David niman Mefi-boset
9
Se tonajli David otetlajtoltij tla onokau yakaj ifamilia Saúl, yejuan uelis itlaj ika kipaleuis para ika kitlakaitas Jonatán. 2 Niman itech ifamilia Saúl nemiya sen tekitketl, itoka katka Siba. Yejua okitekuitlankej para ma uiya itech David. Ijkuak oasik itech, okitlajtoltij:—¿Tejua tiSiba?
Yejua okinankilij:
—Kemaj norey, nejua nimotekitkau.
3 Kemaj David okitlajtoltij:
—¿Sanken nemi yakaj de ifamilia Saúl, yejuan nejua uelis nikpaleuis ken oniktlajtolmakak Dios?
Niman Siba okinankilij:
—Kemaj, ikoneu Jonatán. Yejua uilatsin ipan on ome ikxiuan.
4 Kemaj on rey okitlajtoltij:
—¿Kanon nemi?
Niman Siba okinankilij:
—Nemi ipan on kalpan Lodebar, ne ichan Maquir ikoneu Amiel.
5 Kemaj rey David otlanauatij ma kanatij, 6 niman ijkuak Mefi-boset, on ikoneu Jonatán niman ixuiu Saúl, oajsik ixpan David, onopachoj ikan miyek tetlakaitalistli. Kemaj David okipakaijtoj:
—¡Mefi-boset!
Niman Mefi-boset okinankilij:
—Nikan ninemi para nimitstekipanos norey.
7 David okijlij:
—Maka xmomojti, pampa nejua nikneki nimitspaleuis ipampa on tlakaitalistli yejuan nikpiyalia motataj Jonatán. Nejua nikchiuas para ma mitskuepilikan nochi itlaluan moauelo Saúl, niman nochipa titlakuas nouan.
8 Mefi-boset oksejpa onopachoj, niman okijtoj:
—Ueyixtikaj rey, ¿Tline ipan titlacha in motekitkau yejuan xitlaj* kitosneki inemilis? Nejua ninemi ken sen chichi* yejuan yomik.
9 Kemaj on rey okonots Siba yejuan itlakeual katka Saúl, niman okijlij:
—Nochi tlen iyaxka* katka moteko Saúl niman ifamilia, nikmaka Mefi-boset on ixuiu. 10 Niman tejua iuan mokoneuan niman motlakeualuan tikintôkilis itlaluan niman tikeuas on tlen tlakis, para ifamilia moteko kipiyaskej tlen kikuaskej, pero Mefi boset, ixuiu, nochipa tlakuas nouan.
(Siba kipiyaya matlaktli uan makuijli ikoneuan niman sempoajli itlakeualuan.) 11 Kemaj Siba okinankilij on rey:
—Norey, nochi tlen yotinechnauatij nejua motekitkau, nikchiuas.