Jisukol Gímínné Mimékídíng
8
Odok lédupé, Jisubí taon taonno, doːluːdoːluːlo, Ruːnék migomdokodok tatpon lutaddém lugo:bila gígoto. Yíːla:nyídé bík lédílo gímínka. 2 Édémíːpé mimé ékkésin, séːkobulu aiman yalo paːnamnokkélaː kikín-kimínnokké ésangkakunː Meri Magdolonibí séːkkolokkém butu kínítko ménnenbika. 3 Erotké okum kaːsí:né menejar, Kujaké yamné Joanaːbí; odokké Susanaːbíːla bojéru:ngko gímínto. Séː mimékídíːsé buluk aíké kanamnok bulum ka:dumsuka.Amni Pidnédém Luyisubinam
(Moti 13.1-9; Mark 4.1-9)
4 Édílo taon taonnokké Jisukoloːpé gíla bottén kéréngkopé taniyé gíkumsukan, odo Jisubí séː luyisunamsém lubitoː
5 "Aríg-inékoné bík amniém pidlíkkolo gílenkang. Bí amnidém pidla du:dodo; akke gubati ruːyido oletkang; okolo édémbulum sammígamton, odokké doːmírtok pétttangé édémbulum pala dongapto. 6 Akke ílíng kakolo oletkang, odokké édílo saːlenkaːji, amoːdé pítírkuragnammé édébulu sanapkang. 7 Ake amniyé tang ara:lo okepkang, tangkídíːdé buluk lédílo saːjonsula bulum partidamtoku. 8 Émgom amni ékké ainé amo:lo oletkang. Édébulu saːlenna bílabadla pidlígnamdémyang língkokop abayap aːyém eːbito."
Édílo bí lutérton, odo bí jénggamna luto, "Séːkké yerungé duːji, bí tattoka."
Luyisubinamdok Légíːdé
(Moti 13.10-17; Mark 4.10-12)
9 Édé luyisunamdok légíːdé okkon émna bíkkol luyírsunékídíːdé bím tauto. 10 Odo bí lubito, "Nolum Ruːnék migomdokodok kinpímaːnam agomdém kindopé bitag, émpigeːla ngo akoném luyisunampé lubidung, édémpidodém, 'Kaːbeggom, bulu kapaːma:yépé; tadbeggom, bulu tatkinma:yépé.'a
Amni Pidnédém Luyisula Lubinamdém Jisubí Lusarbinam
(Moti 13.18-23; Mark 4.13-20)
11 Luyisubinamdok légíːdé séː, amnidé Ruːnék gomugdéb. 12 Oko amnidé aríg gubati ruːyido oletkan bulu Ruːnék gomugdém tadnékídíːdé, odokké ui:bí gígeːla buluk asindokkém agomdém laːpag, édémpila bulu méngkésunamémna: moturnamém paːmaːyé. 13 Ílíng kakolok olednékídíːdé bulu séːko agomdém taddodém méːpodanna toríksuto, émpigeːla bulukké léppíré kamaːla loːtungoukopé méngkéuto, odokké ankangé aːdo ayírdo bulu opagletkang.c 14 Tang ara:lok okebnékídíːdé bulu séːko agomdém tatto, émpigeːla buluk turra duːdaglo turnamnok méːnamnoːlaː moːpísok mirémémnaː méːpo-ménganém méːbo kaːbolangkula opagleddakku, édémpila bulu mé:jubnépé ilaːtomang. 15 Émpigeːla ainé amoːlok oledné amnidé bulu séːko aronélaː ainé asinangé kala agomdém tatto, édém ménggapto, odokké duːyartíla duːla bíto-batto.d
Bati Kéíkkolok Seraki
(Moti 4.21-25)
16 Séːkosin serakiko banodge:la édém takkom maggom asub kéíkkolo tíla léːmang. Édémpé imaːpé, bí édém tígéngkolo tíla léːdag; odo séːkobulu araːdoːpé gíaːyéji píaːdém kaːbegyé.
17 Édémpila léːsilaːnammé okkosin kamang okodém kaːbekkumaːyéji, odokké kinpílaːmaːnam okkosin kamang okodém kinkuma:yéji émmamílo okodém kinmaːpé duːyéji.
