Jisubí Yéːné Taniːkoném Ésaːmotoku
(Mark 2.1-12; Luk 5.17-26)
9
Jisubí ollungkolo saːla kongkolangkula bík aíké taonpé gítoku. 2 Odokké kangkítok, taniːékké bíkkodoːpé, asupkolo kédla duːné yéːné taniːko gíbodo. Odokké édílo Jisubí buluk méːjíksunamdém kaːton, bí yéːné taniːdém luto, "Aoːa, nok asiném kínggítok; nok paːbém méːyinsubitagbo."3 Odo luro luyírné ékké bulu aíkídí:dém aíém lusuto, "Séː tani:séː Ruːnémé lukaːduːma:langǃ"
4 Buluk asin mé:namdém kinge:la, Jisubí luto, "Kapila nolu aisíːmaːném asin ara:do méːnggola duːdon? 5 Okodé lupé lupoyaːdangː 'Nok paːbém mé:yinsubitagbo' émnamdé:yé, 'Darobge:la lambégítok émnamdé'? 6 Odo nolu kinyépé mo:písok tayéːso Tani:ké Aoːké paːbém méːyinsubilaːnan ilang-gílangé dung émnamdém." Odokké bí yéːné taniːdém luto, "Daroptok, nok asubdém la:sangge:la okumpé gíkangku."
7 Taniːdé daropkang odokké okumpé gíkangku. 8 Édílo gíkumsunékídíːdé édém kaːton; bulu pésokang; odokké édémpin ilang-gílangém taniːyém bitung émna bulu Ruːnémé luyitsuto.
Jisubí Motiːmé Gognam
(Mark 2ː13-17; Luk 5ː27-32)
9 Jisubí odokké gíla du:dodém, Moti émnam taniːkoném bí ka:to séːko murkong urko tebuldo tedgabla dungngan. Bí bím luto, "Ngok lédulo gímíntok."
Odokké Motiːbí darobla bík lédulo gímínkang.
10 Édílo Jisubí Motiːké okumdo yumé apin dola dungngan, bojéruːngko murkong urnélang "imurné" gíla bíkkélang bíkkol luyírsunékídíːdok lédílo dojonsuto. 11 Édílo Parosikídíːdé édém kaːton, bulu bíkkol luyírsunékídíːdém tauto, "Kapila noluk luyírnébí murkong urnélang 'imurnékídíːdok' lédílo dojonsudun?"
12 Édém tatpaːsuge:la, Jisubí luto, "Ésa:ném kinam-kaːbíném lagimang, émpigeːla kinnémpak lagidag. 13 Gílangkula odok légíːdém kinpoːtakuː 'Ngo ayangém paːlíːdag, ngom palígnammém lagimang.' Kapéné ngo arolok-duːném gokkolo gímang, émpigeːla imurnékídíːdémpag gokkolo gídung."a
Mennam Tayéːlo Taunam
( Mark 2ː18-22; Luk 5ː33-39)
14 Odo Jonkol luyírsunékídíːdé gíge:la bím tauto, "Kapila ngolulaː Parosikídíːdé menkeːdang, émpigeːla nokkol luyírsunékídíːdé mendaneiman?"
15 Jisubí lulatsuto, "Kapé midaːmoné magbodok mibokídíːdé méːdírra duːyén édílo bí buluk lédílo duːdagji? Ayírdé aːyé édílo midaːmoné magbodém bulukkolokké gípagboyékuji; odo bulu menyé.
16 Séːkosin anu gayinki akun génamém potagnamang, édém potagnamílo, anu gayindé busumsula aku gayindém buyagoːyaːyé, odokké bedyakkodém bedyagoːmoyaːyé. 17 Taniyé anu apongém aku suktam-pígéngkolo píla léːmang. Bí píla léːmílo, anu apoːdé suktamdém bugyagmoyé, odokké apoːdé bitpagamyé, odokké suktamdéːsin agerro angkumaːyé, émpigeːla anu apongém anu suktam-pígélo píla léːdo, odokké odo annyidéméi mésíla léːyé."
