Ammem Kébaːbaːnam
(Luk 6.37-38; 41-42)
7
"Kébangém banggoyok, odo nolumsin kébangém ba:maːyé. 2 Nolu kappar ammem kébangém ba:doji, nolumsin édémarpé ba:yé, odokké oko kínanékokki nolu kíla bidoji, édé kínnínodokki nolumsin kínala biyéku. 3 Nok aíké amigdok du:né ísíng-attuːdém ka:suma:pé kapé no nok bírodok amigdok takoddém kaːbegdun? 4 Émpige:la no nok aíké amigdok appíng ayírdo duːné ísíng-attuːdém kaːsumaːpé, kapé no nok bírodém lulangkan, 'ka:so nok amig takoddém ngo darpagbisoi?' 5 Nolu séumonékídínga, aíké amigdok ísíng-attuːdém darpaksupoːtok, odok lédupé no nok bírodok amig takoddém naréngo:pé darpagbilaːyépé.6 Okodé angunnéji édém ikiyém biyok; odokké nok bakorém e:gém érrígbiyok. No érrígbimílo, édémbulum bulu aléki sammíkpagyé, odokké églatsula nom atak atakpé sermíkpéké."
Kotok, Matok, Rankutok
7 "Kotok édém nom biyé; matok odo no mapasuyé; ranku:tok odo nok léga:pé yabgodém síggebiyé. 8 Kapéné sé:koi koyéji bí pa:yéru:ng; sé:kobí mayéji, mapasuyeru:ng; odokké sé:kobí ranku:yéji, bíkképé yabgodém síggeru:biyé. 9 Nolukkolok séːko, bík aoːdé pitangko komílo, bím ílíngko bidon? 10 Odokké bí ongoko komílo, bím tabíko bidonei? 11 Émpigeːla nolu aisíman taniːgeːlaːsin noluk ommangém ainé amaném bikindo, émpém noluk tayéng Abubí éddíko aiyaːné amaném biyéji sé:kobulu bíkkolok koyéji!
12 Amme nom okkom iladdokuém aipé-méːdoji bulumsin édémíng ilang. Kapéné Musiːké Luroːdoːla Lungorkídí:do édémbuluméi luyírtag."
Ponmenéla Pontan Séːturdé
( Luk 13.24)
13 “Ponmeːné sé:turdok gía:lang. Kapéné bottéːnédé sé:turdé odokké pontanédé lambédé okodé sikodo:pé gíbodagji, odokké bojéru:ngkoné odok gía:dag.a 14 Émpige:la ajjinédé sé:turdé odokké ponmeːnédé lambédé okodé turkodo:pé gíbodag, odokké ako-annyongkoné édém mapasudag."
Ísíngkolaː Odok A:yédé
( Luk 6.43-44)
15 “Aroman lungor-lunékídí:dém totsulang. Bulu meːr kísapé kangkosula nolukkolo:pé gíye; émpige:la araːpé bulu makkeresiya:né lampiyangé.b 16 Buluk agerdokki bulum nolu kangkinyé. Nolu songkír-tanglok angurém pírdolang, odokké tanggomnok tajígém pírdolang? 17 Édémpila appíng ainé ísíngé ainé a:yém eːdo, émpige:la aiman ísíngkoné aiman a:yém eːdo. 18 Ainé amíngkoné aiman a:yém eːla:mang, odokké aiman amíngkoné ainé a:yém e:lamang. 19 Ainé a:yém e:man amíng appíːdém kértabamge:la umílo érrígyé. 20 Édémpé, buluk a:yédokki nolu bulum kangkinyé."
Ngo Édíloːsin Nolum Kinmangai
21 "Ngom 'Ru:tum, Ru:tum,' émna gogné appíngé, tayéng-among migomdokodo gíama:yé, émpige:la sé:kobí ngok tayéng Abuké mé:namdém iyéji bíːpag gíaːyé. 22 Odo longédo bojéru:ngkoné ngom luyé, 'Ru:tuméí, Ru:tuma, nok aminno ngolu lungorém lumanga:lang, odokké nok aminno ngolu ui:yém ménnenma:ngalang, odokké bojéru:ngko mé:píla:maːnam agerém ngolu germanga:lang? 23 Odo ngo bulum naréngoːpé lubiyé, 'Ngo nolum édíloːsin kinmangai. Ngokkosokké géːrkang, nolu aimaːnékídínga!'"
Okum Moné Taniːannyi
24 "Odok-légaːpé sé:kobí ngok séː agomkídí:sém tadge:la édémbulum ibomdagji, bí mé:joːné tani kísako sé:ko bík okumdém torné-ílíng tayé:lo motag. 25 Podongé ododo, pumi-assé pungadodo, odokké ésaré sarra édé okumdoːpé níngadodo, édé otabma, kapila:né édém torné-ílíng tayé:lo aksaːtag.
26 Émpige:la sé:kobí ngok séː agomkídí:sém tadge:la, édémbulum ibomma:ji bí makkorné tani:ko sé:kobí bík okumdém sulli tayé:lo motang. 27 Podongé ododo, pumi-assé pungadodo odokké ésaré sarra édé okumdoːpé saradodo; édé omíg-osígla otappagyé.”
Jisuké Ilang-gílaːnamdé