Jisubí Kiladuːné Taniːkoném Ésaːmokunam
14
Yoddo longékolo, édílo Jisubí ménggésunam Parosikolok okumdo apin dokolo gíton, taniyé bím kéraːlokké kaːla dungngai. 2 Odokké kangkítok, odo bík kanggaːdo alé-alag bíːla kiladu:né taniːko dungngai. 3 Jisubí Parosikídíːdémnaː luro luyírnékídí:dém tauto, "Yoddo longéso kila duːném ésa:mopa:dakkuyé ésaːmopangkuma:yé?"4 Émpige:la bulu asoːpé dungapkang. Édémpila bí tani:dém pigabgeːla bím ésaːmogeːla mélíktoku. 5 Odo bí bulum tauto, "Nolukkolok sé:kkaiké aoːkomanggom so:boko duːmílo odokké édé yoddo longékolo sirungkolo oa:mílo, nolu lomdanna bím sosangkumaːpé duːyénei?"
6 Odo bulu okkomsin lulatsulatomang.
Ajjisunamélang Mibo-bonam
7 Édílo mibokídíːdé ménggésunam mibo tetkodo tetpé émna magola duːnamdém Jisubí kaːton, odo bí sé: luyisula lunamsém bulum lubito: 8 "Édílai séːkai nolum midaːdokapé gogmílo, ménggésunam taniːlok tetkolo tedayok, kapéné nomyang ménggésuyaːnam taniːyém bí gogla léːtuːpé. 9 Édémpimílo, noyim sé:ko goktuːji bí nokkodoːpé gígeːla nom lulaːdo, 'Nok tetkodém sé: tani:sém bitokai.' Odo no anyisula émmumnélok tetkolo tetpaːyéku. 10 Émpige:la nolum gogyémílo, appíngémyam ajjiyangkolok tetkolo tedlang, édémpidodém édílo nom gognédé kaːsuyéji, odo bí nom luyé, 'Ajona, aiyangoːkodoːpé ngetsaːla tettokai.' Odo nok tedjonsunam takam mibokídíːdok kanggaːlo no ménggésunammém paːyé.a 11 Kapéné sé:kobí aíém bottépé mé:suyéji bím ajji:moyé, odokké sé:kobí aíém ajji:suyéji bím botténépé imoyé."
12 Odo Jisubí bím gogné tani:dém luto, "Édílo no longé manggom yummé apiném dobo-tíːbodon, nok ajoném, bírrangém, aíːtaniːyémmanggom nok mirémné kumrí-doːrém goksuyok; no gogmílo bulusin nom goglatsuyéku, odokké édémpé nok paːpénammém no paːladamsuyéku. 13 Émpige:la édílo no botténé donamko dobo-tíːbodon, opanném, lambé-gílamaːném, lésu-lébeném, migluném, goglang, 14 odo no ayang-paːnépé iyé. Bulu nom okkomsin bilatsulangkumanggom, arolok-duːnékídíːdok lékod-turdokudodo nom bipénamkídíːdém biladamyéku."
Bottén Gíːdíːko Luyisula Lubinam
(Moti 22.1-10)
15 Édílo bík lédílo tebuldo dojonsula duːné miboko édém tatton, bí Jisumé luto, "Ru:nék migomdokodok gíːdíːdém dopaːmínné taniːdé ayang-paːné."
16 Émpigeːla Jisubí bím lulatsuto: "Tani:koné bottapagné donam-tí:namko moninsugeːla bojéru:ngko mibbom gokto. 17 Dodí-tíːdí ayírdé a:dokudodo bí bík pagbokoném gognam mibokídíːdém gogladdokupé mélíkto, 'Gítobong, kapéné suːpag appíngéi obokaːbo.' 18 Émpige:la bulu appí:dé lékkopé lusuksubomkang. Lupongarnédé luto, 'Símsíːrong ngo aríg-amongko réto, odokké ngo gídangeːla édém kaːpénammé. Ayaːla ngom méːyinsubilaːbong.' 19 Akondé luto, 'Símsíːrong ngo íyíngkopé soːbom réto, odokké bulum al-gíyírkolo ngo suːpag gídag. Ayaːla ngom méːyinsubilaːbo.' 20 Odokké akondé luto, 'Símsíːrong ngo yamném laːtag, édémpila ngo gípolaːmaːbo.' 21 Pagbodé gíladlangkula bík ru:tumdém édémbulum lubitoku. Odo okum ru:tumdé aglíngé saːla bík pagbodém lulíkto, 'Lambékídíːdoːpélaː taonpé gísukkunam bédangkídíːdoːpé lomdanna gíkang odokké opanném, lambé-gílamaːném, migluném, odokké lésu-lébenékídí:dém gíabolangku.' 22 Pagbodé luto, "Éː ruːtuma, nok lulígnamdém itagbo, émgom su:péːsin dungko duːda.' 23 Odo ru:tumdé bík pagbodém luto, 'Bottén lambékídíːdoːpélaː doːlung gísukkunan bélamkídíːdoːpé gíkang, odokké taniːyém bolbodapédaggom gíabotoku, odo ngok okumsé: biːyé. 24 Ngo nolum lubidung, édé gognam tani:kídí:dok a:kosin ngok bottépé donam-tíːnam dobonamsok yakkapésin pa:ma:yé.' "
Luyírsunélok Bipénam Aré
(Moti 10.37-38)
25 Longékoném édílo bojéruːngko taniyé Jisuké lédílo gímínna dungngan, bí bérratsugeːla bulum luto: 26 "Sé:koi ngok lédulo gímíngeːla bík anédém, abudém,yamnédém, ommangém, bík bírrom bírmom, éddomang bík aíémsin Ruːnéméyang asinang-oyamílo; bí ngokkol gímínnépé ila:mang.b 27 Odokké séːkobí bík aíké kurusdémc joːsula ngok lédulo gímínyéji bí ngokkol luyírsunépé ila:yé.
28 Nolukkolok séːkai oudné kanggapkoko mo:pé méːdumílo, édém monapé éddíko lagiyen, odokké molednapé píːnamko murkongé duːyé kamaːyé édém bí tedgeːla sappoma:yélang? 29 Kapéné bí aksaːlíggeːla édém mopínnamaːmílo, édém ka:né appíngé bím yirkaːyé, 30 bulu sémpé luyé, "Sé: taniːsé: akpéːaksaːto, émpigeːla mopínnaːtomang.' 31 Émmamílo méngkíto, migomkoné migomkolok kekonpé mimag mokolo lendung, bí tedgeːla mé:poma:yén bík lí:yíng íyíːdé bím moaːné lí:yíng íyíng-annyidém morasulaːyén morasulaːma:yén émna? 32 Bí pagla:ma:mílo, akondé mo:téːpé du:dodoi taniːyém mélígla ansíngopé duːjonsula:nam lambéko mayé. 33 Odok-légaːpé nolukkolok sé:koi bík kanam appíːdém mépagammaːyéji bí ngokkol luyírsunépé ila:mang.
Aré-kaman Alo
(Moti 5.13; Mark 9.50)