Amnón iuan onotekak Tamar
13
Absalón, itelpoch David, kipiyaya se ikniu yejuan sanoyej kualtetsin katka yejuan itoka katka Tamar. Niman Amnón, okse itelpoch David, sanoyej okuelitak niman okinek Tamar on itlakpaikniu, 2 hasta okualotlak ika sanoyej kinekiya. Tamar xe kaman yakaj tlakatl iuan notekaya, niman Amnón xkinextiliaya kenijki itlaj kichiuilis. 3 Pero Amnón kipiyaya se iprimo yejuan sanoyej kimatiya ken tlakakayaua, itoka katka Jonadab. Yejua katka ikoneu Simea, yejuan ikniu David. 4 Se tonajli okitlajtoltij Amnón: —¿Tlinon mopan nochiua tiikoneu on rey? ¿Tline nesi cada mojmostla más titlanautiu? ¿Xtinechtlajtlajtouilis?
Amnón okinankilij:
Nejua nikuelita Tamar, ikniu Absalón.
5 Kemaj Jonadab okijlij:
—Xmotekati ipan motlapech niman xchiua kitl tikualo. Niman ijkuak yas motataj David mitsontas, xkijli: “Por favor, xkuajtitlani nokniu Tamar para ma nechtlakualtiki, niman ma nechchijchiuili itlaj tlakuajli nikan, para ijki nejua nikitas niman nikuas on yejua nechmakas."
6 Yejua ika, Amnón onotekak ipan itlapech niman onochiu kitl kualo. Niman ijkuak on rey okitato, Amnón okijlij:
—Nimitstlajtlanilia para ma uajla nokniu Tamar niman nikan ma nechchijchiuili ome memelatsin, niman yejua ma nechtlakualti.
7 Kemaj David okintitlan itlajtojkauan ichan Tamar para okijlijtoj:
—Xuiya ichan mokniu Amnón, niman xchijchiuili tlakuajli para ma tlakua.
8 Tamar oyaj ichan Amnón kampa yejua onoya. Niman sa no ompa kampa Amnon ueli kitaya, Tamar okimaxakualoj harina, okuektlalij niman okikxitij. 9 Kemaj okonkuik on sartén niman ompa okitlalilij on memelatsitsimej, pero Amnón xokinek otlakuaj. Kemaj okinnauatij on yejuan ompa nemiyaj ma uajkijsakan. 10 Ijkuak nochimej yokiskej, Amnón okijlij Tamar:
—Xkuaki nikan on tlakuajli kampa nejua nikochi niman xnechtlamaka.
Tamar okonkuik on memelatsitsimej yejuan yokichijchijka, niman okiktilij ikniu Amnón. 11 Pero ijkuak Tamar ononisiuij itech Amnón para okimakak itlakual, yejua okajsik, niman okijlij:
—Xuajla noknijtsin, niman xmoteka nouan.
12 Tamar okinankilij:
—Ka, nokniu, maka xnechpijpinajti, pampa nikan ipan totlalpan Israel xijki nochiua. ¡Maka xchiua on tlen sanoyej xkuajli! 13 ¿Kanon nias ika in nopinaualis? Niman tejua, mitsitaskej ipan nochi Israel ken sen xompayejyeua. Nimitstlajtlanilia para xtlajto iuan on rey, niman yejua xnonenekis para mouan ninonamiktis.
14 Pero Amnón xokinek okak, niman pampa más kojtik kakta xken Tamar, okichiualtij para iuan ma noteka. 15 Pero sakin Amnón sanoyej okimat tlauejli itechika. Más okitlauelitak xken ijkuak kinekiya. Kemaj okinauatij:
—Xmokuiteua niman xuiya.
16 Tamar okinankilij:
—¡Ka nokniu, pampa tla tinechtotoka de nikan más ueyi tlajtlakojli yes, xken on yejuan yotinechchiuilij!
—Xkixti in siuatl de nikan niman kuajli xtsakua on tsakuijlotl.
18 On itlakeual okixtij Tamar ne kiauak, niman kuajli okisaku on tsakuijlotl. Tamar kitlalijtiaya sen ueyak tlakentli* yejuan sanoyej kualtsin, tlakentin yejuan kitlaliayaj on ichpochuan on rey. 19 Yejua okitsayan on ueyak tlakentli* yejuan kitlalijtiaya, onoxinilij tlikonextli ipan itsontekon, niman onixtlapachoj ika imauan, niman kemaj oyaj ochokatiaj ipan ojtli.
