3
On nouijsokilistli de ifamilia Saúl niman ifamilia David sanoyej ouejkau, pero ifamilia David más nokojtilitiaya niman ifamilia Saúl kipolojtiaya ipoder.Ikoneuan David yejuan otlakatkej ipan on ueyikalpan Hebrón
2 Itelpochuan David yejuan otlakatkej ijkuak nemiyaj ipan on ueyikalpan Hebrón, katkaj: Yejuan iachtojkoneu okitokayotij Amnón, yejuan ikoneu katka Ahinoam on jezreelita. 3 Yejuan ika ome okitokayotij Quileab, yejuan katka ikoneu Abigail yejuan isiuau katka Nabal yejuan ualeuaya ipan on ueyikalpan Carmel. Yejuan ika yeyi okitokayotij Absalón, yejuan ikoneu katka Maaca, yejuan ichpoch katka Talmai on rey de Gesur. 4 Yejuan ika naui okitokayotij Adonías, yejuan ikoneu katka Haguit. Yejuan ika makuijli okitokayotij Sefatías, yejuan ikoneu katka Abital. 5 Niman yejuan ika chikuasen okitokayotij Itream, yejuan ikoneu katka Egla, on yejuan okse isiuau katka David. In yejuamej ikoneuan David yejuan otlakatkej ijkuak nemiya ipan on ueyikalpan Hebrón.
Abner onosentlalij iuan David
6 Chika onkatka on nouijsokilistli de ifamilia Saúl niman David, Abner más kajsitiaya poder itech isoldados Saúl. 7 Saúl okipixka se itlakpasiuau itoka katka Rizpa yejuan ichpoch katka Aja, niman Abner onotekak iuan on siuatl. Yejua ika, Is-boset okixkomakak Abner niman okijlij:
—¿Tline otimotekak iuan itlakpasiuau notataj?
8 Niman Abner sanoyej okualan iuan on rey Is-boset, niman ijkin okijlij:
—¿Tline tinechita ken sen chichi* yejuan tekiti para Judá? Nejua hasta aman, yonikchiu nochi tlen kuajli para Saúl motataj, para ifamilia niman para itlajsojkaikniuan. Niman nejua xnimitstemaktilia itech David. ¿Aman tline tinechixkomaka ika oninotekak iuan sen siuatl? 9 ¡ToTEKO ma nechmaka ueyi castigo tla xnikpaleuiya David para nochiuas on tlen toTEKO onotlajtolmakak ika itokatsin. 10 Nejua nikchiuas para ikoneuan Saúl xok kalakiskej ken reyes. Yej niktlalis David para yejua yes iminrey on chanejkej Judá niman on yejuan chantij ne Israel, desde Dan hasta Beerseba!
11 Niman Is-boset xouel okinankilij Abner pampa kimakasiya. 12 Kemaj Abner okintitlan itlajtojkauan para ijkin ma kijlitij David: “¿Akinon kimandaroua in país tla xtejua? Ma tikchiuakan sen pacto*, niman nejua nikchiuas kanika para nochimej on israelitas san tejua ma mitstlakamatikan.”
13 Niman David okinankilij: “Kuajli, nikchiuas se pacto* mouan, pero nikneki tikchiuas in tlen nimitsijlis. Ijkuak tiuajlas, xnechajuikili Mical, ichpoch on rey Saúl, tlamo xnimitsselis.”
14 Kemaj David okintitlan itlajtojkauan itech Is-boset para ijkin ma kijlitij: "Xnechmaka Mical, nosiuau yejuan ipampa onikmiktij 100 filisteos, niman oniktemakak imincuerito yejuan kisa ikuatipan kampa tlapiasouaj para ouel iuan oninonamiktij."
15 Kemaj Is-boset otlanauatij para ma kitekuilitij Mical itech Paltiel, on iueuentsin, yejuan ikoneu katka Lais. 16 Pero Paltiel okitokak isiuau niman ochokatiaj. Okitokak ipan nochi on ojtli hasta oajsikej Bahurim. Kemaj ompa Abner okinauatij ma nokuepa ichan, niman Paltiel oyaj ichan.
17 Kemaj Abner okinnots on israelitas yejuan uejueyixtokej, niman okinmijlij: "Nemejuamej yeuejkaui nenkinektinemij para David yejua nemorey yes. 18 Aman tej, yoyejkok on tonajli para ijki nochiuas, pampa toTEKO okiprometeroj ika itechkopa David kimanauis on nación israelita inmak on filisteos niman inmak nochimej imintlauelikniuan."
