Bidumsunam
6
"Ansulang, tani: kangga:lo bulu kaːyépé émna noluk 'arolok-duːnam agerém léngkanyok. Nolu léngkanmílo, noluk tayéng Abukolok paːpénam amaném nolu pa:ma:yé.2 Édémpila édílo nolu laginém bidumsudoji, murong-okumnoːlaː lambélo, taniyé bulum ménggésuyépé émna kapé séumonékídé:dé idon, édémpé tuːtok mudla édém lugo:suyok. Ngo nolum arodém lubidung, bulu buluk pa:pénam amandém pa:bíttobo. 3 Émpigeːla édílo nolu laginém bidumsudoji, nok lakke alagdé okkom iduːji édém nok lagbíg alagdé kinpé lagimang, 4 édémpimílo nok binamdé ammem-kinmap binamé. Odo nok Abubí, sé:ko binamdém kinmap ka:duːji, bí nom bipénam amaném biyéru:ng."
Kumnamém Luyírbinam
5 “Odokké édílo nolu kumdon, séumonékídí:démpé kumyok, kapéné bulu murong-okumkídíːdo dagla odokké lambé sungkenno amme ka:yépé émna kumníːdag. Ngo nolum arodém lubidung, bulu buluk pa:pénam amaném píːsíːdo:pé pa:bíttobo. 6 Émpige:la édílo nolu kumdoji, noluk soyardo:pé gía:la yabgodém síkkapsuge:la séːkom ka:begmaːji, noluk Abukolo:pé kumnang. Odo noluk Abubí, sé:ko noluk ammem-kinmomap inamdém kaːtoji bí nolum amaném biyé.
7 Odokké édílo nolu kumdoji, uiːkumnékídí:démpé lurugoːdém lutílduːyok, kapéné bulu bojéko agom lunamdém taddupé émna mé:dag.a 8 Bulukkémpé kumyok, kapéné nolu okkarém lagidagji édém noluk komangoːdapé noluk Abubí kindag. 9 Édémpila nolu sémpé kumnangː
'Tayéːtok duːné ngoluk Abu,
nok aminé angunnka:langka,
10 Nok migomdokodé angka:langka,
tayéng-amongíːtémpé mo:písoːsin nok méːnamdé ika:langka.
11 Ngoluk siloké dopénammém ngolum bilang.
12 Kapé ngolu ngolum imurném méːyinsubitagji
Édémíːpé ngoluk imurém ngolum méːyinsubilang.
13 Ngolum anka:loːpé gíboyok,
émpige:la aima:nélokkém ngolum mopídbilang.
14 Noluk kekonpé imurném nolu méːyinsubimílo, noluk tayéng Abubí:sin nolum méːyinsubiyé. 15 Émpige:la nolu tani:lok imurém méːyinsubima:mílo, noluk Abubíːsin noluk imurém méːyinsubima:ye."
Mennam
16 "Odokké édílo nolu mendon, séumonékídí:démpé noluk dumsu-migmodém imoyok, kapéné bulu ammem menna dung émna kaːdopé buluk dumsu-migmodém mé:dírra duːmodag. Ngo nolum arodém lubidung, bulu buluk pa:pénam amaném pa:bíttobo.b 17 Émpigeːla édílo nolu mendoji, noluk tukkuːlo tulangém yonsulang, odokké mamug-lasug sulang, 18 édémpimílo noluk mennamdém amme kangkinma:yé, émpigeːla noluk Abubí séːkom kaːbegmaːji, bí kinyé. Odokké noluk Abubí, séːko, nolu okkom amikaːmap ikan édém kaːbeksula, nolum amaném biyé."
Tayéng-amoːtok Mitémirém
19 "Noluk aíké léga:pé mo:píso bojéko murkongém mékumsuyok, okolo tapumé píddoji, argomé bugdoji, odokké okolo dopsongé moyagla dopsodagji. 20 Émpige:la noluk aíké légaːpé tayéng-amo:tolo mékumsulang, okolo tapumé pídmaːji, argomé bugma:ji, odokké dopsongé moyagla dopsolaːma:ji. 21 Kapéné okoloi noluk ompotiyé du:yéji, oddoi noluk asindéːsin du:yé"
Amírdok Pia:dé
22 “Amigdé amírdok seraki:dé. Noluk amigdé aimílo, noluk amír appíːdo píangé píːsíːla du:yé. 23 Émpige:la noluk amigdé aima:mílo, noluk amír appíːdé kémo:jíjíːla du:yé. Noluk araːdok du:né pía:dé kémomílo, méngkítok édé kémodé éddíko kémojíjíːdagji!"
Ruːnébíːlaː Kanamsíːnam
24 "Sé:kosin atéroːdé ruːtum annyikolok agerém gerbila:mang. Bí akoném tayumyé, odokké akondém aipé-méːyé, émmamílo bí akolok agomém tadyé odokké akondokkém tadmaːyé. Nolu Ru:nékélaː Murkongké agerém lékkopé gerramang.
25 Odok-légaːpé ngo nolum lubidung, nolu okkom doyé-tíːyén émna, noluk aíké turnam légaːpé; odokké okkom géyebomyén émna noluk amírdok léga:pé mé:díryok. Turnamdé donam-tíːnamdémyang, odokké amírdé génam-bomnamémyaːsin bottéya:ma:nei? 26 Doːmírtok dénggon péttangkídí:dém ka:tok, bulu pitsinmang, gatsinmang odokké kumsuːlo:sin jongkumsumang, émgom noluk tayéng Abubí bulum donamém bidag. Nolu bulumyang bojéru:ngkopé arré kaya:ma:lang? 27 Nolukkolok sé:ko mé:dírra bík turnamdo longéko tursedlaːdang?c
28 Odokké kapila nolu génam-bomnam légaːpé mé:dírdon? Aríglok lili appunkídíːdém kangkítok, kapé bulu míːtadon; bulu agerém germang odokké onnomsin kémang. 29 Émgom ngo nolum lubidung, Solomonké írgaːné appíːdok a:ko:sin buluk ara:sok akolokkémyaːsin kangkanyap gémangai.d 30 Ru:nébí aríglok nésiném édémpé gémo-bommomílo, okodé silo so dun odokké yampo umílo gélígyé, bí nolum édémyang bojéyangko gémo-bommoma:ye:nei, nolu ajjiko mé:jíksunékídínga?
31 Édémpila 'Okkom ngolu doyén? Okkom ngolu tíːyén? Odokké 'Okkom ngolu géyé- bomyén émna lula?' odogbuluk légaːpé mé:díryok. 32 Kapéné uiːkumnékídíːdé odogbuluk lédulo duggomíndag; odokké noluk tayéng Abubí kindag sémbulum nolum lagidag émna. 33 Émpige:la bík migomdokodém mapoːlang odokké bík arolok-duːnamdém, odokké édé laginam appíːdém nolum bí biyé. 34 Édémpila yampoké légaːpé mé:díryok, kapéné yampobí aíké légangé yampo mé:dírsuyépé. Longédé longgí:do bojéko ngasodém pa:su:dag.