20 Kemaj Absalón, ikniu, okitlajtoltij:
—¿Tla ijkon, mokniu Amnón yejua ijkin omitschiuilij? Tla ijkon, maka tikteijlis nokniu pampa yejua mokniu. Maka sanoyej xkomatstia in tlen onochiu.
Ijkuak Tamar onotak iselti, onokau ichan ikniu Absalón. 21 Ijkuak on rey David okimat on tlen onochiu, sanoyej okualan. Pero xokajuak ikoneu Amnón pampa yejua kakta iyenkuiyokoneu yejuan sanoyej kinekiya. 22 Absalón xitlaj* okijlij Amnón, maski sanoyej kitlauelitaya pampa ika onajauiltij ikniu Tamar.
Absalón okimiktij Amnón
23 Ipan ome xipan, itlakeualuan Absalón kinximiliayaj iborregos ne Baal-hazor, nisiu on kalpan de Efraín, niman Absalón okintekuitlan nochimej itelpochuan on rey para tlakuaskej iuan. 24 No okitato on rey, niman okijlij:
—Notlakeualuan kinxintokej noborregos. Nikneki para tejua niman molapeliuikauan xnemikan nouan ipan on iluitl yejuan nikchiua.
25 Pero David okinankilij:
—Ka, nokoneu, xuelis tiaskej tinochimej. Xnikneki timitsmakaskej sanoyej ueyi tekitl.
Niman maski Absalón sanoyej okitlajtlanilij para ma uiya, David xokinek oyaj, pero okitiochiu. 26 Kemaj Absalón okijlij:
—Tla tejua xuelis tias, nimitstlajtlanilia ma uiya nouan nokniu Amnón.
Niman David okitlajtoltij Absalón:
—¿Tline tikneki ma uiya mokniu Amnón?
27 Pero Absalón sanoyej okitlajtlanilij. Yejua ika, on rey onokalaktij para Amnón ma uiya niman oksekimej itelpochuan. Absalón yokitlalijka miyek tlakuajli ken para se rey. 28 Niman yokinnauatijka itlakeualuan: “Xkitakan, ijkuak Amnón yotlauan niman ijkuak nemechijlis xmiktikan, xmiktikan. Maka xmojmojtikan para nenkichiuaskej pampa nejua nemechnauatia. Aman tej, xmoyoleuakan niman xmoyolchikauakan.
29 Yejua ika, okitlakamatkej itlanauatil Absalón, niman okimiktijkej Amnón. Ijkuak on oksekimej itelpochuan on rey okitakej yokimiktikej Amnon, otlejkokej ipan iminmulas niman ocholojtekej.
30 Ijkuak sanken* nemiyaj ipan ojtli, David okak kitl “Absalón nochimej yokinmiktij itelpochuan, niman kitl xakaj onomanauij”. 31 Kemaj on rey ouajnotelkets, okitsayan itlaken pampa sanoyej onajman niman onotlajkal ipan tlajli. Nochimej on itekitkauan yejuan ompa nemiyaj no okitsayankej imintlaken. 32 Pero Jonadab, itelpoch Simea yejuan ikniu David, okijtoj:
—No rey, maka xnemili tla nochimej yokinmiktijkej motelpochuan. San Amnón okimiktijkej, pampa ijki yokijtojka Absalón on tonajli ijkuak Amnón ika onauilitij ikniu, Tamar. 33 Yejua ika, maka xneltoka norey tla nochimej motelpochuan omikkej. San mokoneu Amnón yomik.
34 Chika Absalón cholouaya, on soldado yejuan tlacuidarouaya, ontlachix uejka niman okintak miyekej tlakamej uajtemouayaj ipan on ojtli de Horonaim, ipan inakastlan on tepetl. Kemaj on soldado yejuan tlacuidarouaya okijlito on rey ika okintak tojlanmej tlakamej uajtemotiayaj ipan on ojtli de Horonaim. 35 Niman Jonadab okijlij on rey:
—Ye uajlajtokej mokoneuan norey ijkon ken nejua yoniknemilijka.
36 Ijkuak kemach otlan tlajtojtikatka, oyejkotetskej itelpochuan on rey, niman opeu sanoyej chokaj. On rey niman on itekitkauan no sanoyej chokayaj.