Salomón okinmauistilij ídolos
11
Aparte de ichpoch on rey de Egipto, Salomón okimpix oksekimej siuamej yejuan xchanejkej kenon: moabitas, amonitas, edomitas, sidonias niman hititas. 2 In siuaj ualeuayaj ipan on naciones yejuan toTEKO okinmijlijka on tlakamej israelitas maka iminuan nonamiktiskej, pampa tlamo nopopoloskiaj niman kinmauistiliskiaj ídolos. Pero Salomón okiminnek on siuamej, niman iminuan ononamiktij. 3 Salomón okipix 700 isiuauan, yejuan iminichpochuan katkaj reyes, niman no okipix 300 itlakpasiuauan. On siuamej okichijkej para Salomón ma kitlalkaui toTEKO Dios. 4 Ijkuak Salomón ye ueuentsin katka, isiuauan okichijkej para ma kinmauistili yejuan xmelauak dioses. Ijkon okichiu pampa xiuan onouikak toTEKO Dios ikan nochi iyojlo. David, on itataj xijki okichiu. 5 Salomón okimauistilij on diosa Astarté, imindiosa on sidonios. No, okimauistilij on ídolo sanoyej tetlajyeloj* itoka Milcom, iminídolo on amonitas. 6 Ijkon tej, Salomón okichiu on tlen sanoyej xkuajli ixpan toTEKO, pampa xokitlakamat kuajli toTEKO ika nochi iyojlo ken okichiu David, itataj.7 Kampaka ikisayan tonaltsintli ne Jerusalén, Salomón okichijchiu sen pitentsin tiopan ipan sen tepetsintli para kimauistiliaya iminídolo on moabitas yejuan sanoyej tetlajyeloj*, itoka Quemós. Niman no ompa okichijchiu okse pitentsin tiopan para iminídolo on amonitas yejuan no sanoyej tetlajyeloj*, itoka Moloc. 8 No ijki, okinchijchiuilij pipitikej tiopamej para nochimej on isiuauan yejuan xchanejkej, kampa ueliskej kitlatiskej kopajli niman tlauentlaliskej para imindioses. 9 Niman toTEKO, iDios Israel, okualan itechkopa Salomón, pampa Salomón okitlalkauij. Maski toTEKO okinotitijka Salomón okpa, 10 niman yokinauatijka maka kinmauistilis oksekimej dioses, yejua xokitlakamat. 11 Yejua ika, toTEKO ijkin okijlij Salomón: “Pampa xkuajli tlinon yotikchiu niman xotiktlakaitak nopacto* nion xotikintlakamat noleyes yejuan onimitsmakak, nimitskuilis moreino niman nikmakas semej motekitkauan. 12 Pero pampa motataj David sanoyej oniktlajsojtlak*, moreino xnimitskuilis chika tinemi, yej nikuilis mokoneu ijkuak yejua kalakis rey. 13 Pero xnikuilis nochi ireino. Nikauilis se tribu, pampa motataj David sanoyej oniktlajsojtlak, niman no pampa sanoyej niktlajsojtla* on ueyikalpan Jerusalén yejuan oniktlapejpenij."
Itlauelikniuan Salomón
14 Kemaj toTEKO okichiu para Salomón ma kipiya sen itlauelikniu yejuan itoka Hadad. Hadad sen edomita katka, niman yejua, ken kitaya on rey de Edom. 15-16 Ijkuak David okichijka nouijsokilistli iuan on nación Edom, Joab, yejuan tlayekanki katka intech on soldados israelitas, oyaj ne Edom para okintôkato on soldados israelitas yejuan ompa omikkej. Ompa onenkej chikuasen metstli, niman chika ompa nemiyaj, okinmiktijkej nochimej on tlakamej edomitas. 17 Pero Hadad, ijkuakon konetl katka, niman yejua ocholojteu niman oyaj Egipto iuan keskimej ichanejkauan yejuan itekitkauan katkaj itataj. 18 Yejuamej okiskej ne Madián niman oajsikej ne Parán, kampa oksekimej tlakamej onosentlalijkej iminuan. Kemaj oyajkej para Egipto. Ijkuak ompa oajsikej, oyajkej itech on rey de Egipto, niman yejua okinmakak kanon chantiskej niman okinmakak tlakuajli niman tlaltin.
19 On rey sanoyej okipakaitak Hadad, hasta okimakak icuñada para ma kinosiuati. On icuñada ikniu katka Tahpenés, isiuau on rey. 20 Niman Hadad iuan otlaskaltij isiuau. On ikoneu okitokayotijkej Genubat niman Tahpenés okiskaltij iuan ikoneuan, ne ipan ipalacio.
21 Pero ijkuak Hadad okimat ika David yomik niman no yomik Joab yejuan intlayekankau on soldados, ijkin okijlij on rey:
—Xnechkauili ma ninokuepa ipan nopaís.
22 Niman on rey okinankilij:
—¿Tline tiasneki ipan mopaís? ¿Tlen itlaj mitspoloua nikan?
Hadad okinankilij:
—Ka, xitlaj* nechpoloua, pero nimitstlajtlanilia xnechkauili ma niuiya.
