan on país onokajkej inuejkakneuan on amorreos, on hititas, on fereseos, on heveos niman on jebuseos, pampa on israelitas xouel otlan kinmiktiaj ijkuak okinoyaxkatijkej on tlajli. Niman pampa yejuamej in xisraelitas katkaj, on rey Salomón okinchiualtij kichiuayaj on chikajkatekitl ken eslavos, niman hasta aman ijki kintekitiltiaj. 22 Pero on yejuan israelitas katkaj, nion se xokitekitiltij ken esclavo. Yej okintlalij para soldados, para tlapaleuijkej, para tlayekankej, para soldadostlayekankej, para tlayekankej intech soldados yejuan kistinemiyaj ipan carretas de guerra, niman para soldadostlayekankej intech on soldados yejuan kistinemiyaj ipan caballos. 23 Niman no nemiyaj 550 israelita tlakamej yejuan tlatekitiltiayaj. In tlakamej kinyekanayaj on tekitkej ipan nochi on tekitl yejuan kichiuayaj.
24 Ichpoch on rey de Egipto onejkuanij ne kampa kuitiaj Iueyikalpan David, para ochantito ipan on palacio yejuan Salomón okichijchiuilij. Kemaj Salomón okichijchiu on tlalmantli.
25 Yexpa ipan se xipan, Salomón kitemakaya uentin yejuan nochi tlatla niman kinmiktiaya yolkej para uentin de yoltlalijli. On uentin kintlatiaya ipan on tlaixpan* yejuan okichijchiu para toTEKO. Niman no kitlatiaya kopajli ixpan toTEKO. Ijkon otlan kichijchiuaj on ueyitiopan.
26 No ijki, on rey Salomón okinchijchiu barcos ne Ezión-geber, yejuan onkaj nisiu Elat, itenko on Mar Rojo ipan on ueyitlalpan Edom. 27 Niman Hiram okintitlan sequimej itekitkauan yejuan tekitij ipan barcos itech Salomón pampa yejuamej kimatiyaj kenijki kistinemiskej ipan mar. Okintitlan para okimpaleuijkej itekitkauan Salomón yejuan tekitij ipan barcos. 28 Oajsikej ne ipan on ueyitlalpan itoka Ofir, niman ipan on barcos okuajkikej kanaj 14 mil kilos de oro, niman okiktilijkej on rey Salomón.