Joab ouel okichiu para ma nokuepa Absalón
14
Joab, ikoneu Sarvia, kimatstikatka ika on rey sanoyej kinekiya kitas Absalón. 2 Yejua ika otlanauatij ma kanatij sen siuatl de Tecoa yejuan sanoyej kimatiya ken tlakajkayaua. Okijlij: “Xmochiua kitl sanoyej timajmana. Xmotlakenti ken yakaj yejuan yomik, niman maka xmotlalili on ajuiyalistli, para tinesis sen siuatl yejuan sanoyej youejkau ika kichokilia sen mikatsintli. 3 Kemaj xuiya ixpan on rey niman tikijlis ken nimitsijlis."Kemaj Joab okijlij on tlen kitlajtlajtouiliskia David. 4 On siuatl de Tecoa oyaj okitato on rey, niman onotlakuantelkets ikan miyek tetlakaitalistli, niman onopachoj hasta ipan tlajli. Niman okijlij:
—Xnechpaleui norey.
5 David okijlij:
—¿Tlinon mopan nochiua?
Yejua okinankilij:
—Nejua nikauajli pampa noueuentsin yomik. 6 Ome nokoneuan yejuan nikimpiyaya onouijsokej ipan tepetl, niman pampa xakaj okinxeloj, se okokoj ikniu niman okimiktij. 7 Niman aman nochi nofamilia nechtlauelita niman kinekij ma nikinmaka nokoneu yejuan okimiktij ikniu para kikuepiltiskej imikilis on yejuan okimiktijkej niman ijkon kixtiskej on yejuan kiseliskia on herencia. Nokoneu kenon sa ika nochi tlixochtli yejuan nikpiya. San yejua notech yonokau. Tla kimiktiskej, notlixoch seuis niman noueuentsin xok kipiyas nion se ikoneu yejuan kiktis itoka ipan in tlaltikpaktli.
8 Kemaj on rey okinankilij on siuatl:
—Xuiya mochan. Nejua nikitas ken timitspaleuis.
9 On siuatl okinankilij:
—Norey niman noteko, tla yakaj kinomamaltis tlajtlakojli, ma niknomamalti nejua niman ifamilia notataj, pero maka tejua noueyi rey nion mopaís kipiyas on tlajtlakojli.
10 Niman on rey okinankilij:
—Tla yakaj mitsmomojtia, xnechajuikili niman xok kaman mitspajsolos.
11 Pero yejua oksejpa okijlij:
—Nimitstlajtlanilia norey, xmotlatlauti ixpan moTEKO Dios, para on nofamilia yejuan kinekij kikuepiltiskej imikilis nokoneu, maka yej no kimiktiskej on okse nokoneu.
Niman on rey okijlij:
—Ninotlajtolmaka ika itokatsin Dios yejuan nemi, ika nion se itson mokoneu xuetsis ipan tlajli.
12 Pero on siuatl oksejpa okijlij:
—Xnechkauili norey motekitkau, ma nimitsijli sa se tlajtojli.
On rey okijlij:
—Xkijto.
13 Kemaj on siuatl okitlajtoltij:
—¿Tline tej, tiknemilia noueyi rey ijkin tikchiuas in tlen xkuajli intechika itlapejpeniluan Dios? On tlen sano tejua yotikijtoj, nesi ika tikpiya tlajtlakojli pampa xtikneki ma nokuepa mokoneu yejuan ocholoteu. 14 Melauak tikmatstokej ika tinochimej timikiskej, Tejuamej kenon atl yejuan toyaui ipan tlajli, niman xueli oksejpa nosentlalia. Pero Dios xkixtilia yakaj inemilis, yej kichiua para on yejuan uejka yoyaj makasa ma nemi uejka de yejua. 15 Aman tej, tla nejua oniuajlaj mixpan para onimitsijliko nochi yejua in noueyi rey niman noteko, pampa nochi on tlakamej onechmomojtijkej. Yejua ika, nejua nimotekitkau oniknek nimitsnotsas para nikmatis, tla norey kinekis kichiuas tlinon oniktlajtlanilij. 16 Oniknemilij: “Tla noueyi rey nechkakis, nechmanauis de on tlakamej yejuan kinekij techpopoloskej nejua iuan nokoneu de ipan in tlajli Israel yejuan toTEKO Dios onechmakak.” 17 In motekitkau kicha tlinon kijtos noueyi rey para ninokauas noyolika, pampa noueyi rey ueli kimati on tlen kuajli niman on tlen xkuajli, ken yakaj iángel Dios toTEKO¡ Ma toTEKO Dios ma nokaua mouan noueyi rey!
