Jisubí Yí:la:nyí Luyírsunékídí:dém Mélígnam
(Moti 10.5-15; Mark 6.7-13)
9
Jisubí yí:la:nyídém lékkopé goggeːla, bí bulum takam buttom ménnennadopélaː kinam-ramnamém ésaːmola:dokupé, tornamémnaː ilang-gílangém bito. 2 Odokké bí bulum Ru:nék migomdokodém lugoːbidopélaː kinném ésaːmodokupé mélenníkto. 3 Bí bulum lutoː "Lambédok légaːpé nolu tukuném, sogéném, pitangém, murkongém, okkomsin bomyok; galugémsin bomsedyok. 4 Nolu oko okumdoi gía:doji, édíloːpé édé taondokké gíkumaːyéji, oddung du:lang. 5 Odokké okoloi taniyé nolum boríksuma:yéji, édílo nolu édé taondokké gíyékuji odo noluk alédok bagabné lékamdémsin lépaksulang, bulu Ruːnék agomém toríksutomang émna buluk kekonpé lukanbikunam légaːpé.a"b6 Odokké bulu gílenna gíla doːlu doːluːlo, tatpon lutaddém lugoːbito odokké appí:loi taniːyém ésaːmotoku.
Erotké Méːmursunam
(Moti 14.1-12; Mark 6.14-29)
7 Édílo migom Erodbí inam-gínam ager appí:dém tatpasuton, odo bí murkang, kapilaːné Jonbí sikolokké turkangku émna séːkai séːkaibulu lula dungngai. 8 Akke ludag Elija:bí lendungku, odokké akon akoné ludag lekeké lungor-lunéko turdungku. 9 Émpigeːla Erodbí luto, "Ngo Jonké tukkom papírmoka. Émpém bí sé:kon ngo sémpin doːyingém tatpaːsudun?" Odokké bí bím ka:pé émna mago:to.
Jisubí Lí:yíng Anggoko Tani:yém Dobonam
( Moti 14.13-21; Mark 6.30-44;Jon 6.1-14)
10 Mélígnamkídí:dé gíladgekula bulu oko okkom ikaji édémbulum Jisum lubitoku. Odo bí bulum Betseda taondoːpé gíyugbola gíkang. 11 Édílo gíkumsunékídíːdé édém kinton; bulu bík lédulo gímíndo odokké bí bulum boríksugeːla Ru:nék migomdokodok doːyingém kíbito, odokké kinném kaːpídbitoku.
12 Yummayírdo yíːla:nyídé bíkkodoːpé gígeːla bím luto, "Gíkumsun taniːkídíːsém mélíktokubo odo bulu kérangké do:lungkídíngoloːpé gíla dokkomnaː dungkom magapsuyépé, kapilaːné ngolu doːluːlokké aigampé araːlo dung."
13 Bí lulatsutoku, "Nolu bulum dodopé o:kaiko bitopén."
Bulu lulatsuto, "Ngolukké pitang borngokolaː ongo pirnyongkom dun- ngolu gígeːla tani appíːsok légaːpé donamko réma:mílo pí:maːyé." 14 Odo lí:yíng anggokíramkopé milbong taniyé dungngai.
Émpigeːla bí bíkkol luyírsunékídí:dém luto, "Bulum yíngo yíngokíramkopé tetpumsula tedmoto."
15 Luyírsunékídíːdé édémí:pé ila appíːdém tedmoto. 16 Pitang borngodémnaː ongo pirnyidém langge:la bí tayéːtoːpé ngesa:to, odokké aipai bigeːla édémbulum pentuːto, odokké édémbulum luyírsunékídí:dém bulum orbidopé bito. 17 Bulu appíngé dola dotíːsukang, odokké gempa yí:la:nyíko dongadém luyírsunékídíːdé tíkumsutoku.
Jisumé Pitorké Ludésunam
(Moti 16.13-19; Mark 8.27-29)
18 Longéko édílo Jisubí atéro:dé kumna dungngan, luyírsunékídíːdé bíkkodo:pé gído, odo bí bulum tauto, "Ngo séːkobín émna tani:kídí:dé ludang?
19 Bulu lulatsutoku, "Akke Jon Baptisbí émdag, akke Elija:bí émdag; odokké akke lekeké lungor-lunéko turkangku émdag."c
20 Bí bulum tauto, "Émpém noluka, ngo sé:kobí émna nolu ludon?"
Pitorbí lulatsuto, "Ru:nék mélígnam Kiristobí."
