Adi Tayé:do Jisuké Luyírbinam
5
Édílo bí tani kéré:dém kaːton, bí adi tayéngkoloːpé gísaːla tetkang. Bíkkol luyírsunékídí:dé bíkkodo:pé gísa:do. 2 Odokké bí bulum luyírrobito:3 “Yalolo opannékídí:dé ayang-pa:né,
kapéné tayéng-among migomdokodé bulukké.
4 Mé:dírra du:nékídí:dé ayang-pa:né,
kapéné bulum mé:pom biyéku.a
5 Ajji:sunékídí:dé ayang-pa:né,
kapéné mo:disé buluk panggo.b
6 Arolok-du:nam légangé kéno-tíːlíːnékídí:dé ayang-pa:né,
kapéné bulum pí:síːdopé biyéku.
7 Asin-ayangém léngkannékídí:dé ayang-pa:né;
kapéné bulumsin asin-ayangém léngkanyéku.
8 Asin-a:pí naré:nékídí:dé ayang-pa:né;
kapéné bulu Ru:némé kaːpa:yéku.c
9 Léko-mokunam ager-gernékídí:dé ayang-pa:né;
kapéné bulum Ru:néké ommangé émna luyé.
10 Arolok-du:nam légangé ipusire pa:nékídí:dé ayang-pa:né;
kapéné tayéng-among migomdokodé bulukké.
11 Édílo taniyé nolum lukaːla ipusireyéji odokké nolu ngokkolo gímínné émna noluk kekonpé appíng aimaːnammém taniyé luyéji odo nolu ayang-pa:nékídí:dé. 12 Mé:yumsula mé:polang, kapéné tayéng-amoːtok noluk paːpénam amandé bottéruːyé; kapéné nolumyang poːpéloːbo lungor-lunékídí:dém bulu édémíːpé ipusireka."d
Alodéːla Píaːdé
(Mark 9.50; Luk 14.34-35)
13 "Nolu mo:písok allo. Émpige:la alodé, bík tiːnamdém yogmomílo, édém lékoda kapé tiːmoyékun? Taniyé sammígdoːpé gélennígmaːmílo, anguruːpé bíkké oko agerésinei kamabong.
14 Nolu mo:písok píaːdé. Adi tayéngkolok nogordém kupsilaːmang. 15 Taniyé serakiːko baːnodge:la batikolo édém édíloːsin kulubla lé:mang. Émpigeːla édém tígéngkolo tíla léːdo, odo édé okumdok appíːloi píamodag. 16 Édémpila, noluk pía:dé tani: kanggaːlo píangka:langka, odo bulu noluk ainé ager gernadém ka:begyé, odokké noluk tayéng Abumé luyitsuyé."
Luroːdém Luyírbinam
17 "Ngo Musiːké Luroːdémnaː lungor-lunékídí:dok luyírnamkídíːdém ipitsiyitkolo gídung émna nolu méːyok; ngo bulum ipitsiyitkolo gímang; émpigeːla bulum ilet-gíledbikolo gídung. 18 Ngo nolum arodém lubidung, édíloːpé tayéng-amoːtélaː mo:písé duːyaryéji, odoloːpé amepagyaːné abígdé, adnamnok nígjednamko, buluk agerdém iledmaːsissém kapésinéi Luroːdokké yogmaːyé. 19 Lulígnamkídí:sok amepagya:nédém séːkai imap igeːla akonémsin édémíːpé ima:dopé luyírmílo bím tayéng-among migomdokodo amepagya:né émna sabyé, émpigeːla sé:kobí séː lulígnamkídí:sém ibomgeːla akonémsin idopé luyíryéji bím tayéng-among migomdokodo botténé émna sabyé. 20 Kapéné ngo nolum lubidung, Parosiélaː luro luyírnékídí:démyang noluk arolok-du:namdé édílo:pé abamaːyéji, odolo:pé nolu tayéng-among migomdokodo:pé aroru:pé gíala:ma:yé."
Aglíng-saːnam Tayéːlo Luyír
21 "Lekeké taniːkídíːdok séː lunamsém nolu tattupé, 'Taniyém mokeyok, sé:koi mokeyéji bím kébangém ba:yeruːng.’e 22 Émpige:la ngo nolum lubidung sé:koi bík bírodok tayéːlo aglíːyéji bímsin kébangém ba:yeruːng. Lékoda, ngo ludung sé:koi bík bírodém ‘Agerkamaːné’ émyéji, bí Jiudi Ki:ni Kébaːdo dakkanruːsupa:yé. Émpige:la sé:koi, ‘No makkoraǃ émna lumílo, pésso no uiːamo:bok dorné umídoːpé gíkaruːbof. 23 Odok-légaːpé, no nok palíkpénam amandém runggudo palígduːmílo odokké nok bírodokké nok kekonpé oːkaiko dung émna édém no odo méːpaːdung, 24 nok amandém runggu kérangíːdo mépolang. Odokké gíla nok bírodokki lékopoːtaku; odokké gíladlangkula nok amandém palíglangku.
