Mélígnam Yí:laːnyídé
(Mark 3ː13-19; Luk 6ː12-16)
10
Bí bíkkol luyírsuné yí:laːnyídém bíkkodoːpé goggeːla aiman yallom ménnennadoːpélaː takam mosimolaːmanamémna kinamém ésaːmolaːdokupé ilang-gílangém bulum bito. 2 Séːbulu édé mélígnam yíːlaːnyídok aminkídíːdéː lupoːdanna, Simon (séːkom Pitor émdoji) odokké bík bíro Andriu; Jebediké ao Jems, odokké bík bíro Jon; 3 Pilibbíːlaː Bartolumiu; Tomasbíːlaː murkong urné Motiːbí; Alpauské ao Jems, odokké Taddausbí; 4 Jilot émnam Simonbí odokké Iskortia Juda:bí, séːko bím yadla-kopakto.Yíːlaːnyídok Agerdé
(Mark 6ː7-13; Luk 9ː1-6)
5 Kéíkké luyírkídíːdém luge:la Jisubí yí:laːnyídém mélenníktoː "Jiudiman taniːkídíːdok araːdoːpélaː Somoriakídíːdok taonnoːpé gíaːyo. 6 Émpigeːla Israelsok yogné meːrkídíːdoːpé gílang. 7 Odokké gíla lugoːbita, 'Tayéng-among migomdokodé aninkaːbo.' 8 Kinném ésaːmolangku, sinném turmolangku, séːkobulum ngero-roːla léːtang bulum naréːmolangku, uiːyém ménnennang. Arrém bimap nolu pa:tag, arrém lamap bilang. 9 Noluk ígíng jinrékkídíːdo, aíném, murkongém manggom, aro-adinnok anír-murkongém bomyok; 10 lambédok légaːpé sogéném bomyok, galugémsin bomsedyok, létagmanggom tukuném bomsedyok. Bulu okkom lagidagji édém ager-gerném biparuːyé.
11 Nolu édílo taonkolomanggom doːlungkolo gíadon; odo aré kané taniːkoném magappoːlang odokké gíkuma:doːpé bík okumíːdo duːlang. 12 Nolu okumkolo gíaːdoém, noluk asin-aséngém bilang. 13 Okumdé pangkanmílo, noluk asin-ansíngé odo dungka:langka, odokké pangkanmaːmílo, noluk asin-ansíːdé nolukkoloːpé gíladyéku. 14 Séːkoi nolum boríksuma:mílo odokké noluk agomém tadmaːmílo, édílo nolu édé okumdém manggom taondém mépagla gídokuji noluk lékamém lépaksulang.a 15 Ngo nolum arodém lubidung, kébangém baːdo longédo Sodomdéːla Gomorraːdé édé nogordémyang ayangém paːyaːyé."
Ipusire Aːdobo
(Mark 13ː9-13; Luk 21ː12-17)
16 "Meːr kísapé ngo nolum lampiyangkídíːdok araːloːpé mélennígdung. Odok-légaːpé tabbémpé larrang odokké pékkémpé kinsumanép-ilang. 17 Totsulduːlang; kapéné taniːyé nolum doːlung kébangkídíːdo tolígyé odokké buluk murong-okumkídíːdo nolum díːyé. 18 Ngok légaːpé nolum amoːruːtumkídíːdoːpélaː migomkídíːdoːpé soabomyé, édé bulumna Jiudiman taniːyém tatpon lutaddém lubikunamkopé iyé. 19 Édílo bulu nolum kébaːbangkoloːpé gíaboyen, okkom luyyan odokké kapé luyyan émna méːdíryok. Nolu okkom lupénammén odo ayírdo nolum biyé. 20 Kapéné noluk lupénam agomdé nolukkémang, édébulu noluk Abuké Yalodokké gíyé odokké nolukkoki luyé.
