David kineki kiktis on iyekcaja toTEKO ne Jerusalén
6
David oksejpa okinsentlalij on 30 mil soldados yejuan tlatlapejpeniltin katkaj intech on israelitas. 2 Niman okiskej ne Baala ipan iueyitlalpan Judá, iminuan nochimej on soldados. Oyajkej para okuitoj iyekcaja Dios, on yekcaja kampa kinotsaj toTEKO yejuan nochi ueli kichiua, niman ueyixtikaj intsajlan on querubines*. 3 On iyekcaja toTEKO okixtijkej ichan Abinadab yejuan onkakta ipan sen tepetsintli. Niman ijkuak okiktikej, okitlalijkej ipan sen carreta yenkuik. Uza iuan Ahío, ikoneuan Abinadab, kiyekanayaj on carreta kampa yaya iyekcaja Dios. 4 Niman Ahío yaya ixpan on yekcaja. 5 Niman David inuan nochimej on israelitas, nijtotijtiayaj niman nokuikatijtiayaj ixpan Dios ikan miyek paktli niman tlatsotsontiayaj ikan arpas, salterios, panderos, castañuelas niman platillos. 6 Ijkuak oajsikej ne kampa kitokayotiaj "Kampa Tlauatsa Nacón" on uakaxtin ye uetsiyaj, niman Uza onomatelkets para okonkitskij on yekcaja. 7 Pero toTEKO sanoyej okualan itechkopa Uza, pampa xokimakas okiktsij on yekcaja. Yejua ika, ompa ouetstiaj niman omik itech iyekcaja Dios.8 David okualan pampa toTEKO okimiktij Uza. Yejua ika, ompa okitokayotij Pérez-uzaa. Niman hasta aman ijki itoka. 9 Ipan on tonajli David sanoyej onomojti ixpan toTEKO niman okijtoj: "Nikita más kuajli tla xok nikiktis iyekcaja toTEKO." 10 Niman pampa xok okinek okiktik iyekcaja toTEKO ipan iueyikalpan David, otlanauatij ma kiktikan ichan Obed-edom ne ipan on ueyikalpan Gat. 11 Ijkon tej, iyekcaja toTEKO onokau yeyi metstli ichan Obed-edom. Niman toTEKO okitiochiu Obed-edom iuan nochi ifamilia.
David kikti iyekcaja toTEKO ne Jerusalén
12 Niman rey David okijlijkej ika ipampa on yekcaja, toTEKO sanoyej yokitiochiu Obed-edom iuan nochi tlen kipiya. Yejua ika, David oyaj ikan miyek paktli, okixtito on yekcaja ichan Obed-edom niman okiktik ipan Iueyikalpan David. 13 Ijkuak on tlakamej yejuan kiktiyaj iyekcaja toTEKO okontlalijkej inmikxi chikuasempa, David okuentlalij sen uakax niman sen becerro yejuan tomajkej.
14 David kitlalijtiayaj sen efod* de lino niman nijtotijtiaya ikan miyek paktli Ixpan toTEKO. 15 Ijkon tej, David niman nochimej on israelitas sanoyej pakatsajtsitiayaj niman tlatsotsontiayaj ikan tlapitsaltin, pampa kiktiyaj on iyekcaja toTEKO.
16 Ijkuak iyekcaja toTEKO kalaktiaya ipan iueyikalpan David, Mical, on ichpoch Saúl, ouajtlachix ipan ventana. Niman ijkuak okitak ika on rey David sa tsikuintiaya niman nijtotijtiaya ixpan toTEKO, xokuelitak niman sanoyej okualanij ipan iyojlo.
17 On iyekcaja toTEKO okiktikej niman okitlalijkej ipan sen kajli de telaj yejuan David yokichijchijka para ompa kitlaliskej. Kemaj David ixpan toTEKO okinuentlalij uentin yejuan nochi tlatla, niman uentin yejuan para teyoltlalijli. 18 Niman ijkuak David otlan tlauenchiua okintiochiu nochimej on israelitas ika itokatsin toTEKO yejuan kipiya nochi poder. 19 Nochimej on israelitas yejuan ompa nemiyaj, tlakamej niman siuamej, cada se okimakak sen pan niman sen memelatsin tlachijtli ikan dátiles niman se de uvajtetsojli. Kemaj nochimej onokuepkej iminchajchan.
20 David no oyaj ichan para okitiochiuato ifamilia. Pero Mical, ichpoch Saúl, okis okinamikito, niman ijkin okixkomakak on tlen okichiu:
—¿Tikuitia sanoyej kuajli tlen aman yotikonchiu, tejua rey de Israel, ijkon ken ne ye titsijtsintsotsoliuiya ijkuak otiuajmijtotijtiaj imixpan iminesclavas motekitkauan ken yakaj tlakatl yejuan xitlaj* itekiu?
21 Niman David okinankilij:
—Melauak sanoyej oniuajnijtotijtiaj, pero onikchiu ixpan toTEKO pampa niktlakaita, yejuan onechtlapejpenij para ma nikinmadaro on israelitas, itlapejpeniluan. Yejua xokitlapejpenij motataj nion semej ifamilias, yej onechtlapejpenij nejua. Yejua ika ninijtotis ixpan. 22 Niman más nikchiuas; más ninopijpinajtis ken tejua tikijtoua. Pero maski ijkon nikchiuas, nechtlakaitaskej on esclavas yejuan tejua tikintenejtikaj.
23 Mical, on ichpoch Saúl, xkaman okimpix ikoneuan ipan nochi inemilis.