Jisuké Goggotpoːnam Luyírsunékíddíng
(Moti 4.18-22; Mark 1.16-20)
5
Longékoném Jisubí Genneseret pa:tang kéra:do dagla du:dodo, gíkumsuné kéréngkopé taniyé Ru:nék do:yingém tatpé mé:la bím níːrumbomkang. 2 Paːtaːdok asi duːtérdo bí ollung so:nyiko ka:paːsuto, mosuangkídíːdé édémbulum odo mépagla buluk ésapkídí:dém írpula dungngai. 3 Bí ollungkídí:dok asongkolo sangaːto, bík sangangko olluːdé Simonkai. Odokké bím ragodokké ajjiko níːlennígdo:pé lulíkto. Odokké bí ollu:do tedgeːla odokké tani:kídí:dém luyírbito.4 Bí doːyíːdém kíngabbigeːla Simonmé luto, “O:ríːyan assolo:pé olluːdém kongalíkto, odokké ésabdém ongo sogabnam léga:pé méilíkto.”
5 Simonbí lulatsuto, “Ru:tuma, ngolu yumé-yumbuːdo ngalatsula ésabém soka émpige:la ongo apírkosin paːtomang. Émgom nok lulígnam légaːpé, ngo ésapsém méilíkpé. 6 Édílo bulu ésabdém méilíktoji, bulu bojéru:ngko ongngom sogabnammé ésabdé bedrégbomkang.a 7 Édémpila bulu buluk akon ollu:dok du:né ajonkídí:dém pédyabla odo:pé gíla sodumsudopé goksuto. Odokké bulu gíla ollu:sonyido biːdopé ongngom títo, édémpila buluk ollu:sonyidé jíːbudíːdaggaboi. 8 Édílo Simon Pitorbí édém ka:ton, bí Jisukodo:pé lébíːtungala kumna luto, “Ruːtuma, ngokkosokké gígérkang, ngo paːpkan taniːko!”
9 Kapéné buluk bojéru:ngko ongo sogabnamdém ka:la, bíːlaː bík ajon appíːdé kangaksuto. 10 Odokké édémíːpé Simonké ajon Jibediːké ao Jemsbíːlaː Jonbíːsin.
Odo Jisubí Simonmé luto, “Pésoyok, su:pakkolokké nolu tani:yém sogabyé.” 11 Édémpila bulu buluk ollungkídí:dém témpído:pé sosanggeːla appíngém mépagla bík lédulo gímínkang.
Jisubí Taniːkoném Ésaːmokunam
(Moti 8.1-4; Mark 1.40-45)
12 Édílo Jisubí taonkolo dungngan, ngero-roːnam taniːko odoːpé gído. Édílo bí Jisum kaːton, bí pogbumgeːla kumna bím luto, "Ruːtuma, no méːbimílo, no ngok asíksém naréːmolaːdakku.b"
13 Odo Jisubí bík alagém maːlengeːla bím riːyidbito. Odokké bí luto, "Ngo méːlígdung, naréngkangkulangkaǃ" Odokké oddar ngero-roːnamdé bíkkolokké gípakkangku. 14 Odo Jisubí bím luto, "No séːkomsin lubisuyok, émpigeːla gíla aíém mirídémc léngkansuta, odokké bulu lukanbilaːdokupé Musiːké lulígnamdémpé nok naréngkunam légaːpé palíkpénamko palíkta.d"
15 Émpigeːla bík doːyingém takamé appíːloi kinapto, édémpila kéréng-kéréːpé taniyé bíkkolok doːying tatkoloːla buluk kila duːnamdokké aikunam légaːpé gíkumoːsuyangkang. 16 Émpigeːla Jisubí abayaːpé gísuggíruksula rongamkoloːpé gíla kumdagai.
Jisubí Yéːné Taniːko Ésaːmokunam
(Moti 9.1-8; Mark 2.1-12)
17 Longékoném bí luyírra duːdodo, Parosiélaeː luro luyírnékídíːdé, séːkobulu Galili, Judia, odokké Jerusalemdok takam taonnokké gíduːji, bulu odo tedla dungngai. Odokké kiné-ramném ésaːmolaːdokupé Ruːtumké tornamé bík dungkodo bík lédílo dungngai. 18 Kangkíto, taniːékké yé:né taniːkoném patikolo joːbomdo odokké bím okum araːdoːpé jongabomna Jisuké kéraːdo mépé méːto. 19 Émpigeːla taniyé bojébadnamé bulu bím jongabomnan lambém paːtomang, édémpila bulu selapto:pé joːsaːbomna odok kuryaggeːla bím patitéːtéːpé taniːkídíːdok pongkogaːrdo, Jisuké kaːtubarsupé méilíkto. 20 Édílo Jisubí buluk méːtinsunamdém ka:ton, odo bí luto, "Ajona, nok imurém méːyinsubitagbo."
