On tlauijsokilistin yejuan okichiu rey David
8
Sakin on rey David okintlan on filisteos, niman okinchiualtij ma notemakakan itech, niman okinkuilij on poder yejuan kipiyayaj. 2 No okintlan on moabitas. David okinchiualtij ma notekakan ipan tlajli on soldados moabitas, niman kemaj okinmiktikej ome de cada yeyi. On soldados yejuan xomikej, onokajkej imak David, niman okinchiualtij ma kitlaxtlauakan impuestos.3 David no okitlan on rey Hadad-ezer, ikoneu Rehob, yejuan katka rey de Soba. Okitlan ijkuak in rey Rehob kinoyaxkatisnekiya oksejpa on región kampa onkaj on río Éufrates. 4 David okajsik se mil 700 soldados de on rey yejuan yetiayaj ipan caballos, niman 20 mil soldados yejuan nejnemiyaj. Niman okinkotstlaluayotekej nochimej on caballos yejuan kintilanayaj on carretas de nouijsokilistli, pero okinkajkej 100 para kintilanaskej on carretas.
5 On sirios yejuan ualeuaj ipan iueyitlalpan Damasco okipaleuikoj Hadad-ezer, on rey de Soba, pero David okimiktij 22 mil sirios niman ijkon okintlan. 6 Kemaj David okitlalij miyek soldados para otlacuidarojkej ne ipan iueyitlalpan Damasco. Niman David okinchiualtij on sirios ma notemakakan itech, niman no okinchiualtij ma kitlaxtlauakan impuestos. Ijkon tej, toTEKO kipaleuiyaya David nochiuiyan kampaka yaya para kipiyaya tetlanilistli.
7 Sakin David okinoyaxkatij* nochi on tepostlatsakuililtin de oro yejuan kitekitiltiayaj iuejueyitekitkauan Hadad-ezer, niman okinmiktik ne Jerusalén. 8 No onoyaxkatij sanoyej miyek tlajtlamach* de bronce yejuan onkatka ipan on uejueyikalpanmej Beta, niman Berotai, yejuan iyaxkauan* katka Hadad-ezer.
9 Ijkuak Toi, on rey de Hamat, okimat ika David okintlan nochi isoldados Hadad-ezer, 10 okititlan Joram, ikoneu, para ma kitlajpaloti niman ma kijliti sanoyej ma pakatlamati on rey David pampa iuan onouijsok Hadad-ezer niman okitlan. Toi no okijlij ma pakatlamati David pampa yejua no itlauelikniu katka Hadad-ezer. Niman okititlanilij tlajtlamach* de plata, de oro niman de bronce. 11 Nochi in tlajtlamach*, David okiyaxkatij toTEKO iuan on oro niman plata yejuan ualeuaya ipan nochimej on naciones yejuan yokintlanka. 12 On naciones yejuan okintlan katka: Edom, Moab, Amón, on filisteos niman on amalecitas. Niman David no okiyaxkatij toTEKO on tlajtlamach* yejuan okuilij Hadad-ezer, ikoneu Rehob, on rey de Soba.
13 David más okixmatkej ijkuak ouajnokuepato ipan on Ixtlauatl de Istatl, kampa okinuijsokito niman okinmiktij 18 mil edomitas. 14 Kemaj David okintlalij miyekej soldados para otlacuidarojkej ipan nochi on tlajli Edom, niman nochimej on edomitas onokajkej imak David. Niman toTEKO kipaleuiyaya David nochiuiyan kampa yejua yaya para tetlaniya.
Itlapaleuijkauan David
15 David otlamandaroj ken rey ipan nochi Israel, niman okichiu tlen kuajli niman tlen melajki ipan nochi on nación de Israel. 16 Joab, ikoneu Sarvia, kinyekanaya isoldados David, niman Josafat, ikoneu Ahilud, yejua tlajkuilojketl katka itech David. 17 Sadoc, ikoneu Ahitob, niman Abiatar ikoneu Ahimelec, tiopixkej katkaj. Niman Seraías tlajkuilojketl katka. 18 Niman Benaías, ikoneu Joiada, kinyekanaya on soldados cereteos niman peleteos yejuan kimanauiyaj rey David. Niman ikoneuan David tiopixkeja katkaj.