18 Kemaj on rey okinankilij on siuatl:
—Nimitstlajtlanilia maka itlaj tinechiyanilis de on tlen nimitstlajtoltis.
On siuatl okinankilij:
— Xtlajto noueyi rey.
19 Kemaj on rey okitlajtoltij:
—¿Tlen xmelak Joab omitsajtitlan para tinechijlis nochi in tlajtlamach*?
On siuatl okinankilij:
—Ninotlajtolmaka ika itokatsin Dios ika on tlen yotikijtoj noueyi rey melauak. Kemaj, Joab motlapaleuijkau, onechnauatij ma niuajla, niman no onechijlij nochi tlinon nikijtoskia. 20 Pero okichiu para ma nopatla on ken aman tlaojonkaj. Noueyi rey sanoyej tlamatki* ken yakaj iángel Dios hasta nochi kixmati tlen nochiua ipan topaís.
21 Más sakin* on rey okijlij Joab:
—Xkita, nikchiuas on tlen yotikijtoj. Xuiya niman xkijliti Absalón ma uajla.
22 Kemaj Joab onotlakuantelkets niman onopachoj hasta ipan tlajli ika miyek tetlakaitalistli. Okitlajtlani Dios ma kitiochiua on rey niman okijlij:
—Aman yonikitak ika noueyi rey paki notech pampa yejua yokichiu tlinon nejua onikijtoj.
23 Kemaj Joab onotelkets niman oyaj Gesur para okanato Absalón, niman okuikak Jerusalén. 24 Pero on rey otlanauatij para ma tlamelaua ichan niman maka ma uiya ixpan. Yejua ika, Absalón oyaj ichan niman xokitak on rey.
25 Ipan nochi intlalpan on israelitas xakaj nemiya okse tlakatl yejuan kualtsin tlajtlachaya ken Absalón. Yejua ika, sanoyej kitlakaitayaj. Desde ipan ikxipalko hasta itsontekon xitlaj* kipiyaya on tlen xkuajli. 26 Yejua noximaya cada itlamiyan on xipan pampa itson kipajsolouaya . Ijkuak onoxin, itson yetik katka más de ome kilo ijkon ken tlatemachiuaj itech on rey. 27 Niman Absalón kipiyaya yeyi tlakakokonej niman se isiuakoneu yejuan itoka kakta Tamar. Yejua sanoyej kualtetsin kakta.
28 Ijkuak Absalón okajxitij ome xipan ne Jerusalén, niman xueliya kitaya itataj, 29 yejua otlatitlan ma kinotsatij Joab para ma uiya ma kitati on rey ipampa. Pero Joab xokinek oyaj. Kemaj ika okpa okitlajtlanilij ma uiya, pero Joab oksejpa xokitato. 30 Kemaj Absalón okinnauatij itlakeualuan:
—Xkitakan, imijla Joab onkaj nisiu kampa noyaxka, niman ompa okitokak cebada. ¡Xuiyan niman xtlatikan!.
On itlakeualuan oyajkej niman okitlatijkej imijla Joab. 31 Joab amanaman oyaj ichan Absalón niman okitlajtoltij:
—¿Tline motlakeualuan oyajkej onechtlatilitoj nomijla kampa oniktokak cebada?
32 Absalón okinankilij:
—Pampa onimitsontekuitlan para xuajla, niman xotiuajlaj. Nejua nimitstitlaniskia xkitati on rey niman tiktlajtoltiskia tline onechkixtij ne Gesur. Más kuajli yeskia tla ompa ninokauaskia. Nikneki nikchiuas itlaj para niuelis nikitas on rey. Niman tla nikpiya tlajtlakojli de itlaj, ma nechmiktij.
33 Kemaj Joab oyaj okijlito on rey nochi ken okijlij Absalón. Niman David okitekuitlan. Ijkuak Absalón oajsik ixpan on rey onotlakuantelkets niman onopachoj hasta ipan tlajli, niman David okitenkuaj*.