David okalaktijkej rey de Israel niman Judá
5
Sakin, nochimej on uejueyixtokej ipan itribus on israelitas oyajkej ne Hebrón para otlajtotoj iuan David niman ijkin okijlijkej: "Tejua niman tejuamej sano yejua familia itech tikisaj, 2 niman maski Saúl yejua torey katka, tejua titlayekanaya ipan on nouisokilistin. Niman toTEKO yomitsijlij ika tejua tirey yes, niman tikinmandaros on israelitas."3 Ijkuak nochimej on uejueyixtokej israelitas oyajkej ne Hebrón, David iminuan okichiu sen pacto*. Yejua okitlalij ken testigo toTEKO. Kemaj yejuamej okikuatêkijkej David ika aceite niman okalaktijkej rey intech nochimej on israelitas.
4 David kipiyaya 30 xipan ijkuak opeu tlamandaroua ken rey niman otlamandaroj 40 xipan. 5 Ipan on ueyitlalpan Judá otlamandaroj chikome xipan uan tlajko, niman icapital katka Hebrón. Kemaj otlamandaroj 33 xipan ipan on tlajli de Israel niman on tlajli Judá, niman icapital katka Jerusalén.
Jerusalén onochiu iueyikalpan David
6 On rey David niman isoldados oyajkej Jerusalén para okinuijsokitoj on jebuseos yejuan ompa chantiyaj. Pero on Jebuseos kinemiliayaj ika David xuelis kalakis ipan on ueyikalpan, niman san kipijpinauiyayaj ika in tlajtoltin: "Tejua nikan xuelis tikalakis, pampa nikan maski san on yejuan koxkatsitsimej niman uilatsitsimej uelis mitstsakuiliskej". 7 Pero David iuan isoldados onoyaxkatijkej on ueyikalpan itoka Siona yejuan tsakutikakta ikan tepantli, yejuan aman itoka Iueyikalpan David. 8 On tonajli David okijtoj: "Nochi akin kinuijsokis on jebuseos, ma kalaki ijtik ipan on ueyi apantli niman ma kinmikti on koxkatsitsimej niman on uilatsitsimej yejuan sanoyej nikintlauelita." Desde ijkuakon, opeu kijtouaj in tlajtojli: "Yejuan koxkatsitsimej niman uilatsitsimej xuelis kalakiskej ipan itiopan toTEKO." 9 Kemaj David ochantik ipan on ueyikalpan yejuan tsakutikakta ikan tepantli kampa chantiyaj on soldados. Yejua okitokayotij "Iueyikalpan David." David okiyeualtsaku ika sen tepantli tilauak yejuan okipeualtij desde Milo niman otlamito hasta itech on palacio. 10 David más noueyilijtiaya ika ipoder pampa toTEKO Dios yejuan kipiya nochi poder iuan nemiya.
Hiram on rey de Tiro okintitlan itlajtojkauan itech David
11 Hiram, on rey de Tiro, okititlanilij David itlajtokauan yejuan uejueyixtokej. Niman no okititlanilij kojtli* de cedro, kojxinkej niman texinkej. Yejuamej okichijchiuilijkej ipalacio David. 12 Kemaj David okajsijkamat ika toTEKO melauak yokitlalij ken rey intech on israelitas. Niman no okitak ika toTEKO sanoyej okitiochiu ipan itekiu ken rey, pampa sanoyej kintlajsojtla on israelitas, itlapejpeniluan.
Oksekimej ikoneuan David
13 Sakin ijkuak David okis Hebrón niman oyaj Jerusalén, ompa okimpix oksekimej isiuauan niman itlakpasiuauan. Niman iminuan okimpix más ikoneuan, tlakamej niman siuamej. 14 Ijkin imintokatka ikoneuan David yejuan otlakatkej Jerusalén: Samúa, Sobab, Natán, Salomón, 15 Ibhar, Elisúa, Nefeg, Jafía, 16 Elisama, Eliada niman Elifelet.
David okintlan on filisteos
17 Ijkuak on filisteos okimatkej ika David yokikuatêkijkej ikan aceite niman okalaktijkej ken iminrey on israelitas, nochimej okitejtemotoj. Niman ijkuak David okimat ika okitejtemotoj, oniyan ne Jerusalén kampa kuajli tlatsakutok ikan tepantlib. 18 On filisteos oyajkej niman onochachantijkej imanian nochi on ixtlauatl itoka Refaim. 19 Kemaj David okitlajtoltij toTEKO, niman ijkin okijlij:
—¿Tikneki ma nikinuijsokiti on filisteos? ¿Tinechpaleuis para nikintlanis?
Niman toTEKO okijlij:
—Kemaj, xkinuijsokiti pampa nejua nimitspaleuis para tikintlanis.
20 Kemaj David oyaj Baal-perazim, niman ompa okintlan on filisteos. Yejua ika okijtoj: "ToTEKO onechtlapouilij ojtli intsajlan notlauelikniuan ken sen atl yejuan kipetla itentsaka on presa. Niman ompa okitokayotij Baal-perazimc. 21 On filisteos ompa okinkajtejkej iminídolos niman David iuan isoldados okinsentlalijkej niman okinmiktikej.
22 Pero on filisteos oksejpa onochachantitoj ipan nochi on ixtlauatl Refaim. 23 Niman David oksejpa okitlajtoltij toTEKO tlinon kichiuas, niman toTEKO okinankilij:
—Maka xkinmixnamiki imixpan ijkuak tikinuijsokis, yej xuiya inkuitlapan. Niman ijkuak tajsis intech on kojtin* de bálsamo, ompa peua xkinuijsoki. 24 Ijkuak tikakis ken chojcholojtiuij ikuatipan on bálsamokojtin*, nimantsin xkinuijsokiti pampa on kijtosneki ika nejua niau moyakapan para nikinmiktis on soldados filisteos.
25 David okichiu on tlen toTEKO okinauatij niman okintlan on filisteos, desde on ueyikalpan Gabaón hasta oajsikej ipan on ueyikalpan Geser.