18 Odok-légaːpé ansulang kapé nolu taddoji. Séːkké duːji bím bisedyé; séːkké kamaji, bíkké dung émna méːsunamdémsin bíkkolokkém laːpagyé."
Jisuké Anédéːla Bírrangkídíːdé
(Moti 12.46-50; Mark 3.31-35)
19 Su:pag Jisuké anédéːla bírrangkídíːdé bím kangkolo gído, émpigeːla taniyé bojébadnammé bulu bík kéraːdo:pé gíaːlaːtomang. 20 Séːkaibí bím lubito, "Nok oːbílaː nok bírrangkídíːdé nom ríksunam légaːpé, ruːyéːlé dagla dung."
21 Bí lulatsutoku, "Ngok oːbílaː bírrangkídíːdé bulu séːko Ruːnék agomém taddag odokké édémbulum idakku."
Jisubí Bottén-ésarko Sarngasumoto
(Moti 8.23-27; Mark 4.35-41)
22 Longékoném Jisubí bíkkol luyírsunékídíːdém luto, "Kajé pa:taːsok kekonoloːpé kongkongkai." Édémpila bulu ollungkolo saːla koːla gíkang. 23 Buluk koːla du:dodo, bí yubngaksukang. Odo pa:taːdoːpé botténé ésarko saraːdo; édémpila olluːdo assé kagbiːkang, édémpé bulum kínggíːné ngasotko paːto. 24 Luyírsunékídíːdé gígeːla sémpé lula, bím utto, "Ruːtuméí, Ruːtuma, ngolu jíngadagboǃ"
Bí kinsugeːla ésardémnaː luːsaːné siyaddém morítto; odo ésardé sarngasukang; odokké siyaddé lungasukang. 25 Bí bulum tauto, " Noluk méːjíksunamdé okolan?"
Bulu pésoloːlaː méːpísulaːma:la akoné akoném tauto, "Séːkon bí? Bí ésarrémnaː assémsin lutomnaːdag, odokké bulu bík lunamém taddag."
Jisubí Uiːpa:nam Taniːkoném Ésaːmokunam
(Moti 8.28-34; Mark 5.1-20)
26 Galili paːtaːdok kekonké moːtag Gerasenipée bulu kongkola gíkang. 27 Édílo Jisubí olluːdokké ragodoːpé gíitoji, taondok uiːpaːnam taniːkoné bím ríksuto. Édé taniːdé galuk-gasor gémapé, okumno duːmapé agogoluːlo duːnamé bojékopé ikaːbo. 28-29 Jisubí aiman yalodém taniːdokké gílendokupé lulíkto. Yalodé bím paːnamé bojéko idagaboi, bím ikoliki alé-alagdok ríngabgeːla kanggabla dunggom, ui:bí bím ikolidém bukínsumogeːla taniːkamangkolo:pé bím ménnígdungngai. Édílo bí Jisum kaːton, bí jéːlanamkopé jéːla kabla bík alédo oaːla luto, "Nokké ngok lédílo oko ageré dun, Tayéːtok duːné Ruːnék Ao, Jisu? Ngo nom kumdanna ludung, ngom modadmoradyokǃ"
30 Jisubí bím tauto, "Nok aminé okkon?"
Bí lulatsutoku, "Ngok aminé Liːjion,” kapilaːné bojéruːngko butto bík araːdo dungngai. 31 Odokké bulum uiːkorudo:pé+ \fr 8.31 \ft Uiːkídíːdém édíloːpé baːpénam kébaːdém baːmaji odoloːpé bulum sido tumna léngkodé émna méːdungai mélígmaːdopé bulu bím kumdanna luto.
32 Adi tayéːdo eːg kéréngko dogoːla dungngai. Ui:kídíːdé bulum eːgkídíːdoːpé gía:modopé Jisumé kumna-luto, édémpila bí bulum gíaːdopé lulíkto. 33 Butukídíːdé taniːdokké gílenna eːgkídíːdo durangkang, édémpila eːg kéré:dé oudné ragodokké pa:taːdo ojíːla singapkang.