23 No ijki, Dios okichiu para Rezón ma nokuepa itlauelikniu Salomón. Rezón ikoneu katka Eliada, niman yejua, ocholojtejka itech iteko Hadad-ezer, on rey de Soba. 24 Ijkuak David otlan kinmiktia on soldados de Soba, Rezón iminuan onosentlalij tlakamej yejuan tlachtektinemiyaj, niman yejua intlayekankau katka. Niman Rezón oyaj ipan on ueyikalpan Damasco niman ompa on tlakamej yejuan tlachtektinemiyaj okitenekej ken rey para nochi on país Siria. 25 Ijkuak Rezón katka rey ne Siria, sanoyej kitlauelitaya on nación de Israel. Niman Rezón iuan onosentlalij Hadad para onochijkej itlauelikniuan Salomón ipan nochi inemilis.
26 Niman Jerobóam, ikoneu Nabat, no onochiu itlauelikniu on rey Salomón. Jeroboam sen tlapaleuijketl katka itech Salomón, niman ualeuaya ipan on ueyikalpan Sereda. Yejua kisaya itech itribu* Efraín, niman inanaj katka sen siuakaualtsintli yejuan itoka katka Zerúa. 27 Jeroboam okixnamik Salomón ipampa in: Salomón kichijchijtikatka sen tlalmantli niman kuektlaliaya on tepanchinantli kampa itoka iueyikalpan David. 28 Jeroboam sen chikajkatlakatl katka niman sanoyej kuajli tekitiya. Ijkuak Salomón okitak ika in telpochtli sanoyej tekitki, okitlalij para ma kinyekana on tlakamej yejuan kisaj itech itribu* Manasés niman Efraín yejuan Salomón okinchiualtij otekitkej maski xkintlaxtlauiliyaya.
29 Se tonajli, Jeroboán okis ne Jerusalén, niman ipan ojtli iuan ononamik on tiotlajtojketl Ahías yejuan ualeuaya Silo. Ahías kinakijtiaya sen capa yenkuik, niman san inseltimej omemej nemiyaj ne mijlaj. 30 Kemaj Ahías okitsatsayan on icapa yenkuik yejuan kinakijtiaya, niman okixtij majtlaktli uan ome tipan. 31 Niman kemaj ijkin okijlij Jeroboam: “Xkui majtlaktli tipan para tejua, pampa toTEKO, iDios Israel, ijkin mitsijlia: ‘Nikuilis ireino Salomón niman timitsmakas tejua majtlaktli tribu. 32 Salomón nikauilis san se tribu, ipampa David, notekitkau, pampa sanoyej oniktlajsojtlak*, niman no pampa sanoyej niktlajsojtla* on ueyikalpan Jerusalén yejuan oniktlapejpenij intech nochimej on uejueyikalpanmej de Israel. 33 Ijkon nikchiuas pampa Salomón yonechtlalkauij, niman aman yej kimauistilia on diosa Astarté, yejuan imindiosa on sidonios; niman on dios Quemós, imindios on moabitas; niman on dios Milcom, imindios on amonitas. Nikita ika sanoyej xkuajli ken onouikak. Xokitlakamat noleyes nion notlanauatiluan ken okichiu David, itataj. 34 Pero xnochi nikuilis ireino. Yej nikauilis ma tlamandaro ken rey hasta mikis. Ijkin nikchiuas san ipampa notekitkau David yejuan nejua oniktlapejpenij niman sanoyej oniktlajsojtlak, pampa yejua okitlakamat notlanauatiluan niman noleyes. 35 Pero nejua nikuilis ireino itelpoch, niman nimitsmakas tejua majtlaktli tribu. 36 Itelpoch, sa se tribu* nikauilis, para David nochipa kipiyas sen iuejkakoneu* yejuan tlamandaros ne Jerusalén kampa oniktlapejpenij para ompa onyas noueyitiopan kampa nikneki nokoneuan nechmauistiliskej. 37 Tejua nimitstlalis rey de Israel, niman uelis titlamandaros nochiuiyan kampa tejua tiknekis. 38 Tla tikchiua nochi tlen nimitsnauatia, tla tikchiua nochi tlen melajki, niman tla tiktlakamati noleyes niman notlanauatiluan ken okichiu notekitkau David, nejua xkaman nimitskauas. Nikchiuas para tirey yes ipan Israel, niman nikinkauas para mouejkakoneuan nochipa tlamandaroskej ijkuak timikis. Ijkon tej, nimitsmakas Israel. 39 Niman iuejkakoneuan David nikincastigaros pero xpara nochipa.’”
40 Ijkuak Salomón okimat nochi in, kinekiya kimiktis Jeroboam. Pero yejua ocholojteu niman oyaj Egipto itech on rey Sisac, niman ompa onokau hasta kaman omik on rey Salomón.
Imikilis Salomón
41 Ipan on amamoxtli* kampa tlajkuilolnestikaj ika on inemilis Salomón, ompa kijtoua kenijki okipix inemilis Salomón niman kenijki tlamatki* katka niman nochi tlen okichiu ijkuak nemiya. 42 Ipan nochi Israel, Salomón otlamandaroj ken rey ne Jerusalén 40 xipan. 43 Niman ijkuak omik, okitôkakej ne kampa toktokej iachtojtajuan ne kampa kuitiaj Iueyikalpan David. Kemaj Roboam, ikoneu Salomón, kej yejua okalak rey.