Jisubí Taniːkoném Ésaːmotoku
(Mark 1.40-45; Luk 5.12-16)
8
Édílo bí adiːdokké gíitokuji, kéréngkopé taniyé bíkkolo gímíndo. 2 Odokké kangkítok, ngero-ro:nam taniːko bíkkodoːpé gíge:la lébíːtungaːla kumna luto, "Ruːtuma, no méːbimílo, no ngok asíksém naréːmolaːdakku."3 Jisubí bík alagém maːlenge:la bím ri:yidbige:la luto, "Ngo méːlígdung, naréngkangkulangkaǃ" Odokké oddar bík ngero-ro:namdé aikangku. 4 Odo Jisubí bím luto, "Kangkí, no séːkomsin okkomsin lubiyok. Émpigeːla gíla, no aídé mirídém léngkansupoːta, odokké buluk lubikunam légaːpé Musiːké lulígnam palíkpénamdém palíkpoːta."a
Jisubí Ruman Opisarkolok Pagbokoném Ésaːmokunam
5 Édílo Jisubí Kapernaumpé gíaːtoji, língko-opisarkoné bíkkodoːpé gíla kumna luto, 6 "Ruːtuma, ngok pagbodé kínggípé kila okum élé yéːtabla dung."
7 Jisubí bím luto, "Ngo gíge:la bím ésaːmoyéku."
8 Émpigeːla língko-opisardé bím lulatsutoku, "Ruːtuma, ngok okumdoːpé no gíaːdoːpé ngokké arré kamang. Émpigeːla agomoːpé lulíktei, oddoi ngok pagbodé ésa:yéku. 9 Kapéné ngoːsin amiké kéíglok taniːko, ngok kéígloːsin bojéko maglíngé dung. Ngo akoném 'Gíkang' émmílo, bí gídag; akoném,'Gíatok' émmílo bí gíaːdag. Ngo ngok pagbodém 'sém itoka émnígmílo,' bí édém ibidag."
10 Édílo Jisubí édém tattoji, bí tadla tadngaksuto, odokké bíkkol gímínnékídíːdém bí luto, "Ngo nolum arodém lubidung, ngo Israel araːso aːkosin sémpin kínggíːné méːjíksunném pangkímang. 11 Ngo nolum lubidung bojéruːngko sanggatokkélaː o:abokké gíla tayéng-among migomdokodo Abraamké, Isakkélaː Jakupké doko tebuldo tedmínyé.b 12 Édílo migomdokodok ommangkídíːdém kémojíjíngkodoːpé érrennígyéji, odo taniyé iːpang rékkérépsula kabla-ríla duːyé. 13 Odokké língko-opisardém Jisubí luto, "Gíkangkuǃ Nok méːjíksukamdémpé nom ibitagbo."
Odokké odo ayírrado bík pagbodé ésangkangku.
Jisubí Bojéruːngko Taniːyém Ésaːmokunam
(Mark 1.29-34; Luk 4.38-41)
14 Édílo Jisubí Pitorké okumpé gíaːtoji, Pitorké ayodé ramna asubdo kédla duːdopé bí kaːpaːsuto. 15 Bí bík alagdok gakkínammé ramnamdé bíkkolokké gípakkang, odokké bí darobgeːla bím ila-saːla bito.
16 Édílo yummayírkaːji, bojéruːngko uiːpaːnam taniyém bíkkodoːpé gíabodo, odokké bí yalokídíːdém agom apirki ménnenamto odokké kila-ramna duːné appíːdém ésaːmotoku. 17 Lungor-luné Jisoyaːké lunamdém ilet-gílednam légaːpé édémpé ikang. "Bí ngoluk paːbém joːlíksuːto odokké ngoluk kinam-ramnamém joːpagbomkang."c
Jisukol Lédupé Gímínpénékídíng
18 Édílo bojéruːngkopé taniyé Jisumé yadyedla duːdopé bí ka:suton, bí bíkkol luyírsunékídíːdém paːta:dok kekonoloːpé gídopé lulíkto. 19 Odo luro luyírnéko bíkkodoːpé gísanggeːla luto, "Luyír-abu, no okoloːpéi gíyeji ngo nok lédulo odopéi gímínpé."
20 Jisubí bím lulatsutoku, "Mensaruːlokké dungko arungé dung odokké doːmírtok péttangkídíːdokké asubé dung, émpigeːla Taniːké Aoːké bík tukkudém léngkoko okolosin kamang."
21 Gímínnékídíːdok akonkoné bím luto, "Ruːtuma, ngo gíponggekula baːbumé yusípoːdokupé mélíkpoːteikui."
22 Émpigeːla Jisubí bím luto, "Ngok lédulo gímíntok, odokké sinékídíːdé buluk aíké sinékídíːdém yusímotok."
Jisubí Bottén-Ésarko Sarngasumoto
(Mark 4.35-41; Luk 8.22-25)
23 Jisubí ollungkolo sangaːto odokké bíkkol luyírsunékídíːdé bík lédulo gímíndo. 24 Odokké kangkítok, bottén-ésarko paːta:doːpé sarangkang, édémpila siyaddé olluːdok tayéːdoːpé lu:sangkang. Émpigeːla Jisubí yubngaksula dungngai. 25 Odokké bulu gíla sémpé lula bím urropto, "Ruːtuma, ngolum moturteiǃ Ngolu sidagboǃ"
26 Bí bulum lulatsutoku, "Ajjiko méːjíksunékídínga, nolu kapila pésodun?" Odo bí dagrobgeːla ésardémnaː siyaddém morítto, odokké édébulu asoːdanpé duːdankang.
27 Taniːkídíːdé kaːla kangaksula tauto, "Séː kapin taniːkonéːí bí? Bottén-ésarélang luːsan-siyadé bík agomém taddagǃ"
UiːPaːnam Taniːannyikoném Jisubí Aimotoku
(Mark 5.1-20; Luk 8.26-39)
28 Odokké édílo bí paːtang kekonké Gadarinid moːtagdoːpé gípíːton, agokídíːdokké gílenné uiːpaːnam taniːannyik bím ríksuto. Bulu airuːpé pésokanna odok séːkosin gípadla:mangngai. 29 Odokké kangkítok, bulu jéːla lukang, "Ruːnék Aoːa, no ngolukkolok okkom lagidang? No ngolum ngoluk ayírdé aːmadapéi mogídmomatkapé soːpé gídun?"
30 Odo bulukkolokké ajjiko moːténgoːpé bottén kéréngkopé eːgém dogoːmola léːtagai. 31 Ui:kídíːdé Jisumé kumna luto, "No ngolum ménnenmílo, ngolum eːg kéréːdoːpé mélíglang."
32 Bí bulum luto, "Gíkangǃ" Édémpila bulu gílenna eːgkídíːdo durangkang, odokké eːg kéréːdé paːtang ragodok outkodokké dugyingamna asido singapkang.