34 Okko kapikaːji édém eːg kaːsíːnékídíːdé édílo ka:suton, bulu duglangkula taondoːlaː doːluːdo édém lubitoku. 35 Odokké taniːkídíːdé édém kangkolo gílendo. Édílo bulu Jisukodoːpé gípí:ton, séːkkolokké butukídíːdé gílenkangkuji, bulu bím Jisuk lépo kéraːdo tedla, aikangkanopé gélabomna, odokké aiyolangkula duːdopé paːto, édémpila bulu péssamkang. 36 Séːkobulu kaːtoji kapé uiːpaːnam taniːdém aimotokun édém akoném lubitoku. 37 Odo Geraseni moːtagdok taniːappíːdé Jisum bulukkolokké gípagdokupé luto, kapilaːné bulu aigampé pésokang. Édémpila bí olluːdo saːla odokké gípakkang. 38 Oko taniːdokké butukídíːdé gílenkangkuji bí Jisuké lédílo gímínpé émna kumdanna luto.
Émpigeːla Jisubí bím sémpé lula urríktoku,f 39 "Okumpé gílatkangku odokké Ruːnébí nok légaːpé éddíko agerém gerbitagji édém lubitaku."
Édémpila taniːdé gílangkula Jisubí bík légaːpé éddíko agerém gerbitoji édém taondok appíːloi lubitoku.
Jairaské Omédéːla Jisuké Gasortuːyídok Ukkíné Mimédé
(Moti 9.18-26, Mark 5.21-43)
40 Édílo Jisubí gíladdokun, gíkumsuné taniːkídíːdé bím boríksuto, kapilaːné bulu appíngé bím toya:la dungngai. 41 Odo Jairas émnam taniːko gído; bí murong-okumkolok migomkai. Bí aíé Jisuké alédo tungala kumdanna bík okumpé gímíndokupé luto. 42 Kapilaːné yí:la:nyí dítakkopé iné bík atér omédé, simo-simaːla dungngai.
Jisubí gíla du:dodo, taniːkídíːdé bím appíːlokkéi níːrumbomkang. 43 Yí:la:nyí dítakko íːyé bidla duːné miméko buluk ara:do dungngai, émpigeːla séːkosin bím kaːpídbila:tokuma. 44 Bí Jisuk lamkudok gísanggeːla bík génam galug tuːyidok gakkíto, odokké oddar bík bidla du:né íːyidé bidngasukang. 45 Jisubí tauto, "Séːko ngom gakkíton?”
Appíngéi gakkíma émna lupaksuto, odo Pitorbí luto, "Ruːtuma, bojéruːngko taniyé nom duːyedla níːrumbomna dung."
46 Émpigeːla Jisubí luto, "Séːkai ngom gakkítag, ngokkolokké tornamé gílendopé ngo anpaːsuto." 47 Bím magabruːtobo émna mimédé kinsuto, édémpila bí jinna gía:la Jisuk alédo oaːla kumto. Odo appíngké kanggaːlo bí bím lubisuto kapila bí bím gakkíkaji odokké kapé bí oddar ésangkangku.g 48 Odo Jisubí bím luto, "Omma, nok méːjíksunamdé nom ésa:motoku, ansíngoːpé gíkangku."
49 Jisuk lula duːdíːdo, murong-okum migom Jairaské okumolokké taniːko gído. Édé taniːdé Jairasmé luto, "Nok omédé sikang, édémpila, luyír-abumé gíramsumoyobo."
50 Édém tatpanggeːla Jisubí Jairasmé luto, "Pésoyok; méngkoːsutok, bí turyéruːngku."
51 Édílo bí Jairaské okumpé gípíːton, Pitormé, Jonmé, Jemsmé, odokké ko:né:dok ané-abudém bí gía:jonsuto, émpigeːla séːkomsin bík lédílo ara:doːpé gía:motoma. 52 Odo taniː appíːdé bík légaːpé uːla kabla-ríla dungngai. Jisubí luto, "Kabnamém métobo, bí simaːumpé yublamíndun."
53 Koːnéːdé sikang émna kinna bulu bím yirkaːto. 54 Émpigeːla bí bím alagdok sogabge:la luto, "Omma, daroptoǃ" 55 Bí turrangkula lékkolo daropkangku. Odo Jisubí bulum koːnéːdém oːkai donamko bidopé lulíkto. 56 Bík ané-abudé kangaksula dungkang, odokké bí bulum séːkomsin okkomsin lubimaːdopé lulíkto.