Yogné Meːrdé
(Moti 18.12-14)
15
Longékoném murkong urnélaː imurné Jisuké luyírnamém tatkolo gíkumsukang.a 2 Émpige:la Parosikídí:dé:la luro luyírnékídíːdé bínbínaila luto, "Sé: tani:sé imurném boríksugeːla bulum dojonsudag." 3 Édémpila Jisubí sé: luyisula lunamsém bulum lubito:4 "Méngkangkítok nolukkolok séːkkaiké língkoko meːré dung odokké odok adorko yogmílo. Bí naːyíngkola: konaːdém moːrongkolo mége:la odokké édé yogné meːrdém pangkumaːsissém magapkolo gímaːyénei? 5 Odokké édílo bí édém paːyékuji, bí méːpola édém bík gorduːdo jo:saːsuyé 6 odokké bí okumpé gílangkula bík ajoném, kumrí-do:rém lékkopé gokkumsugeːla luyé, 'Ngok lédílo méːpomíntok; ngo ngok yogné meːrdém pa:toku.' 7 Ngo nolum lubidung, édémarpé iyé, imurné akolok méngkutsunam légaːpé tayéng-amo:to méːpoyaːyé naːyíngkola: konangko arolok-duːné taniːkídíːdémyaːsin séːkobulum méngkutsukunamém lagimaji.
Yogné Anír Murko:dé
8 Émmamílo méngkítok, mimékolokké íyíngko murkolok anír murkongé dungngai odokké odok apirko yokkang. Bí serakiːko baːnodgeːla édém pangkumaːsissém sampékpédla édém mabíndanna makumaːyélang? 9 Odokké édílo bí édém pa:yekuji, bí bík ajoném, kumrí-do:rém lékkopé gokkumsugeːla luyé, 'Ngok lédílo méːpomíntok; ngo ngok yogné anír murkoːdém pa:toku.' 10 Ngo nolum lubidung, édémarpé iyé, Ru:néké tayéng-yaːmekídí:dé imurné akolok méngkutsunam tayéːlo mé:poménganyé."
Yogné Ao:dé
11 Jisubí luyartíto, "Taniːkolokké ao annyiko dungngai. 12 Amené aoːdé bík abudém luto, 'Ba:ba, ngok paːpénam ompotidém ngom orteiboi.' Édémpila abudé bínyim orbipénam ompotidém orpansubito. 13 Odok longko-lonyi lédupé, amené aoːdé bík paːnam ompoti appíːdém langkumsugeːla moːténgkolo:pé gípakkang, odokké bí odo bík kanam-síːnam appíːdém pitsepidyamto. 14 Bík kanam appíngém pidamnam lédupé, édé mimoːdok appíːloi kínggíːné angkalko angkang, odokké bíkkoloːsin ngasodé aːropkang. 15 Édémpila bí gíla édé mimoːdok tani:kolo pagbopé du:to, sé:kobí bím bík arígdo e:gém kaːsíːdopé mélíkto. 16 Bí kénobatsula e:g ponyogéméi dogéto, émpigeːla sé:kosin bím dodopé okkomsin bitomang. 17 Émpigeːla édílo bí méngkinsutokuji, bí lusuto, 'Ngok ba:buké dorra lé:nam pagbokídíːdokké donamé dosedoyela dongadgédo:pé dung, émpigeːla ngo so kénola siyébo! 18 Ngo sokké darobla ngok baːbukoloːpé gíkupé, odokké bím lupéː "Ba:ba, ngo nok kekonpélaː Ruːnék kekonpé imurém ito. 19 Nok aoːo émna ngokké gokkosunan arré katomang; ngom nok dorra léːnam pagbo kísapé agerko bi.' 20 Édémpila bí darobla bík baːbukolo:pé gítoku.
Édílo bí moːténggampé gíla dungngakun, bík abudé bím kaːla aipé ayap-méːto, édémpila bí dugla gíla bím gonggato odokké bím dosukto. 21 Odo aoːdé bím luto, "Ba:ba, ngo Ruːnék kekonpélaː nok kekonpé imurém ito. Nok aoːo émna ngokké gokkosunan arré katomang." 22 Émpige:la abudé bík pagbokídí:dém luto, 'Lomna! Aiyapagné génamém langgeːla bím molíkto. Bík lagnédo angoti:ko odokké alédo létakko molíkto. 23 Jíːputtapudné so:bo-aoːko langanggeːla baːta, odokké kajé doman-tíːmanna mé:popolai. 24 Kapéné ngok sé: aoːsé: sikangai émpigeːla lékoda turdungku; bí yokkangai émpigeːla pa:takku.' Édémpila bulu mé:po-ménganrobbomkang.
25 Odo ayírdo abíné aoːdé arígolo dungngai. Édílo bí okum aninpé gípítokuji, bí ni:tom mola: soːla duːnamém tatpaːsuto. 26 Édémpila bí pagbokídí:dok akoném goggeːla tauto okko kapildun.' 27 Pagbodé bím lubito, 'Nok bírodé gídungku, odokké bím aikampopé pangkunam légaːpé, nok baːbubí jí:puttapudné so:bo-ao:ko ba:tag.' 28 Édém tadla bí aglíngé saːla araːdoːpé gíanggekuma émna ito. Édémpila bík abudé gílenna bím tatpoːpé luyinsuto. 29 Émpige:la bí bík abudém lulatsula luto, 'Kangkítok! Siddíkopé ngo nom ager-gerbila dung odokké nok lulígnam agomém édíloːsin tadmaːpé ikímang. Émgom no édíloːsin ngom soben-aoːkosin ba:bikímang ngok ajonkídí:dok lédílo méːpola donam-tíːmandoːpé. 30 Émpige:la édílo nok sé: aoːsé: gíladdungkun, sé:kobí nok orbinam murkong appíːdém benggoné né:ngkídí:do pidamton, no bík légaːpé jí:puttapudné so:bo-aoːko ba:dun!' 31 Abudé luto, 'Ngok aoːa, no ngok lédíloi lo:dísém dung, odokké ngokké okko duːji édé appíːdé nokké. 32 Édémpila ngolu mé:popénamé, kapilaːné nok sé: bírosé: sikangai, émpigeːla bí turdungku; bí yokkangai émpigeːla bím pa:ttakku.' "