David onoyolpatlak ijkuak Natán okajuak
12
ToTEKO okititlan on tiotlajtojketl Natán para ma kitati David. Niman ijkuak Natán oajsik itech ijkin okijlij:—Ipan sen ueyikalpan nemiyaj omemej tlakamej. Se rico katka niman on se mayanki. 2 On rico kipiyaya miyek uakaxtin niman borregos, 3 pero on mayanki uej kipiyaya, san se borreguita yejuan okojka niman yejua okiskaltij. On borreguita onoskaltij itech on mayanki niman iuan ikoneuan. Kikuaya tlen yejua kikuaya, atliya kampa yejua atliya, niman kochiya iyelpan. ¡On tlakatl kitlajsojtlaya* ken yakaj ichpoch! 4 Se tonajli oyejkok sen tlakatl ichan on rico, pero yejua xokinek okimiktij sen iborrego noso sen iuakax para kichijchiuilis tlakuajli on itenotskau. Yej okichtekilij iborreguita on tlakatl yejuan mayanki, para okimakak niman okitlakualtij on itenotskau.
5 David sanoyej okualan itechkopa on tlakatl, niman okijlij Natán:
—¡Ninotlajtolmaka ika itokatsin Dios, ika on tlakatl yejuan ijkon okichiu, kitocaroua mikis! 6 ¡Niman ika onkaj kitlaxtlauas naupa ichkich kech ika patioj on borreguita, pampa xokiknelij* on mayankatlakatl!
7 Kemaj Natán okijlij David:
—¡On tlakatl, sano tejua David! Niman toTEKO, iminDios on israelitas ijkin kijtoua: "Nejua onimitstlapejpenij para tirey yes intech on israelitas niman onimitsmanauij imak Saúl. 8 Onimitsmakak ipalacio niman isiuauan moteko Saúl, niman no, on reino de Israel iuan Judá. Niman tla in tikita xmiyek, nimitsmakaskia okseki más tlajtlamach*. 9 ¿Tline tej xotiktlakamat notlanauatil niman otikchiu tlen xnikuelita? Otikmiktij Urías on hitita, inka otimotlamij on amonitas para ouel okimiktijkej niman otikmoyaxkatij isiuau. 10 Yejua ika tej, desde aman, nochipa onyas tlauejli niman mikilistli ipan mochan, pampa xipan otinechitak yej otikmosiuatij isiuau Urías on hitita. 11 Aman nejua, moTEKO, ijkin nimitsmachistia: 'Nikchiuas para on tlen xkuajli sano mofamilia ma mitschiuilikan. Niman mixpan sano nejua nikintilanas mosiuauan, niman nikinmakas semej mokoneuan para inuan notekas ijkuak tlajoka. 12 Tlen tejua otikchiu san ichtaka, nejua nikchiuas inmixpan nochimej on israelitas niman nikchiuas ijkuak tlajoka para nochimej kitaskej.’”
13 Kemaj David okijlij Natán:
—Yonitlajtlakoj itech noTEKO.
Niman Natán okijlij:
—Tejua xtimikis pampa toTEKO yomitstlapojpoluij. 14 Pero pampa sanoyej otikualanij toTEKO, on mokoneu yejuan kemach otlakat, ika onkaj mikis.
15 Niman ijkuak Natán onokuep ichan, toTEKO okichiu para ikoneu David yejuan okipix iuan isiuau Urías sanoyej ma kualo. 16 Kemaj David opeu sanoyej kiknotlajtlanilia Dios ipampa on konetsintli, niman opeu nosaua. Cada tlayojua sa onoya ipan tlajli nochi se yeuajli. 17 On uejueyi tlayekankej yejuan chantiyaj ipan on palacio, kiyemankatlajtlaniliyaj ma nokuiteua ipan tlajli, pero yejua xokinek, nion xotlakuaj imiuan.
18 Ipan chikome tonajli omik on konetsintli, niman itekitkauan David nomojtiayaj kijliskej, pampa ijkin kijtouayaj: "Tla ijkuak on konetsintli nemiya, tiknotsayaj niman xkinekiya techkakis, ¿Aman kenijki tikijliskej ika yomik? Uelis kichiuas itlaj tlen xkuajli.”
19 Pero ijkuak David okintak itekitkauan ika sa ichtaka tlajtlajtouayaj, okajsikamat ika on konetsintli yomik. Niman ijkin okintlajtoltij:
—¿Yomik on konetsintli? Yejuamej okinankilijkej:
—Kemaj yomik.
20 Kemaj David onokuiteu ne ipan tlajli, onaltij, onajuiyalij niman onotlakempatlak. Kemaj okalak ipan itiopan toTEKO para okimauistilij. Sakin oyaj ichan, otlajtlan tlakaujli niman otlakuaj. 21 Kemaj itekitkauan okitlajtoltijkej:
—¿Tline ijkon tikchiua, tejua ueyixtikaj rey? Ijkuak on konetsintli xe mikiya, tejua timosauaya niman tichokaya ipampa. Niman aman ika on konetsintli yomik, ¡Yotimokuiteu niman yej timotlalia titlakua!
22 David okinnankijlij:
—Ijkuak on konetsintli xe mikiya, nejua nichokaya niman ninosauaya, pampa niknemiliaya nechiknelis toTEKO, niman kauiliskia ma nemi on konetsintli. 23 Pero aman ika yomik, ¿sa tlen para ninosauas? Nejua xniuelis nikchiuas ma yoli. ¡Nejua nias niman iuan ninosentlalis kampa nemi, pero yejua xok uelis uajlas nikan nouan.
Otlakat Salomón
24 Kemaj David okiyoltlalitoj Betsabé on isiuau. Onotekak iuan, niman yejua okipix se ikoneu yejuan David okitokayotij Salomón. ToTEKO okitlajsojtlak in konetsintli 25 niman okimachistij David itechkopa on tiotlajtojketl Natán para kitokayotis on konetsintli Jedidías.
David okinoyaxkatij* Rabá
26 Chika kuakon, Joab kuijsokiya on ueyikalpan amonita de Rabá, niman ijkuak ye kinoyaxkatiskia kampa nemiya on rey, 27 otlanauatij ijkin ma kijlitij David: “Nejua yonikuijsok Rabá, niman yoniknoyaxkatij on ueyikalpan kampa keuaj atl. 28 Yejua ika noueyi rey, xkinsentlali nochimej mosoldados, niman xkuijsoki on ueyikalpan. Xmoyaxkati, para maka nejua ma nikchiua niman kitlaliliskej notoka.”
29 Kemaj David okinsentlalij nochimej isoldados, niman oyaj okuijsokito Rabá niman okinoyaxkatij* on ueyikalpan. 30 Kemaj okuik ipan itsontekon on rey on corona de oro, yejuan kipiyaya temej kualtsitsimej niman yetik kakta 33 kilos. Kemaj okitlaliltijkej David. David okixtij no de on ueyikalpan miyek tlajtlamach* tlen patioj, 31 niman on chanejkej yejuan sanken* ompa nemiya ipan on ueyikalpan. Okinkixtij ompa niman okintekitiltij ikan sierras niman ikan picos niman hachas, niman no ipan on hornos okichijchijkej tabiques. No ijki okichiu inuan on chanejkej yejuan chantiyaj ipan nochimej on inueyikalpanuan on amonitas. Niman kemaj onokuep Jerusalén iuan nochi isoldados.