19 Abner no okinnots on yejuan okiskej itech itribu* Benjamín. Kemaj oyaj Hebrón okijlito David nochi on tlen kinekiyaj kichiuaskej on israelitas niman on yejuan okiskej itech itribu* Benjamín. 20 Yejua Abner okuikak sempoajli tlakatl ne Hebrón kampa nemiya David niman, David okintlaluichiuilij. 21 Kemaj Abner okijlij David:
—Nejua ye niau nikominsentlalis nochimej on israelitas para ma kichiuakan sen pacto* mouan tejua ueyixtikaj rey, niman ijki titlamandaros ken tejua tiknekis.
Kemaj David ononauatij iuan Abner, niman Abner oyaj iyolika.
Joab okimiktij Abner
22 Kemaj oyejkotets Joab iuan isoldados David. Yejuamej oyajkaj otlauijsokitoj niman kuajkiyaj miyek tlajtlamach* yejuan okinkuilijkej imintlauelikniuan. Ijkuak Joab oyejkok, Abner xok ompa nemiya ne Hebrón, pampa David iuan yononauatijka niman yejua yoyajka iyolika. 23 Ijkuak Joab oyejkok iuan isoldados yejuan iuan uajlayaj, okijlijkej ika Abner, ikoneu Ner, okitlajpaloko on rey David niman okijlijkej ika iuan ononauatij on rey, kemaj oyaj iyolika. 24 Kemaj Joab oyaj okitato on rey David niman okijlij:
—¿Tline ijkon otikchiu? Ouajlaj Abner, omitstlajpaloko niman otikauilij iyolika ma uiya. 25 ¿Tlen xkimati tejua ueyixtikaj rey ika Abner, ikoneu Ner, ouajla san omitskajkayauako niman para otlastlakoko kenijki tlaojonkaj niman para okitako tlinon tikchiua tejua ueyi rey?
26 Ijkuak Joab otlan tlajtoua iuan David, okis oma niman okintitlan itlajtojkauan para ma kitejtemotij Abner, pero David xkimatiya tlinon kichijtikatka Joab. Abner yoajsika itech on atlaltekontli* yejuan onkaj ne Siria niman on itlajtojkauan Joab okichiualtijkej Abner para ma nokuepa. 27 Ijkuak Abner oajsik ipan on ueyikalpan Hebrón, Joab okinots Abner niman okuikak inakastlan on tsakuijlotl pampa nesiya ken san iselti kinekiya kinotsas. Pero yej, ompa okitsopinijtiaj ipan ijti niman okimiktij. Ijki tej, Joab okuepiltij Abner ika okimiktij Asael, ikniu. 28 Sakin ijkuak David okimat ika yokimiktijkej Abner, okijtoj: "ToTEKO kimati ika nejua niman yejuan nikinmadaroua xtikpiyaj tlajtlakojli pampa okimiktijkej Abner ikoneu Ner. 29 Joab niman nochi ifamilia yejuamej kipiyaj tlajtlakojli. Nochi ifamilia ma tlajyoui ikan ixikalistli, noso ikan on kokolistli itoka lepra, noso ma uijuilatikan, noso ma kinmiktikan, noso ma mayanakan."
30 (Joab niman Abisai, ikniu, okimiktijkej Abner, pampa Abner okimiktijka Asael, inmikniu. Okimiktij Asael inkikniu ipan on tlauijsokilistli yejuan onochiu ipan on ueyikalpan Gabaón.)
31 Kemaj David okinauatij Joab iuan nochimej on yejuan ompa nemiyaj ma kitetsayanakan imintlaken niman ma notlakentikan ikan ajmankatlakentli* niman ma kichokilikan Abner. On rey David yaya inkuitlapan on yejuan kuikayaj on mikatsintli Abner. 32 Niman Abner okitokakej ipan on ueyikalpan Hebrón. Kemaj on rey David opeu sanoyej chikauak choka itech on tlalkontli. Niman nochimej on yejuan ompa nemiyaj no ochokakej. 33 Kemaj David okuikatlalij Abner ika in kuikatl yejuan sanoyej teajman:
"¿Abner, tline otimik ken miki sen xkuajli tlakatl?
34 Xomitsmasasalojkej
nion xomitsikxisasalojkej.
Otimik ken miki yakaj
yejuan kimiktiaj on xkuajkualtin tlakamej."
Niman on tojlamej yejuan ompa nemiyaj sanken* kichokiliayaj. 35 Kemaj okijlitoj David para ma tlakua chika xe tlayoua. Pero David xokinek otlakuaj, niman okijtoj:
—¡Ma Dios nechcastigaro sanoyej tla nikua pan noso itlaj okse, ijkuak xe kalaki tonaltsintli!
36 Nochimej on tlakamej okimatkej tlinon okijtoj David niman okimpaktij. Melauak, nochi tlen yejua kichiuaya kimpaktiaya. 37 Ipan on tonajli nochimej on israelitas okimatkej ika on rey David xejua okichiu ika okimiktijkej Abner, ikoneu Ner.
38 Kemaj on rey David okinmijlij on itlapaleuijkauan: