Ruman Língko-Opisarkolok Pagbokoném Ésaːmokunam
(Moti 8.5-13)
7
Édílo Jisubí taniːkídíːdém édé appíːdém lungabbiton, odo bí Kapernaumpé píngato. 2 Odo Ruman língko-opisarkolok airuːpé aipé-méːnam pagboko kila sikíramna dungngai. 3 Édílo opisardé Jisumé tatpaːsutoji, bí Jiudi midum ékkém bíkkodoːpé gíla odokké Jisubí gíla bík pagboːdém ésaːmobidokupé gogdopé mélíkto. 4 Édílo bulu Jisukodoːpé gípíːton, odo bulu bím kumdanna luto, "Ngolu sék légaːpé gíbiduːji, bík légaːpé no édém ibipaːdo. 5 Kapilaːné bí ngoluk réngamém aipé-méːdag odokké ngolum murong-okumém mobitag.6 Édémpila Jisubí buluk lédílo gímíntoku. Bí okumdoːpé gípíngkíramdodo opisardé bíkkodoːpé sém lubidopé ajoném mélíktoː Ruːtuma, no gíram-gísamsuyobo, kapéné nom ngok okumso gíaːmopé ngokké arré kamang. 7 Odok-léga:pé ngo nokkodoːpé gía:pénamdémsin ngokké arré kamang émna méːsudag. Édémpila agomoːpé lulíktei, oddoi ngok pagbodé ésaːyeku. 8 Kapéné ngoːsin amiké kéíglok taniːko, ngok kéígloːsin bojéko maglíngé dung. Ngo akoném 'Gíkang' émmílo, bí gídag; akoném,'Gía:tok' émmílo bí gíaːdag. Ngo ngok pagbodém 'sém itoka émmílo,' bí édém idag."
9 Jisubí bík lunamdém tadla tadngaksukang, odokké bíkkol gímínné taniːkídíːdém ngengkutsugeːla luto, "Ngo nolum lubidung, Ngo sémpin bottépé méːjíksunném Israel taniːkídíːsok ara:so pangkíma:da."
10 Édílo mélígnam taniːkídíːdé okumdoːpé gípítokun bulu pagbodém ésaːla duːdokupé pa:to.
Jisubí Tumbo-néːngkolok Aoːko Turmokunam
11 Odok léddardo, Jisubí Nein émnam taonkoloːpé gíkang, odokké bíkkol luyírsunékídíːdéːla bojéru:ngko taniyé bíkkolo gímínkang. 12 Bí taondok séːturdoːpé gípíːdannamei, tumbo-néːngkolok atér aoːkolok simaːdém joːlenbomdo. taondok bojéruːngko taniyé bík lédílo gímíndo. 13 Édílo Ruːtumbí néːdém ka:ton, bík asinbo bíkképé ayangé émna méːnamko a:la bí luto, "Ané kabyobo." 14 Odo bí gísanggeːla rungkugdém gakkíto, odokké édém jo:bomnékídíːdé:sin dakkang. Odokké bí luto, 'Ya:meya, ngo nom ludung, daropto!" 15 Siné taniːdé tetsaːla agom luropkang, odokké Jisubí bík anédém bím bitoku.
16 Bulu appíngé péssamna Ruːnémé luyitsuto. Odokké bulu luto, "Bottéruːné lungor-lunéko ngoluk araːso lendung. Ruːnébí bík taniːyém kaːdumsukolo gídung."
17 Jisuké sé: agersém Judia:dok appí:loːla aninké doːlungkídíːdo kinapto.
Jon Baptiské Mélígnam Tani
( Moti 11.2-19)
18 Jonkol luyírsunékídíːdé édé ager appíːdém bím lubitoku. Bulukkolok annyiko gogge:la, 19 Jonbí bulum Ruːtum Jisukolo:pé bím taudopé mélíkto, 'No:íyé édé séːkobí gípénédén, émmamílo ngolu séːkai akonémyé toyaːla du:yén?
20 Édílo taniːannyidé Jisukodo:pé gípíːton, bulu luto, "Jon Baptisbí ngolum nom taudopé mélíktag, 'No:íyé édé séːkobí gípénédén, émmamílo ngolu séːkai akonémyé toyaːla du:yén?' "
21 Odo ayírrado Jisubí bojéru:ngkoném aimotoku séːkké kinamé, ramnamé dungngan odokké séːkom aiman yallo paːla léːtungan odokké bojéko migluném kaːpaːmotoku. 22 Édémpila bí mélígnam tani:kídíːdém lulatsubitoku, "Gílatkangku odokké Jonmé nolu okkom ka:toji okkom tattoji édémbulum lubitakuː Migluné kaːpaːdungku, lébené gílaːdungku, ngero-ro:namém narémotakku, ruːbené tadbegdungku, sinném turmodungku, odokké tatpon lutaddém opanném lugoːbidung.a 23 Ayang-paːnédé bí séːko ngok légangé opagledmaːji."
24 Jonké mélígnam tani:kídíːdé gíkunam lédupé, Jisubí gíkumsuné taniːkídíːdém Jonké agomém lubitoː "Nolu okkom kangkapé sullipotadoːpé gílenkan? Ésaré sartabla lé:nam dorbumém kangkapei? 25 Émmamílo, nolu okkom kangkolo gílenkan? Kangkanoːpé gélabomna duːné taniːkonémnei? Ma, séːkobulu aré kannémnaː tíːbunam bédugasorém gédobomdoji bulu migom-dungko okumnoːpag duːdag. 26 Émpigeːla nolu okkom kangkolo gílenkan? Lungor-lunékonémyé? Arro, ngo nolum lubidung, bí lungor-lunnémyaːsin bottéya:néko. 27 Bí édé taniːdé sék légaːpé sém adla léːtagː "Ngo ngok barígém nomyang ménoːlígyé, séːko nok lambém nok légaːpé síglennoːbiye.b' 28 Ngo nolum lubidung, anélok onam ara:lo Jonméyang bottéya:né séːkosin kamang; émpigeːla Ruːnék migomdokodok ajjiarya:nédé Jonméyaːsin bottéya:dag."
29 Tani appíːdé, odokké murkong urnékídíːdéːsin, édílo bulu Jisuk lunamdém tattoji, Ruːnék lambédé arro émna méːto, odokké bulu Jonkolo asilo baptisém laːtoc. 30 Émpigeːla Parosikídíːdéːla luro:ém kinnépaːnékídíːdé Ruːnék méːnamdém buluk aíké légaːpé toríksutomang, odokké Jonkolo baptisém laːtomang.
31 "Émpém ngo okokki sé: taniːopesém luyisulaːyén? Bulu okkarém gésudang? 32 Bulu réko-kokolok tedla duːné koːkangémpé idag séːko akoné akondém gokkomínsula duːdangː 'Ngolu noluk légaːpé pempém mudbika, émpigeːla nolu so:tomang; ngolu kabaném kabbika, émpigeːla nolu kaptomang.' 33 Kapéné, Jon baptisbí donam-tíːnamém doko tíːngkolo gímangai, émpigeːla nolu ludo bíkkolo ui:yé dung émna.' 34 Taniːké Ao:bí doko-tíːngkolo gíto, émpigeːla nolu ludo, bí dorí-tíːrínékola: tínguriko, murkong urnéloglaː imurnélok ajonko émna." 35 Émpigeːla séːkobulu aroruːpé Ruːnék ommangéji bulu kinyé okkom Jonbí:laː ngo iduːji édé aropé méːjoːnélok ageré.''
Jisubí Simon Parosiké Okumdo
36 Longékoném Parosikoné Jisumé apinko dojonsuːpé gokto, édémpila bí Parosidok okumpé gíla apin doko tebuldo tedaːto. 37 Édílo édé taondok duːné mimékoné séːko lekkem aiman agerém gerdagan, Jisubí Parosidok okumdo apin dola dung émna tadbeksuton, bí nampon-yonsunamko bomaːla gído. 38 Odokké bí Jisuk lamkudo dagla bík alédo kabla duːto, Jisuk alédém bík miksiki jumogeːla bík dumítki notpubito, odokké bík alédém dosuggeːla yonsunamdém alédo pílíkto. 39 Édílo bím gogné Parosidé édém kaːton, bí aíém lusuto, "Séː taniːséː lungor-lunéka:mílo, bí kinyai bím gakkíné néːdé kapin néːngkon émnamdém-kapilaːné bí imur-inékai."
40 Jisubí bím lulatsuto, "Simon, nom ngo oːkai lubipénamko dung."
Bí luto, "Luyír-abu, ngom lukítei."
41 "Tani annyikoné murkongém murkoːbiponé taniːkoném bilatkupénammai. Aːko bím língko anggo murkong-anírém+ \fr 7.41 \ft Rumannok ako anírdé murkoːdé longékolok ager-gerdom paːnam amírkídíːko, odokké akondé yíngoko. 42 Bínyík annyiké séːkkésin bím bilatkupé murkongé kamangai, édémpila bí annyidok narponamdéméi lagikumaːbo émna mélígbito. Suːpag bínyik annyidok séːko bím aipé-méːyaːyén?"
43 Simonbí lulatsutoku, "Ngok méngkípé séːko bojéya:ngko murkongém bíkkolok narpongkaji.
Jisubí luto, "Nok méːnamdé méngabdag." 44 Odo bí néːdoːpé ngelatsuge:la Simonmé luto, "No séː néːsém kaːdon? Ngo nok okumsoːpé gíaːdung. No ngom alé sunan asikosin bitomang, émpigeːla bí bík miksiki ngok alésém írpunggeːla bík dumítki notputo. 45 No ngom dosuktomangd, émpigeːla séː néːsé, ngok gíaːdokkéboi ngok alésok dosugngasutomang. 46 No ngok dumítso tulangkosin yonbitomang, émpigeːla bí nampon-yonsunamém ngok aléso pílíkto. 47 Odok-légaːpé ngo nolum lubidung, bík bojéruːné imurdém méːyinsubitagbo-kapéné bí bojéruːngko aipé-méːto. Émpigeːla séːkom ajjiko méːyinsubitagji bí ajiiko aipé-méːdag."
48 Odo Jisubí néːdém luto, "Nok imurém méːyinsubitagbo."
49 Akon mibokídíːdé buluk arangíːdo luropkang, "Imurémsin méːyinsubilaːné séːkobín bí?"
50 Jisubí néːdém luto, "Nok méːjíksunamdé nom moturto; ansíngoːpé gíkangku."