Siné Koːnédéːla Kiné Mimédé
(Mark 5ː21-43; Luk 8ː40-56)
18 Édílo bí édém lula dungngan, Jiudi migomkoné gíla lébíːtungala bím kumna luto, "Ngok omédé suːpagong sikang. Émpigeːla no gíla nok alagém bík tayéːdo pigabbimílo, oddoi bí turyéku."
19 Édémpila Jisubí darobdanna bík lédílo gímínto, odokké bíkkol luyírsunékídíːdéːsin bík lédul gímíndo.
20 Odokké kangkítok miméko séːkobí yí:laːnyí dítakkopé íːyé bidla kila dungngan bí Jisuk lamkudok gísaːla bík gasor tuːyíːdok ukkíto. 21 Bí aíé aíém lusuto, "Ngo bík gasordém ukkou paːmíloi, ngo ésaːruːyeku."
22 Jisubí ngenggonamé bím kaːsuto odokké bí luto, "Omma, nok asiném kínggítok, nok méːjíksunamdé nom ésaːmotakku." Odokké édé ayírradokké édé miméːdé ésangkangku.
23 Édílo Jisubí migomdok okumpé gíaːla pempa mudnékídíːdémna urmurra duːné taniːkídíːdém kaːton, 24 odo bí luto, "Gílenam, ko:néːsé simaːumpé, bí yublamín dun." Odo bulu bím yirkaːto. 25 Gíkumsuné taniːkídíːdém ruːyipé mélennígnam lédupé, bí araːpé gíaːla ko:néːdok alagdok sogabnammé, bí daropkangku. 26 Édé agerdok doːyíːdém moːtagdok appíːloi kinapto.
Jisubí Miglun Taniːannyikoném Kaːbegmotoku
27 Jisubí édé okumdokké gídokudodém, miglun taniːannyiko bík lédulo gímínge:la, jéːla luto, "Debitké Aoːa, ngolum ayaːteiǃ"
28 Édílo bí araːdoːpé gíangkan, miglun taniːannyidé bíkkodoːpé gído, odo bí bulum tauto, "Ngo noyim ésaːmolaːyéku émna noyi méngkésudon?"
Bulu lulatsutoku, "Éː Ruːtuma, ngolu méngkésudo."
29 Odo bí buluk amigdok pigabbigeːla luto, "Nolu okko émna méngkésudang édémpéi ikaːlangkaǃ" 30 odo bulu kaːpangkangku. Jisubí bulum torgampé luto, "Annangka, sidém séːkosin kinpé lagimang."
31 Émpigeːla bulu gílenna édé moːtagdok appíːloi bík agomém kinabmoto.
Jisubí Gommanéːkoném Lulamokunam
32 Taniːkídíːdé gílendodo, uiːpaːnam taniːkoːném séːko agom lulamangngan, Jisukodoːpé gíbodo. 33 Odokké édílo uiːdém ménnenbitoji, édé gomma:né taniːdé agom lulangkangku. Gíkumsunékídíːdé kaːla kangaksula luto, "Sémpiném Israelso édílo:sin kangkímangai."
34 Émpige:la Parosikídíːdé luto, "Bí ui:kídíːdok migompé batpénédokki tornamém paːla uiːkídíːdém ménnendung."
Ager-gerné Ajjiko
35 Jisubí appíng taonémnaː doːlungém gíbínto, murong-okumkídíːdo luyírbito, tatpon lutaddok migomdokodém lugoːbito odokké kiné-ramné appíngém ésaːmotoku. 36 Édílo bí gíkumsuné taniːkídíːdém kaːton, bí buluk légaːpé asiné kibikang, kapilaːné bulu méːdírradungngai odokké kaːsíné kaman meːr kísala bulukké okkosin kamangai.b 37 Odo bí luyírsunékídíːdém luto, "Gatkupénamé bojéruːngko dung, émpigeːla gatkupénné abamang. 38 Odok-légaːpé, gatsíngkupénam arígdoːpé gatsíngkunném mélígdoːpé gatsímokuné Ruːtumdok kotok."