On reina de Sabá okinotsato Salomón
10
On reina de on país Sabá, okak ken sanoyej kiteneuayaj Salomón para iueyilis toTEKO. Yejua ika oyaj Jerusalén para okitlatlatato Salomón. Niman tlamach okitlajtoltij yejuan ouijtikaj* para kitas tla melauak sanoyej tlamatki*. 2 Ijkuak oajsik ne Jerusalén, oajsik inuan miyekej on yejuan kicuidarouaj niman miyek camellos yejuan tlamamajtiayaj ikan miyek ajuiyalistli, miyek oro niman tetsitsimej yejuan kualtsitsimej. Ijkuak oajsik itech Salomón, okitlajtoltij nochi on tlen yokinemilijka kitlajtoltis, 3 niman Salomón nochi kuajli okinankilij. Nochi tetlajtoltilistli kuajli okinankilij. Nion se xokijneu. 4 Ijkuak on reina de Sabá okitak nochi itlamatkilis* niman on palacio yejuan okichijchiu, 5 on uelik tlakuajli ipan imesa, on kampa chantij on itlapaleuijkauan, on ken tetlamakayaj itekitkauan, on ken kualtetsin notlakentiayaj on yejuan kitemakayaj vino, niman kenijki kiuentlaliayaj on uentli yejuan nochi tlatla, ipan iueyitiopan toTEKO, yejua sanoyej okitlatlachaltij on tlen okitak.” 6 Niman ijkin okijlij on rey: "Nochi ken onikak mitsteneuaj ipan nopaís de nochi on tlen yotikchiu niman ika sanoyej titlamatki*, nikita melauak. 7 Xnikneltokaya nochi in tlajtlamach*, pero aman nikneltoka pampa oniuajlaj niman yonikitak nochi ika nixtololojuan. Nion tlajkotipan xoajsik on tlen onechtlajtlajtouilijkej, pampa motlamatkilis niman on moriquezas yejuan tikpiya sanoyej miyek, xsan on yejuan onechtlajtlajtouilijkej. 8 ¡Sanoyej ueyi paktli kiseliaj on mosiuauan niman motekitkauan, pampa yejuamej nochipa kaktokej on tlen tikijtoua ikan miyek tlamatkilistli! 9 ¡Ma kiseli miyek yekteneualistli moTEKO Dios pampa omitspakaitak niman omitstlalij para titlamandaroua ipan in país de Israel! ¡Pampa moTEKO sanoyej kitlajsojtla* Israel, tejua omitstlalij rey para tikchiuas on tlen melajki niman titeyolkuitis noso titetlajtlakolmakas ken kitocaroua!”10 Kemaj on reina okimakak on rey 3 mil 960 kilos de oro, niman miyek ajuiyalistli niman tetsitsimej yejuan kualtsitsimej. Xkaman ijkon miyek ajuiyalistli ajsiya ne Israel kenon reina de Sabá okitlayokolij on rey Salomón.
11 (No ijki on tlakamej ipan on uejueyibarcos de on rey Hiram, okuajkikej oro de ne Ofir, no on kojtli* itoka sándalo niman tetsitsimej yejuan kualtsitsimej. 12 Ika on kojtli* sándalo, on rey okichijchiu barandales para iueyitiopan toTEKO niman para ipalacio. Niman no okichijchiu arpas niman salterios para on tlatsotsonkej. Desde ijkuakon, hasta aman xkaman otikitakej ijkon miyek kojtli* de sándalo ipan Israel.)
13 Kemaj on rey Salomón okimakak on reina de Sabá san tlinon yejua okitlajtlanilij. Pero on rey Salomón no okimakak tlen yejua okinek okitlayokolij. Kemaj on reina oyaj para ipaís inuan yejuamej on yejuan kicuidarouaj.
Iriquezas Salomón niman iueyilis
14 On oro yejuan Salomón kiseliaya cada xipan, katka 22 mil kilos, 15 niman xteuan kipouayaj on impuestos yejuan kitlaxtlauayaj on tlanamakakej, niman tlasemankej, niman nochimej on reyes de Arabia, niman on gobernadores ipan on país de Israel. 16 On rey Salomón otlanauatij ma kichijchiuilikan 200 uejueyimej escudos de oro yejuan tlatetzotzontl ikan martillo. Ipan cada escudo okitekitiltijkej chikuasen kilo oro. 17 No ijki otlanauatij ma kichijchiuakan 300 escudos más pipitikej. Ipan cada escudo pitentsin okitekitiltijkej más de se kilo uan tlajko oro yejuan tlatetsotsontli ika martillo. Niman on escudos okintlalij ipan on palacio itoka "Ikojyoj Líbano."
18 No otlanauatij ma kichijchiuakan sen ueyi trono ikan marfil, on itlanuijchol elefante niman okalauilijkej oro yejuan más kuajli. 19 On trono* kipiyaya chikuasen escalones. Ipan on trono* kampa notlatsaya, kuayeualtik katka, niman inajnakastlan on trono* kipiyaya kampa kintlaliaya imauan on rey. No ijki, inajnakastlan on trono itech on kampa kintlaliaya imauan, okinchijchiuilij ome leones ijkatikatkaj. 20 Niman no, okinchijchiu majtlaktli uan ome leones ijkatikatkaj ipan on escalones. Okichijchiu sen león ipan cada lado de on chikuasen escalón. ¡Xkaman ipan nion se reinojyotl kichijchiuayaj itlaj kenin!
21 Nochi icopas on rey niman on platos yejuan onkatkaj ipan on palacio itoka "Ikojyoj Líbano", tlachijchijtin katkaj ikan oro yejuan más kuajli. Xitlaj onkatka de plata, pampa ijkuak Salomón nemiya, on plata xueyi kijtosnekiya. 22 Ibarcos rey Salomón niman ibarcos on rey Hiram, san sekan kistinemiyaj. Niman cada yeyi xipan yayaj Tarsis niman kuajkiyaj plata, marfil, monos niman pavos reales.
23 On rey Salomón kintlaniya nochimej on reyes ipan in tlaltikpaktli ikan riquezas niman ikan tlamatkilistli. 24 Nochi tlakatl kinekiya kitas on rey Salomón niman kakis on tlamatkilistli yejuan Dios okimakak. 25 Cada xipan, on yejuan uajlayaj kuajkuiliayaj sen tetlayokolijli*. Kiktiliayaj tlajtlamach* de plata niman de oro, tlakentin, armastin, ajuiyalistin, caballos niman mulas.
Salomón kinkoua niman kinnamaka carretas de guerra niman caballos
26 Salomón okinsentlalij se mil 400 carretas de guerra, niman 12 mil tlakamej yejuan kistinemij ipan caballo. Sekimej kimpiyaya ipan keskan ueyikalpanmej kampa kinmeuayaj on carretas de guerra, niman oksekimej kimpiyaya ne Jerusalén para kicuidarouayaj. 27 On rey okichiu para ne Jerusalén sanoyej ma miyekiya plata ken temej yeskiaj, niman no sanoyej miyek onkatkaj on kojtin* cedro no ijki ken miyek onokej higueras kojtin* silvestres ipan on ixtlauatl. 28 On caballos yejuan kinuikiliayaj Salomón kisayaj ne Muzri niman Cilicia, pampa on tlasemankej para on rey Salomón ompa ne kinkouayaj. 29 Sen carreta para guerra yejuan ualeuaya Egipto kouayaj ika 600 plata tomin, niman sen caballo kouayaj ika 150 plata tomin. Niman nochimej on reyes hititas niman sirios tlakouayaj intech on itlasemankauan rey Salomón.