Jisubí Bík Sinamdém Lubisunam
(Moti 16.20-28; Mark 8.30-9.1)
21 Odo Jisubí bulum édé agomdém séːkomsin lubimaːdopé torgampé lulíkto. 22 Bí sémpé luto, "Tani:ké Aoːbí bojéruːngko ipusireːém pa:yérung, odokké midumkídíːdé, abín miríkídí:déːla luro luyírnékídíːdé bím lupagyé, bulu bím mokeyé, émpigéːla loumné longédo bí turyéku."
23 Odo bí bulum appíngém luto, "Séːkai ngok lédulo gímínmílo, bí aíém topaksupoːpaːyé odokké bí loːdísém bík aíké kurusdém joːsugeːla ngok lédulo gímínpaːyé. 24 Kapéné séːkobí bík turnamdém turmopé méːyéji, édé bíkkolokké yogyé, émpigeːla sé:kobí ngok léga:pé bík turnamdém yogmoyéji, bí édém moturyé.d 25 Taniːkoné moːpísém panggeːla, bík aíém aíé yoksumomílo bí okkom paːton? 26 Séːkoi ngomnaː ngok agomém anyisumílo, Tani:ké Aoːbíːsin bím anyiyé édílo bí bík unjíglo odokké Abukélaː angunné tayéng-ya:mekídíːdok unjíglo gíyékuji. 27 Émpigeːla ngo nolum arodém lubidung, sidok dagla du:né akke Ruːnék migomdokodém kaːpomaːsissém sinamém kaːbegma:yé."
Dumsíːmigmo Angunam
(Moti 17.1-8; Mark 9.2-8)
28 Piːnyi longékíram lédupé Jisubí sémbulum luto, Pitormé, Jonmé odokké Jemsmé bík lédílo bí gíbola adi tayéngkoloːpé kumkolo gíkang.e 29 Bík kumna du:dodo, bík dumsíːmigmodé angupakkang, odokké bík génamkídíːdé kampo-titikang. 30 Tani: annyiko, Musibíːlaː Elijaːbí, 31 Jisuk lédílo luposula unjígjírígla daglenkang. Bulu bík gíkunamdémf luposula dungngai, okodém bí Jerusalemdo ilet-gíledyéji. 32 Pitorbíːlaː bík ajonkídíːdé yubngaksukang, odokké édílo bulu kinsutokun bulu bík unjígdémnaː bík lédílo taniːannyíko dagla dumíndo:pé ka:to. 33 Bínyi annyidé Jisum mépagla gídokudodo, Pitorbí bím luto, "Ru:tuma, sidok du:namsé ngolukképé aidag. Kajé po:yub soumko mopolai- nokképé asongko Musiːképé asongko odokké Elija:képé asongko." (Bí okkom luton édém kinmapé luto.)
34 Édílo bí lula dungngan, mukkang asumko lenna bulum yíːtitto, odokké bulu mukkaːdo gíaːnamméi pésokang. 35 Mukkaːdokké gomukko sémpé lulenkang, "Bí ngok Ao:o, séːkom ngo balentag; bík agomém tadlang."
36 Édílo gomugdé lungasukan, bulu Jisum atéro:dé duːdopé pa:to. Luyírsunékídíːdé édém bullong kinna duːto odokké odo ayírdo bulu okkom kaːtoji édém séːkomésin lubitokuma.
Jisubí Aiman Yalo Paːnam Ko:ko Ésaːmokunam
(Moti 17.14-18; Mark 9.14-27)
37 Longkondo édílo bulu adidokké gítoktokuji, bojéko taniyé gíkumsula Jisumé ríksuto. 38 Odokké kangkítok, gíkumsunékídíːdok ara:dokké tani:koné jé:sangkang, "Luyír-abuǃ Ngo nom kumdanna ludung, ngok atér aoːsém léko kaːpotei. 39 Séː kangkítok, yaloko bím moadag; odo bí bagémpé jéːla kabdag; yalodé bím siyamonamé bí nappadokké aːpudém mudlendag; odokké bím modadmoradla mépagla gídakku. 40 Ngo nokkol luyírsunékídí:dém édém ménpaktéika émna kumdanna luka, émpige:la bulu paktomang."
41 Jisubí lulatsutoku, "Méngkésumaːnélaː gínyoksunékídínga. Ngo éddíko noluk lédílo du:mínyén odokké éddíko nolum anna dunggéyén? Nok ao:dém so:pé gía:boto."