21 Bírro bírrom sidoːpé yadla-kopagyé, odokké abudé bík aoːdém; ommangkídíːdé buluk ané-abu kekonpé dagrobyé odokké bulum sikoloːpé níːlígyé. 22 Ngok légaːpé appíng taniyé nolum tayumyé, émpigéːla séːko léddardoːpé dagrasula duːyaryéji bíːpag moturkunamém paːyé. 23 Édílo bulu nolum taonkolo ipusireyéji, akon taonnoːpé duglang. Ngo nolum arodém lubidung, nolu Israeldok nogor appíːdo noluk agerém geramaːdodoi Taniːké Aoːbí gíladyéku.
24 Luyírsunné bím luyírnédém bottéyaːmang, pagbokoné bík ruːtumdém bottéyaːnémang. 25 Luyírsunébí bím luyírnémé gésulaːnamdéi bíkképé píːdag, odokké pagbodé bík ruːtumdém gésunamdé. Okumdok ruːtumdém Beljebub émmílo, bík okum-éraːdok taniːkídíːdém éddík aiman aminki gogyénǃ"
Séːkom Pésopénamén
(Luk 12ː2-7)
26 "Édémpila tani:yem pésoyok. Okkom su:pag takkomna léːtang édém kubgeyambiyéku, odokké kinpíːmaːnam appíngém kinabmoyéku. 27 Ngo nolum okkom kémodo lubiduji, nolu édém longé pía:do lubilang; okkom noluk yeru:do písípasapé lubituːji; édém selab tayéːlokké lugoːbilang. 28 Séːkobulu adin-amírém mokelaːdagji émpigeːla iji-yallom mokelaːmaːji bulum pésoyok. Édémpimap Ruːném pésolang séːko adin-amírméla iji-yalo annyipaksém ui-amoːbo mokelaːdagji.b 29 Péksarung píryinkoném murkong-anírkolo koma:nei? Émgom bulukkolok apirkosin noluk Abuké kinmaːpé amoːlo oledmang. 30 Noluk tukkudok dumíd appíːdém sabamtag. 31 Édémpila pésoyok; nolu bojéruːngko paksarungémyang arré kaya:dag."
Jisumé Lupagnam
(Luk 12ː8-9)
32 "Séːkobí ngom taniː kanggaːlo ludesuyéji, ngo:sin bím ngok tayéng Abuké kanggaːlo ludesubiyé. 33 Émpigeːla séːkobí ngom taniːkanggalo lupaksu:yéji, ngo:sin bím ngok tayéng Abuké kanggaːlo lupaksu:yéku.
Asin-Ansíngmang, Émpigeːla Yoksé
34 Ngo mo:písoːpé asin-ansíngém bombila gídung émna méːyok. Ngo asin-ansíngém bombikolo gímang, émpigeːla yoksakopag bombitag.c 35 Abudok kekonpé aoːdé, anédok kekonpé omédé, ayodok kekonpé yaméːdé daksaːdopé ngo gídung, 36 bík aíké okum-érang taniyé taniːkolok mirupé iyé.'
37 Séːkoi bík ané-abudém ngomyang aipé-méːyaːdagji bí ngokkol luyírsunépé ilaːmang; séːkoi bík ommangém ngomyang aipé-méːyaːdagji bí ngokkol luyírsunépé ilaːmang; 38 odokké séːkoi bík aíké kurusdém joːsula ngok lédulo gíma:yéji bí ngokkol luyírsunépé ilaːmang. 39 Séːkobí bík turnamdém paːtag émna méːsu:yéji bíkkédé yogyé, odokké séːkké ngok légaːpé bík turnamdé yogyéji bí édém paːyérung."
Amankídíng
(Mark 9ː41)
40 "Séːkobí nolum boríksudagji bí ngom boríksudag, odokké séːkobí ngom boríksudagji bí ngom mélígnédémsin boríksudag. 41 Séːkoi lungor-lunékoném bí lungor-lunéko émna boríksudagji bí lungor-lunékolok amanko paːyérung; odokké séːkoi arolok-duːnékoném bí arolok-duːnéko émna boríksudagji bí arolok-duːnékolok amanko paːyérung. 42 Odokké séːkoi ansín asi batiouko séː ajjiːnékídíːsok a:koném biyeji bí ngokkol luyírsunéko émna, ngo nolum arodém lubidung, bí aroruːpé amanko paːyérung."