25 Kasaridoːpé gíla duːdodo nok mirudok lédílo lambédoi aisugorrangku, émmamílo nok mirudé nom kébaːmigomdok alaglo tolíkpéké, odokké kébaːmigomdé sipai alaglo tolígla, odok lédupé nom makanaːlo tumpéké. 26 Ngo nolum arodém lubidung, édílo:pé nok murkongém bijinjirinna bingabma:yéji odolo:pé no gílennangkumaːyé."
Benggonam Ager
27 “Séː lunamsém nolu tatkítuːpé, ‘Benggoyok.’g 28 Émpige:la ngo nolum lubidung, sé:koi mimékoném asinki méːbola ka:mílo bí bík lédílo asin araːbo sibeːém be:toibo. 29 Nok lagbíg amigdé nom paːbém imomílo, édém karpaksuge:la érpaktok. Nok amírdok intakko kamanamdémyang amír appíːdé uiːamo:pé gímanamdé aiyaːdag. 30 Odokké nok lagbíg alagdé nom paːbém imomílo, édém papaksuge:la érpaktok. Nok amírdok intakko kamanamdémyang amír appíːdé uiːamo:pé gímanamdé aiyaːdag."
Mépakkaːmínsunam
(Moti 19.9; Mark 10.11-12; Luk 16.18)
31 “Sémpé lula léːtag, 'Sé:koi bík yamnédém mépagyéji; mépagnam adnamkosin biparuːyé. 32 Émpige:la ngo nolum lubidung, ammem langkosunamdok ruːyipé sé:koi bík yamnédém mépagyéji, bí bím langkosunépé imodag, odokké sé:ko mépagnam né:dém midaːmoyékuji bí:sin benggonépé idag."
Pesunam
33 “Lékoda ludung, nolu tatkítuːpé lekeké taniːkídíːdém lunamko, ‘Aromaːpésin nolu pesuyok, émpigeːla Ruːtumké aminno okkom pesutagji édém ilang.h 34 Émpige:la ngo nolum ludung, ‘Tayéng-among aminno, émpésin pesudanyok’, kapéné édé Ru:nék migom-tetkodé; 35 mo:písok aminno:sin pesuyok, kapéné séː bík lépo tugapkodé, Jerusalemké aminkisin pesuyok, kapéné édé Kínggíːné Migomké nogordé.i 36 Odokké noluk tukkum pigapsula pesuyok, kapéné no dumít asongkosin kampo-yaka molamang. 37 Édémpila nok éí émnamdé éíːpé ipélagidag odokké nok ma: émnamdé, maːpé ipélagidag, édémyang abaya:mílo édé ui:lokké a:dag."
Alíg-Lígnam
38 “Séː lunamsém nolu tatkítuːpé, ‘Amiglok alígdé amigé, odokké i:paːdok alígdé iːpangé.j 39 Émpige:la ngo nolum lubidung, aiman tani:yém lutumyok. Sé:kai nok lagbíkké migmodok pimílo, lakkedoksin pikosulang.k 40 Sé:kai nom kéba:baːla nok galugém laːpagmílo, nok gétémnam galugdémsin bím bitémnang. 41 Sé:kai nom bolboda:pé mailkopé gímomílo, bík lédílo mail annyikopé gílang. 42 Sé:koi nokkolok koayéji bím bilang, odokké sé:kai nokkolok narpoːmílo bima:pé du:yok."
Noluk Miruém Ayaːlang
(Luk 6.27-28;32-36)
43 "Sémpé lunamém nolu tatkítuːpé, ‘Noluk kumrí-doːrém aya:lang odokké noluk miruém tayumnang.’ 44 Émpige:la ngo nolum lubidung: Noluk miruém aya:lang odokké nolum ipusirenékídíːdok légaːpé kumbilang, 45 odopag nolu noluk tayéng Abuké omma:pé iyépé. Kapéné bí bík do:nyimé aima:nélaː ainélok tayé:lo ka:modag odokké arolok-duːnélaː duːmaːnékídíːdok tayéːlo bí podongém omodag. 46 Nom aipé-mé:noːngém no aipé-mé:mílo, nokké oko amané dun? Urnam-murkongém urnékídí:désin édémpé imaːnei? 47 Odokké nolu noluk bírrangkídí:ngoːdém kumríksumílo, ammemyang nolu okkom iyaːton? Uiːkumnékídí:déːsin édémpé imaːnei? 48 Odok-légaːpé, nolu aibíndanna ailang kapé noluk tayéng Abubí aibíndanna aidang.