42 Ko:dok gíangardodo, uiːdé bím tírgíttírmadgeːla siyamoto. Émpigeːla Jisubí naréman yalodém morídla, koːdém ésaːmotoku, odokké bík abu:dém bím bitoku. 43 Odokké bulu appíngé Ru:nék kínggíruːnamdém méngaksuto.
Jisubí Lékoda Bík Sinamdém Lusubinam
(Moti 17.22,23;Mark 9.30-32)
Édílo bulu appíngé Jisuk inam ager appíːdém kaːla kangaksuton, odo bí bíkkol luyírsunékídí:dém luto. 44 "Ngo nolum okkom lubiyéji édém tadmiːla tadlangː Tani:ké Aoːmé tani:lok alaglo yadla-kopaglígyé." 45 Émpigeːla bulu édé lunamdém tatkintomang. Édém bulukkolokkém lé:síla léːtagai, édémpila bulu édém kinnatomang, odokké édé lunamdém bulu bím tatpésin pésokang.
Bottéryaːnédé Séːkon?
(Moti 18.1-5;Mark 9.33-37)
46 Bulukkolok séːkar bottépagyaːné:dé émna luyírsunékídíːdok ara:do lukerkaːmínsunamko lenkang. 47 Jisubí buluk asin agomdém kinna, ajjiné ko:ko bosanggeːla bík kéraːdo bím dagmoto. 48 Odokké bí bulum luto, "Sé:kobí sé: koːsém ngok aminno boríksuyéji bí ngom boríksudag; odokké sé:kobí ngom boríksudagji bí ngom mélígnédémsin boríksudag. Kapéné noluk appíngké ara:lok séːkarbí ajjiyarya:nédéːji-bíːar bottarya:néːdé."g
Séːkobí Noluk Kekonpé Imaji Bí Nolukké
(Mark 9.38-40)
49 Jonbí lulatsuto, "Ru:tuma, nok aminki buttom ménnenna duːdopé ngolu tani:ko kaːto, odo ngolu bím lutumka, kapila:né bí ngoluk araːlok taniːmangngai."
50 Jisubí bím luto, "Bím lutumyok, kapilaːné séːkobí noluk kekonpé imaːyéji bí nolukké."
Somoria Doːlungkoné Jisumé Boríksulí:ma:nam
51 Édílo bím tayéng-amo:pé gíbokunam ayírdé anin dungngabon, Jisubí Jerusalempé gípérung émna mé:sékto. 52 Odokké bí barígém ménolíkto, séːkobulu Somoria doːluːdo bík légaːpé appíngém moninsukapé gínongkang. 53 Émpigeːla odok tani:kídí:dé bím boríksutomang, kapilaːné bí Jerusalempé gíla dungngai.h 54 Édílo luyírsunékídíːdok Jemsbí:laː Jonbí buluk boríksumaːnamdém ka:toji, bulu luto, "Ru:tuma, tayéng-amoːtokké ummé doryila bulum ukkedopé ngolum lulígdopé no méːdagnei?"i
Jisukol Gímínam Légaːpé Bipénamkídíːdé
(Moti 8.19-22)
57 Bulu lambédo arai-araipé gíla du:dodo, tani:koné bím luto, "No okoloːpéi gíyéji, ngo nok lédílo odopéi gímínpé."
58 Jisubí lulatsutoku, "Mensurungké dungko arungé dung, odokké doːmírtok péttangkídí:dokké asubé dung, émpigeːla Tani:ké Aoːké bík tukkusém léngkoko kamang."
59 Bí akonkoném luto, "Ngok lédulo gímínto."
Émpigeːla taniːdé lulatsutoku, "Ru:tuma, ngok baːbumé yusípoːdokupé ngom mélíkpoːteikui."
60 Jisubí bím luto, "Sinékídí:dé buluk aíké sinékídí:dém yusí:motok; émpigeːla no gíla Ru:nék migomdokodém lugoːbita."+ \fr 9.60 \ft Séːkobulu Jisumé méːtinsumaji émmamílo séːkobulu Ruːnémé kinmaji bulum Jisubí siné émna ludung
61 Akoda luto, "Ru:tuma, ngo nok lédulo gímínpé; émpige:la ngo okumpé gípolangkula ngok okum-érangém lutérsupongkakupé."j
62 Jisubí lulatsutoku, "Sé:kobí al-gíla dunggeːla ngelatsudakkuji bí Ru:nék migomdokodok ager gerpé arré kamang."