Okimiktijkej on rey Is-boset
4
Ijkuak Is-boset, ikoneu Saúl, okimat ika Abner yomik ne Hebrón, sanoyej onomojtij niman nochimej on israelitas no sanoyej onomojtijkej. 2 Is-boset kipiyaya ipan itekiu omemej tlakamej yejuan tlayejkankej katkaj intech on tlachtekkej yejuan kintlachtekiliayaj imintlaluelikniuan. Se itoka katka Baaná, okse Recab. In tlakamej katkaj ikoneuan Rimón yejuan ualeua Beerot. On ueyitlalpan Beerot teuan nopouayaj ipan itribu* Benjamín, 3 pampa on achtoj chanejkej ne Beerot ocholojtejkej niman onochantitoj on kalpan Gitaim. Niman hasta aman ompa nemij ken yejuan xchanejkej.4 (Jonatán, ikoneu Saúl, kipiyaya sen ikoneu itoka katka Mefi-boset yejuan uilatsin katka de on ome ikxiuan. Mefi-boset kipiyaya makuijli xipan ijkuak ne Jezreel omachiyato ika Saúl niman Jonatán yomikkej. Ijkuak ijkon omachiyak, on siuatl yejuan kiskaltiaya Mefi-boset, okinapaloj niman iuan ocholojteu. Pero pampa on siuatl sanoyej isiutiaya, okuajtlajkal on tlakakonetl. Yejua ika Mefi-boset xueli kuajli nejnemi.)
5 Recab niman Baaná ikoneuan Rimón yejuan ualeuya Beerot, oyajkej ichan Is-boset niman oajsikej kanaj tlakualispan ijkuak sanoyej chikauak tona. Yejua ika, yejua kochiya ikalijtik. 6 On siuatl yejuan tlatlapouaya ipan on kajli, kajaniaya trigo, pero okajsik kochistli niman okoch. Yejua ika, Recab niman Baaná ikniu, ouel okalakkej niman xakaj okintak. 7 Ijkuak okalakkej ipan on kajli, Is-boset kochiya ipan itlapech. Niman yejuamej okimiktijkej, okechtsontekkej, niman okiktikej itsontekon. Yejuamej onejnenkej nochi yejuajli ipan on ojtli yejuan yau Arabá. Okiktikej itsontekon 8 para okimakatoj David ne Hebrón. Ijkin okijlijkej on rey:
—Ueyixtikaj rey, Xseli itsontekon Is-boset ikoneu Saúl, yejuan motlauelikniu katka niman mitsmiktisnekiya. Pero aman toTEKO yomitsmaktilij Saúl iuan ifamilia tejua ueyixtikaj rey, para xkintlakuepilti.
9 Niman David okinnankilij:
—Ixpan toTEKO yejuan yonechmanauij para maka itlaj xkuajli nopan ma nochiua, nemechmelajkaijlia: 10 “Ijkuak sen tlakatl onechijliko ika Saúl yomik, yejua kuitiaya kuajli tlinon onechijliko. Pero on tlen onechijliko xoniktlajsojkamachilij. Yej onikmiktij ne Siclag. Yejua on itlaxtlauil yejuan onikmakak ipampa on tlen onechijlij. 11 ¡Aman tej, nikpiya más tlinon ika para nemechchiuilis pampa xnenkuajkualtin tlakamej ika onenkimiktijkej sen kuajli tlakatl yejuan kochiya ichan! ¡Yejua ika tej, nemechkuepiltis imikilis on tlakatl! ¡Nemechmiktis para nemechpopolos ipan in tlaltikpaktli!
12 Kemaj David okinnauatij isoldados ma kimiktikan Recab niman Baaná, niman okinmiktijkej. Niman okintsontekilijkej inmauan niman iminikxiuan. Kemaj okinajkopilojkej nisiu kampa nosentlalia atl ne Hebrón. Niman itsontekon Is-boset, okitokakej ne Hebrón ipan itlalkon Abner.