Okitlankej niman okimiktijkej Absalón
18
David okinsentlalij isoldados niman okintlalij tlayekankej ipan cada se mil soldados niman ipan cada 100 soldados. 2 Kemaj David yexkantipan okinxexeloj isoldados, se okiyekan Joab, okse okiyekan Abisai, ikoneu Sarvia niman ikniu Joab, niman okse okiyekan Itai yejuan ualeua ipan on ueyikalpan Gat. Niman nochimej isoldados okinmijlij:—Nejua nias nemouan ipan on nouijsokilistli.
3 Pero yejuamej okinankilijkej:
—¡Ka! Maka ijkon xchiua toueyi rey, pampa para totlauelikniuan xueyi kitosneki tla tontlatlaksaskej, noso tla timikiskej tlajkotipan de tejuamej. Pero tejua toueyi rey más ueyi tikijtojtikaj xken 10 mil de tejuamej. Yejua ika más kuajli tla timokauas ipan in ueyikalpan para titechtitlanilis tlen techpolos.
4 Niman David okinmijlij:
—Nikchiuas on tlen nemejuamej nenkitaj kuajli.
Kemaj David onotelkets itech ikalakiyan on ueyikalpan chika isoldados kijsayaj notekpantiayaj de se mil niman de 100 soldados.
5 David no okinmijlij on tlayekankej Joab, Abisai niman Itai para maka kitlajyouiltiskej Absalón san ipampa yejua David. Niman nochimej on soldados okakej tlinon otlanauatij on rey kenijki kitrataroskej Absalón on tlayekankej. 6 Ijkon tej, isoldados David oyajkej neka mijlaj para onouijsokitoj inmiuan on soldados yejuan kitokaj Absalón. On nouisokilistli onochiu ipan ikojyoj Efraín, niman 7 on isoldados David okintlankej on soldados yejuan kitokaj Absalón. Sanoyej omikouak ipan on tonajli, pampa omik 20 mil tlakamej. 8 On nouijsokilistli yonochayajka nochiuiyan. Ijkuakon, ikan on kojtin* más omikouak xken ika on espada. 9 Ijkuak Absalón yetiaya ipan sen mula, san amanaman okiminamiktiaj isoldados David. Kemaj on macho okalaktikis itsintlan sen auakojtli, niman Absalón onokau itsontekon ipan imauan on kojtli. Ijki ompa onokau ajkopilkak, pampa on mula sanken* onotlaloj. 10 Yakaj yejuan okitak in, oyaj okijlito Joab:
—Onikitak Absalón ajkopilkak ipan sen auakojtli.
11 Niman Joab okinankilij:
—Tla otikitak, ¿tline xotikmiktij, niman otikuajtlajkal ipan tlajli? Nejua nimitsmakaskia majtlaktli tomin de plata, niman sen xijlanmekatl.
12 Pero on tlakatl okinankilij Joab:
—Maski tinechtlayokoliskia se mil tomin de plata, xnikmiktisia ikoneu on rey, pampa tejuamej otikakej ijkuak on rey omitsnauatij tejua, Abisai niman Itai, para maka itlaj nenkichiuiliskej Absalón. 13 Niman tla nikmiktiskia, sanenkaj yeskia, pampa on rey nimantsin kimatiskia ika nejua onikchiu, niman tejua xitlaj* tikchiuaskia para tinechmanauiskia.
14 Joab okijlij:
—Xmás mouan nitlajtlajtojtias.
Niman Joab okonkuik yeyi lanzas, niman okitato kampa ajkopilkaya Absalón. Yejua okitlalaktilij ipan iyojlo ijkuak sanken* yoltikatka niman ajkopilkaya ipan on auakojtli. 15 Kemaj majtlaktli isoldados Joab okiyeualojkej Absalón, niman kuajli okimiktijkej. 16 Kemaj Joab otlanauatij ma kipitsakan on kuakuautlapitsajli, niman isoldados xok okintojtokakej on yejuan de Israel, pampa Joab okinteltij. 17 Kemaj oketstejkej Absalón niman okitlalijkej ipan sen ueyi tlaltekontli yejuan onkatka ipan on kojyo niman ipan okitlalijkej miyek tetl. Kemaj nochimej on israelitas ontlatlaksakej niman oyajkej iminchan.
18 Ijkuak nemiya Absalón, otlanauatijka ma kichijchiuakan sen monumentoa de tetl ipan on ixtlauatl itoka “Ixtlauatl de on Rey”. Niman yejua yokitlalijka ipan on monumento "Absalón" ken yejua itoka, pampa xkipiyaya nion se ikoneu yejuan tlakatl yejuan kipiyaskia itoka. Niman hasta aman kixmatij "imonumento Absalón".
