Noluk Pa:blokké Méngkutsutoku Émmamílo Siyé
13
Odo ayírardo odok du:né taniːékké Galili taniːkídíːdok agomém Jisumé lubito, séːkobuluk íːyém Piladbí palígnam meːrkídíːdok íːi lédílo yonnusuton. 2 Jisubí lulatsuto, "Édé Galili taniːkídíːdém édémpé mokenammé, Galilidok duːné akke taniːkídíːdémyang bulu aiyaman taniːyai émna nolu mé:dang? 3 Ngo nolum lubidung, édé aromang! Émpige:la méngkutsumaːmílo, nolu appíngé édémíːpé singabyé. 4 Siloamdo oudné-díːsaːnamdéa dírjémnammé yí:nyikoném díngketo, díngkenamkídíːdé Jerusalemdok duːnékídíːdok appíngkémyang paːbém iyaːnékídíːdéai émna nolu mé:dang? 5 Ngo nolum lubidung, édé aromang! Émpige:la édíloːpé nolu méngkutsukumaːji, nolusin édémíːpé singabyé."Aːyé Eːman Tajíg Ísíːdém Luyisula Lubinam
6 Odo bí sé: luyisula lunamsém lubito: "Tani:koné bík angur-baːri:do tajíg amíngko letagai, odokké bí odok aːyem pírkapé gíto, émpigeːla apíkosin paːtomang. 7 Édémpila bí baːridém ka:síːné taniːdém luto, 'Kangkítok, dítak aumkopé ngo sé: tajíg amí:sok a:yém pírkapé gínamé idagbo, émpige:la ngo apíkosin pangkímang. Amíːsém té:paktobo! Kapila bím émmumpé saːlubla duːmoyén?' 8 Édé taniːdé lulatsutoku, "Migoma, sém sé: dítaksoːsin léngkapoːlai, ngo bím tagburgeːla aːrko yarríkpo:pé. 9 Lungying a:yé e:mílo, aikaːboǃ Odokké eːmaːmílo, sém téːlaːpébo.'"
Yoddo Longédo Jisubí Tungkuli:né Miméko Ésaːmokunam
10 Yoddo longékolo Jisubí murong-okum akolo luyírra dungngai, 11 odokké odo yí:laːpinyi dítakko yalokoné paːla léːnam kila-duːné miméko dungngai. Bí tungkuli:la ajjiːkosin tuːsa:la:mangai. 12 Édílo Jisubí bím ka:ton, bím goggeːla luto, "Ané, nok kinamdokké nom ésaːmotakkubong." 13 Jisubí bík alakki bík amírdok riːyidbinammé bagémpé oddar bí tuːsaːlangkangku odokké Ru:némé luyitsuto.
14 Émpigeːla murong-okumdok ka:síːnédé kínggíːpé aglíngé sa:la tani:kídí:dém luto, "Agerém gerpaːnam longgé longkéngko dung. Édémpila odo longékídíːdo gíla kinamém kaːpítkosulang, Yoddo longéso:mang.b"
15 Ru:tumbí bím lulatsuto, "Nolu séumonékídínga! Nolu appíngé Yoddo longédo noluk soːbom, gadongém rínna léngkodokké asi sunkolo taːbomna goːbommaːnei? 16 Émpém sé: mimésém, Abraamké omésém, sé:kom Ui:bí yí:laːpinyi dítakkopé rínggabla léːtang, Yoddo longéso kapila bím motubimaːyen?" 17 Édílo bí édém lutoji, bík miru appíːdé anyisukang, odokké bík méːpilaːmaːnam ager appíːdém kaːla tani:kídíːdé méːyumamsukang.
Pétu Ammodém Luyisula Lubinam
(Moti 13.31-32;Mark 4.30-32)
18 Odo Jisubí tauto, "Ru:nék migomdokodé okkom gésudang? Ngo okokki édém luyisubiyan? 19 Édé pétu ammokonémpé idag, okodém taniːkoné langge:la bík oying-baːrido pidlíkto. Édé saːla míːtané ísíng amíngkopé ikang, odokké do:mírtok péttangé odok réngkékídí:do asubém gi:to."
