Dios kiprometeroua kitiochiuas David
7
Ijkuak on rey David kuajli yonotlalijka ipan ipalacio niman toTEKO okichiu para xok okipix nouisokilistli iuan itlauelikniuan yejuan nemiyaj iyeualkan, 2 David okijlij on tiotlajtojketl Natán:—Tejua kuajli tikita, ika nejua nichanti ipan sen kualtsin kajli tlachijchijtli ikan kojchichijli, pero iyekcaja toTEKO uej onkaj ipan sen kajli de tela.
3 Niman Natán okinankilij:
—Xchiua tej, nochi on tlen tineki tikchiuas, pampa toTEKO nemi mouan.
4 Pero ipan on yeuajli toTEKO okinots Natán, niman okijlij: 5 "Xuiya xkijliti notekitkau David ika ijkin nikijtoua: 'Xtejua tikchijchiuas sen ueyitiopan kampa nichantis. 6 Desde ijkuak onikinkixtij on israelitas ipan on tlajli Egipto hasta aman, xkaman onichantik ipan tiopantin, yej nochipa onichantik ipan kajli tlachijchijtli ikan tela. 7 Niman ipan nochi on tonaltin ijkuak iminuan onikistinen, xkaman onikintlajtlanilij on yejuan tlayekankej notlapejpeniluan israelitas, ma nechchijchiuilikan sen ueyitiopan ikan kojchichilij de cedro.’ 8 Yejua ika, xkijli notekitkau David ika nejua niiTEKO yejuan nochi ueli kichiua. Ijkin nikijlia: ‘Nejua onimitskixtij intech on borregos ijkuak tikintlajpiyaya, niman onimitstlajlij tlayekanki intech notlapejpeniluan israelitas. 9 Nochiuiyan kampa otikistinen, mouan oninen, niman nochimej motlauelikniuan yejuan mitsixnamikiyaj yotlan nikinmiktia. No yonikchiu para sanoyej ma mitsixmatikan ijkon ken sanoyej kinmixmatij on tlakamej yejuan uejueyixtokej ipan in tlaltikpaktli. 10 No oniktlapejpenij sen tlajli kampa onikinmakak notlapejpeniluan israelitas, para ma chantikan ipan sen tlajli yejuan iminyaxka, kampa xakaj kimpajsolos. Ijki, on xkuajkualtin tlakamej xok kintlajyouiltiskej ken okinchiuilijkej achtoj, 11 ijkuak onikintlalij jueces para ma kiyekanakan notlapejpeniluan. Nejua nikchiuas para makasa xkimpiyakan nemotlauelikniuan. Niman aman nimitsmachistia ika nimitsinmakas mouejkakoneuan. 12 Ijkuak timikis niman mitstôkaskej iuan motajuan, nejua niktlalis se mouejkakoneu yejuan tlamandaros, niman nejua nikchiuas para ireino nochipa onyas. 13 Yejua nechchijchiuilis sen tiopan, niman nejua nikchiuas ma onya ireino para nochipa. 14 Nejua yes niitataj niman yejua yes nokoneu. Niman ijkuak xnechtlakamatis, nejua nicastigaros ken sen tajtli castigaroua ikoneu. 15 Pero nochipa niktlajsojtlas niman xkaman niktlauelkauas, ken oniktlauelkau Saúl para tejua onimitstlalij tirey. 16 Xmatstia ika intech mouejkakoneuan nochipa nemiskej reyes niman moreino onyas para nochipa.’”
17 Nochi yejua in, Natán okijlij David ken okitak niman ken okak ipan on tlatlachalistli ken temiktli.
Ioración David
18 Kemaj on rey David okalak ipan on tabernáculo* kampa toTEKO nemiya niman okijlij: “NoTEKO niman noDios, ¿akin nejua niman tlinon ueyi kimati nofamilia ika otinechtlapejpenij, niman ijkin otinechmakak in ueyi tekitl? 19 Yejua on ueyi kitosneki, pero noTEKO niman noDios, in más ueyi kitosneki ika yotinechijlij nejua yejuan nimotekitkau, ika nouejkakoneuan nochiuaskej reyes para nochipa. Ijkon ken tinechmaka miyek tlamach, xakaj tlakatl ueli ijkon kitemaka ken tejua noTEKO niman noDios, otinechmakak. 20 NoTEKO niman noDios, ¿tlinon más uelis nimitsijlis? Tejua kuajli tinechixmati. 21 Nochi in kuajli ueyi tlajtlamach* yotikchiu, ijkon ken yotikijtojka niman otiknek para nejua ma nikixmati. 22 NoTEKO niman noDios, tejua sanoyej tiueixtikaj pampa xakaj nemi okse ken tejua, niman xnemi okse dios. Yej san tejua tinemi ijkon ken yotechijlij. 23 ¡Niman xonkaj okse nación ipan in tlaltikpaktli kenon monación Israel! Tejua noDios, otikinmanauij para motlapejpeniluan yeskej. Ikan on miyek tlamauisoltin yejuan otikchiu ijkuak otikinkixtij Egipto, nochiuiyan imanian in tlaltikpaktli yomitsixmatkej. Niman tejua otikinmejkuanij oksekimej naciones niman dioses itech motlapejpeniluan. 24 Tejua yotikijtoj ika on motlapejpeniluan israelitas yeskej para nochipa niman ika tejua nochipa tiiminDios yes.
25 "Ijkon tej, noTEKO Dios, xchiua on tlen yotinechprometerouilij nejua motekitkau niman nouejkakoneuan, ika nochipa yejuamej kalaktiaskej reyes intech mokoneuan. 26 ¡Motokatsin nochipa ma kueyilikan, niman ma kijtokan ika toTEKO yejuan kipiya nochi poder, yejua Dios de on israelitas! ¡Niman nouejkakoneuan, nejua motekitkau, ma nochipa tlamandarokan! 27 Tejua noTEKO, yejuan tikpiya nochi poder, iminDios on israelitas, yotinechijlij ika nouejkakoneuan tikintlalis reyes. Yejua ika, nejua, maski san nimotekitkau ijkin nimitstlajtlanilia. 28 Tejua noTEKO, tiDios. Niman motlajtoltsin nochi melauak niman yotinechprometerouilij nejua motekitkau miyek tlen kuajli. 29 Nimitstlajtlanilia xkintiochiua nouejkakoneuan yejuan reyes yeskej, nejua nimotekitkau, para nochipa kuajli ma nemikan. Tejua noTEKO niman noDios, yotikprometeroj, niman motlatiochiualis onyas nochipa ipan nouejkakoneuan yejuan reyes yeskej."