19 Kemaj Ahimaas, ikoneu Sadoc, okijlij Joab:
—Xnechkauili ma ninotlalo niman ma nikijliti David ika toTEKO yokipaleui ken kitocaroua niman yokimanauij de itlauelikniuan.
20 Pero Joab okinankilij:
—Aman xkitocaroua tikonmachistis on rey, pampa on akin yomik, ikoneu on rey. Pero okse tonajli, kemaj uelis tias.
21 Kemaj Joab okijlij sen tlakatl de Etiopía:
—Xuiya tejua niman xmachistiti on rey on tlen otikitak yonochiu.
On tlakatl yejuan ualeua Etiopía onopachoj ixpan Joab niman onotlaloj. 22 Ahimaas, oksejpa okijli Joab:
—Maski ma nochiua tlinon nochiuas, pero xnechkauili ma niktojtoka on tlakatl yejuan ualeua Etiopía.
Pero Joab okinankilij:
—¿Tline tikneki tias, nokoneu? Xitlaj mitsmakaskej ika on tontemachistis?
23 Niman Ahimaas okinankilij:
—Maski maka itlaj ma niktlani, nejua nikneki nias.
Kemaj Joab okijlij:
—Xmotlalo tej.
Kemaj Ahimaas onotlaloj ipan on ixtlauatl niman okipanauij on tlakatl yejuan ualeua Etiopía. 24 Chika ijkuakon, David yeuatikatka intsajlan on ome tsakuijlomej de ikalakiyan on ueyikalpan. Niman on soldado otlejkok ipan ikuapachol on tepantli ne ikalakiyan on ueyikalpan. Ijkuak ontlachix, okitak sen tlakatl iselti, yejuan uajnotlalouaya, 25 niman okimachistij on rey. Kemaj David okijlij:
—Tla uajlau iselti, manin kuajki kuajli tlajtojli.
Chika on tlakatl nonisiuiyaya, 26 on soldado okitak okse tlakatl uajnotlalouaya, niman okitsajtsilij on tlajpixki itech on tsakuijlotl:
—Okse tlakatl uajnotlaloua.
David okijtoj:
—¡Manin no kuajki kuajli tlajtojli.
27 On soldado okijtoj:
—Ijkon ken uajnotlaloua, on yejuan ualakatstiu nikuitia yejua Ahimaas, ikoneu Sadoc.
David okijto:
—Yejua sen kuajli tlakatl niman melauak kuajki on tlen kuajli tlajtojli.
28 Ahimaas ononisiuij. Kemaj onotlakuantelkets niman onopachoj hasta ipan tlajli ixpan on rey, okitlajpaloj, niman okijlij:
—Ma kiyekteneuakan toTEKO yejuan tejua moDios noueyi rey pampa yokinmejkuanij on yejuan omitsixnamikkej.
29 On rey okitlajtoltij Ahimaas:
—¿Ken nemi Absalón?
Yejua okinankilij:
—Nejua onikitak ika sanoyej yonajkomankaj on tlakamej ijkuak Joab, motlayekankau noueyi rey, onechajtitlan, pero xonikmat tlinon nochijtikakta.
30 Kemaj on rey okijlij:
—Ompa on xmotelketsa, niman ompa xmokaua. Ahimaas ijki okichiu.
31 Chika ijkuakon oajsik on tlakatl yejuan ualeua Etiopía, niman okijlij:
—Xseli in kuajli tlajtojli noueyi rey. Aman toTEKO yomitsmakak tetlanilistli noueyi rey. Yomitsmanauij de ipan inma on yejuan omitstlauelitakej noueyi rey.
32 On rey okitlajtoltij:
—Niman on telpochtli Absalón, ¿kuajli nemi?
On tlakatl okinankilij:
—Kuajli yeskia tla nochimej on yejuan motlauelikniuan noueyi rey, niman nochimej yejuan xipan mitsitaj, niman nochimej yejuan mitsnekiliaj tlen xkuajli, ijkon tlamiskiaj kenon telpochtli.
33 Ijkuak on rey ijkon okak, sanoyej onajman niman otlejkok ipan on ikalijtik kampa kochi yejuan onkakta ipan ikuapachol on tepantli ne ikalakiyan on ueyikalpan. Ompa sanoyej opeu kichokilia. Niman chika tlejkotiaya, kijtouaya: “¡Nokoneu Absalón! ¡Nokoneu Absalón! ¡ Más kuajli yeskia tla nejua nimikiskia! ¡Nokoneu, Absalón, nokoneu!”