Kaːrdém Luyisula Lubinam
(Moti 13.33)
20 Lékoda bí lutoku, "Ru:nék migomdokodém ngo okokki luyisubiyan? 21 Édé kaːrémpé idag, okodém mimékoné langgeːla bojéruːngko pitaːlo yonnusuto odokké édíloːpé pitang appíːdé goːsamaːji odoloːpé yontíla duːto."
Ponme:né Yabgodé
(Moti 7.13-14,21-23)
22 Jisubí Jerusalempé gíla duːdodo taonkídíːdoglaː do:lungkídíːdok gípadla luyírbito. 23 Séːkai bím tauto, "Ru:tuma, ajjiːongkoi taniyé moturbinamém paːyen?"
Bí bulum luto, 24 "Ponme:né yabgodok gíaːnan lambéko malang, kapila:né ngo nolum lubidung, bojéru:ngko gía:pé émna makíyé émpige:la gía:lama:yé. 25 Léko okum ru:tumdé darobgeːla yabgodém síkkabye, odo nolu ruːyido dagla yabgodém ranna kumna luyé, 'Ruːtuma, yabgodém ngoluk légaːpé síggeteipén.' Émpigeːla bí lulatsuyéku, 'Ngo nolum kinmangéi odokké nolu okolokké gídun.' 26 Odo nolu luyé, 'Ngolu nok lédílo dojon-tíːjonsuka, no ngoluk lambékídí:do luyírbigodaggai.' 27 Émpige:la bí lulatsuyéku, 'Ngo nolum kinmangéi odokké nolu okolokké gídun. Aiman pagbokídínga, nolu appíngé ngokkosokké gé:ram!'c 28 Odo kabnam-riːnamélaː iːpang rékkérépsunamé kayé, édílo nolu Abraammé, Isagmé, Jakubmé odokké takam lungor-lunékídíːdém Ru:nék migomdokodo kaːbegyeji, émpigeːla nolum ruːyoloːpé gélennígye. 29 Taniyé sangga:tokké, oabokké, pékídokké, péya:dokké gílangkula Ru:nék migomdokodo gíːdí dokolo buluk tetpékodo tedaːye. 30 Émpigeːla kangkítok, lédupé gíkuné taniːkídíːdé gígéponé taniːpé iye, odokké gígépo:né taniːkídíːdé lédíyéku."
Jerusalemké Légaːpé Jisuké Ayang
(Moti 23.37-39)
31 Odo ayírdo Parosi ékké Jisukodoːpé gíge:la bím luto, "No sokké okolaipé gípakkang, kapilaːné Erodbí nom mokepé émna magola dung."
32 Bí lulatsutoku, "Nolu gíkang odokké édé mensaru:dém lubita, 'Ngo silo, yampo uiːyém ménnenyé, kiné taniyém ésaːmoyéku, odokké loumné longédo ngo ngok gerpénam agerdém gerredyé.' 33 Okkoi kapidaggom,silo yampo odokké roː ngo Jerusalempé gíyartípé lagidung; kapéné Jerusalemdok ruːyido kapésinéi lungor-lunékoné sila:mang!
34 Jerusaleméːí, Jerusalema, lungor-lunném mokenékídínga odokké nolukkolo:pé mélígnamkídíːdém ílíngki gékenékídínga. Nok ommangém ngo bojéruːngko moturbipé sapkíto kapé rogné porokkoné bík aoːkídíːdém bík alap kéígdo laglubla léːdon édémíːpé méngkítungai; émpigeːla nolu ikosulítomang. 35 Kangkítok, noluk Kumliːdé nolum mépagyé. Ngo nolum lubidung, 'Ruːtumké aminnok séːko gíduːji bí ayang-paːné émna' édíloːpé nolu lumaːyéji, odoloːpé nolu ngom lékoda kaːbekkumaːye.d"