21 Parosiélaː luro luyírnékídíːdé aí:kídíːdé méːrobbomkang, "Séːkon sé: amisé séːko Ruːném luka:dun? Séːko imurém méːyinsubilaːdang, Ruːnébí atéroːdéːmíné?"
22 Bulu okkom méːla duːji édém Jisubí kingeːla luto, "Kapila nolu noluk asindo édémbulum méngolaːdun? 23 Okodé lunampé lupoyaːdangː 'Noluk imurém méːyinsubitagbo,' émnamdéːyé, 'Darobgeːla lambégítok émnamdé?’ 24 Nolu kinnayépé Taniːké Aoːkéf imurém méːyinsubinan ilang-gílannamé séː mo:disok tayéːso dung émnamdém." Bí yé:né taniːdém luto, "Ngo nom ludung, daropto, odokké nok patiːdém pirsangge:la okumpé gíkangku."
25 Bí bagémpé buluk kanggaːdo dagropkang, bí bík kédgéːla du:nan patiːdém pirsanggeːla Ruːnémé luyitsula okumpé gíkangku. 26 Appíngé kangaksula dungkang odokké Ruːnémé luyitsuto. Bulukkolo pésso aːla bulu luto, "Silo ngolu kangkímaːnam agerko kaːpaːto."
Jisubí Lebimé Gognam
(Moti 9.9-13,Mark 2.13-17)
27 Odok lédupé, Jisubí gílenna gíla murkongg urkolo tedla du:dopé murkong urné taniːko kaːpaːsuto, bík aminé Lebi. Jisubí bím luto, "Ngok lédulo gímínto." 28 Odokké Lebibí dagrobgeːla appíngém mépagla bík lédulo gímínkang.
29 Odokké Lebibí bík okumdo Jisuké légaːpé bottéruːpé donam-tíːnamko dobo-tíːboto, odokké buluk lédílo bojéru:ngko murkong urnélaː taniːékké domín-tíːmínto. 30 Émpigeːla Parosiélaː buluk opedok luro luyírnékídíːdé bíkkol luyírsunékídíːdém binbinaila luto, "Kapila nolu murkong urnélaː imurnékídíːdokh lédílo dojon-tíːjonsudun?"
31 Jisubí bulum lulatsuto, "Ésaːla du:némé daktorém lagimang, émpigeːla kila du:némé lagidag. 32 Ngo arolok-duːnékídíːdémi gokkolo gímang, émpigeːla imurném méngkutsumodokupé gídung.
Menna Duːnamnok Tayéːlo Taunam
(Moti 9.14-17; Mark 2.18-22)
33 Bulu bím luto, "Jonkol luyírsunékídíːdé menna duːla kumkeːdag, odokké édémíːpé Parosikídíːdokkol luyírsunékídíːdéːsin, émpigeːla nokkékídíːdé dola-tíːlango duːdag."
34 Jisubí lulatsuto, "Nolu midaː magbodok mibokídíːdém menna duːmolaːyén édílo bí buluk lédílo duːmíndang, édémíːpé ngokkol gímínnékídíːdéːsin ngok duːmíndotakamdo kapila menyén? 35 Émpige:la magbodém bulukkolokkém gípagbokunam ayírko aːyé; odo longékídíːdo bulu menyé."
36 Bí bulum séː luyisunamsém lubitoː "Séːkosin anu gayinnok intakko pedgeːla akuné gayiném potagnamang. Bí édémpé potagnamílo, anudém bedmodagbo, odokké anudok intagdém akudok lédílo lékodopé potaglaːmang.j 37 Odokké séːkosin anu apongém aku suktam-pígéngkolo píla lé:mang. Bí píla léːmílo, anu apoːdé suktamdém bugyagmoyé, odokké apongkídíːdé bitpagamyé odokké suktamdéːsin bedmígyé. 38 Édémpila anu apongém anu suktamno píla lé:pénammé. 39 Odokké nolu aku apongém tíːnam lédupé anu apongém makumang, kapéné nolu ludag, "Akuné apoːdé kaiyaːdag.' "