David niman Betsabé
11
Se tonajli ipan atliuetskatlaj* ijkuak on reyes kisanij ontlauijsokij, David okititlan Joab iuan iueuejyitekiuajkauan niman nochi on soldados israelitas, niman okinmiktijkej on amonitas niman okiyejyeualojkej on ueyikalpan Rabá. Pero David uej onokau Jerusalén.2 Se tiotlaktipan David ouajnokuiteu ipan itlapech, niman chika nejnentinemiya tlapani ipan ipalacio, okontak sen siuatl sanoyej kualtetsin yejuan naltijtikatka. 3 David otlatitlan ma tlajtlanitij akin siuatl yejua, niman okilijkej ika itoka Betsabé, ichpoch Eliam, isiuau Urías yejuan hitita. 4 Kemaj David otlatitlan ma kuajuikilikan on siuatl, niman ijkuak okuajuikilijkej iuan onotekak. Kemaj on siuatl oyaj ichan. On siuatl ijkuakon kemach yonochipajka ika oyestemok.
5 Betsabé onokonean niman okimachistij David. 6 Kemaj David okinauatij Joab para ma kitekuitlani Urías, on hitita niman Joab ijki okichiu. 7 Niman ijkuak Urías oyaj itech David, yejua okitlajtoltij kenijki nemi Joab niman ken nemij isoldados. Niman no okitlajtoltij tlinon yonochiu ipan on nouijsokilistli. 8 Kemaj David okinauatij Urías ma uiya ichan, niman ma noikxipajpaka.
Ijkuak ouajkis ipan on palacio, on rey okititlanilij sen tlakuajli yejuan más kuajli ken sen tetlayokolijli*. 9 Pero Urías xoyaj ichan, yej okoch itech itsakuijlou on palacio, iminuan on soldados yejuan kitlapiyaj ipalacio David. 10 Ijkuak okijlijkej David ika Urías xoyaj ichan, David okijlij Urías:
—Youejkau tinemi ipan on nouisokilistli. ¿Yejua ika, tline xotiaj mochan?
11 Niman Urías ijkin okinankilij:
—On isoldados Israel niman isoldados Judá nemij ijtik kalmatsitsimej iuan iyekcaja toTEKO. Niman no, on notlayekankau Joab inuan molapeliuikauan yejuan tlayekankej sempantlan kochij. Tla ijkon, ¿Kenijki nejua uej nias nochan para nitlakuas, nitlaonis niman ninotekas iuan nosiuau? ¡Noueyi rey, ipampa monemilis, nejua xijkon nikchiuas.
12 Kemaj David okijlij:
—Tla ijkon, xmokaua aman, niman mostla nimitskauilis tias.
Ijkon tej, Urías onokau ne Jerusalén hasta uajmostla.
13 Kemaj David okitekuitlan para iuan otlakuaj, niman iuan otlaonik, niman ijkon okitlajtlauantij. Ijkuak otlapoyau, Urías okis niman okochito intech on soldados yejuan kitlajpiyaj ipalacio David, pero xoyaj ichan.
14 Uajmostla David okijkuilouilij Joab sen amatlajkuilojli niman sano Urías okiktilij. 15 Ipan on amatlajkuilojli kijliaya: "Xtlali Urías tlayakapan kampa más temojti on nouisokilistli, niman xkauakan iselti para ma kokokan niman ma miki”.
16 Ijkon tej, ijkuak Joab okiyeualoj on ueyikalpan para kuijsokis, okitlalij Urías kampa kimatstikatka nemij on soldados yejuan más uelij tlauijsokij. 17 Niman ijkuak on chanejkej ipan on ueyikalpan ouajkiskej para nouijsokiskej iuan Joab, okinmiktijkej sekimej isoldados David yejuan tlayekanayaj. Niman Urías teuan ompa omik.
18 Kemaj Joab otlatitlan para ma kimachistitij David on tlen onochiu ipan on tlajuisokilistli. 19 Niman okijlij on temachistijketl: "Ijkuak titlamis tikijlis on rey David nochi tlen onochiu, 20 manin kualanis niman mitsijlis: ‘¿Tline sanoyej onemonisiuijkej ijkuak onenkuijsokej on ueyikalpan? ¿Tlen xnenkimatij ika yejuamej uajtlamotlaj tlakpak ipan tepantli, 21 no ijki ken ijkuak ne Tebes se siuatl okimiktij Abimelec, ikoneu Jerobaal, ijkuak okuajtlajkal tlakpak sen tetl yejuan ika tlakuechouaj? ¿Tline tej, sanoyej onemonisiuijkej itech on tepantli?' Tla ijkon mitsilis, tejua ijkin tiknankilis: 'Niman Urías on hitita, yejuan motekitkau, no ompa omik.’"
22 On temachistijketl oyaj, niman ijkuak oajsik, nochi okitlajtlajtouilij David ken Joab okinauatij.
23 Ijkin okijlij David:
—Iminsoldados ouajkiskej, niman ouajlajkej para otechixnamikikoj ixpan on ueyikalpan. Yejuamej ye techtlaniyaj, pero otikintsinkixtijkej niman otikintojtokakej hasta ikalakiyan on ueyikalpan. 24 On tlakamej yejuan nemiyaj tlakpak ipan on tepantli, ika imintlaminaluan okinuajmotlakej mosoldados. Niman sekimej mosoldados yejuan tlayecanayaj omikkej, niman Urías teuan ompa omik.
25 Kemaj David okinankilij on temachistijketl:
—Tejua xyolchikau Joab, niman xkijli maka ma komatstia tlen onochiu, pampa ijki nochiua ipan nouijsokilistli. Pero xkijli para más chikauak ma kuijsokikan on ueyikalpan hasta kaman xxoxotonikan.
26 Ijkuak Betsabé okimat ika yomik iueuentsin, onajman niman okejeu on tonaltin ipampa imikilis Urías. 27 Sakin ijkuak yopanok on ajmantli, David otlatitlan ma kanilitij Betsabé, niman okuikilijkej ipan ipalacio. Kemaj okinosiuatij, niman okipiyalij sen tlakakonetl. Pero toTEKO xokipaktij on tlen David okichiu.