Jisumé Ankaːnam
(Mark 1.12-13; Luk 4.1-13)
4
Odo Uiːbí Jisumé ankaːdopé Yalodé sullipotadoːpé gíbokang. 2 Yíːpi longékolaː yuméko mennam lédupé bí kénongkang.a 3 Odo Uiːbí bíkkodoːpé gíge:la bím luto, “No Ru:néké ao:déːmílo, séː ílíngkídíːsém pitaːpé idopé lulíkítok.”4 Émpigeːla Jisubí lulatsutoku, “Sémpé attagː ‘Taniyé pitangoːngém dola turmaːyé, émpigeːla Ruːnéké nappaːdok lenné agom appíːdokki turyé.’”b
5 Odo Uiːbí bím angunné nogorpé gíbokang, odokké bím kumli:dok mí:dum-tuːbogdo dagmoto. 6 Odokké bí bím luto, “No Ru:néké ao:déːmílo, aíé beryiːsukítok. Kapilaːné édém sémpé adla léːtagː
'Bí bík tayéng-yaːmekídíːdém nok légaːpé mélígyé, odokké bulu nom buluk alakki borayé, odo nok alédé ílíːlo tubjoksumaːyé.''c 7 Jisubí bím lulatsuto, "Sémpésin adla léːtag: 'No nok Ru:né Ruːtummé ankaːyok.'''d
8 Uiːbí bím lékoda aipé oudné adi tayéngkoloːpé gísaːbogeːla bím moːpísok takam migomdokokídíːdémnaː buluk írgaːnamkídíːdém léngkanto. 9 Odokké bí bím luto, "No ngom tungaːla kummílo séː appíːsém ngo nom biyé.'' 10 Odo Jisubí bím luto, ''Uiːyaǃ ngokkosokké géːrkang, kapilaːné sémpé attag: 'No nok Ru:né Ruːtumo:mé kumnang odokké bík ageroːngém gerrang.'"e 11 Odo Uiːdé bím mépagla gíkangku, odokké kangkítok, tayéng-yaːmeyé bím kaːsíːmosíːto.
Galiliːdo Jisuké Ager-gergot
(Mark 1.14-15; Luk 4.14-15)
12 Édílo Jisubí Jonmé makanaːlo tumtag émna tatpaːsuton, bí Galilidoːpé gílattoku. 13 Najareddokké gípagla gíla bí Kapernaumdo duːto, édé taondé Galili Paːta:dok kéradaggai, odokké édé Jebulunkélaː Naptaliké moːtag araːloːai. 14 Lungor-luné Jisoyaːké lunamdé ilet-gíleddopé édémpé ikangː 15 ''Jebulunké mongkélaː Naptaliké mongkédé, Jordondok gípadla gaːnéloːpé gíné lambédé,
Jiudiman taniːkídíːdok Galili,f
16 kémolok duːné taniːkídí:dé
bottaruːné píangko kaːpaːto;
odokké séːkobulu siko ugyum mongkélo dun
bulukkolo píangko píkangku.''
17 Édé ayírdokké Jisubí sémpé lula lugoːropto, ''Méngkutsutok, kapéné Ruːnéké tayéng-among migomdokodé píngadobo."
Jisubí Mosuːang Appiːko Gognam
(Mark 1.16-20; Luk 5.1-11)
18 Jisubí Galili Paːtang ragoːdo lambégíla duːdodo, bí bírokumsu annyiko kaːto, Simon, séːkom Pitorésin émdag odokké bík bíro Andriumé. Bulu paːtaːdo ésab érra dungngai, kapéné bulu mosuːangai. 19 Jisubí bulum luto, ''Ngok lédulo gímínto, ngo nolum tani érgabné mosuːapé imoyé.'' 20 Bulu oddar ésapkídíːdém lé:paggeːla bík lédulo gímínkang. 21 Odokké gíyarra gíla, bí bírokumsu annyikoda kaːbekto, Jebedi:ké ao Jemsmélaː bík bíro Jonmé. Bínyi bínyik abu Jebedi:ké lédílo ollung arangkolo ésab posíːla dungngai. Jisubí bulum gokto, 22 odokké oddar bínyí olluːdémnaː buluk abudém mépagla bík lédulo gímínkang.
Jisubí Ésaːmotoku
23 Jisubí Galiliːdok appíːlo gígoːto, buluk murong-okumkídíːdo luyírbigoːto, migomdokodok tatpon lutaddém lugoːbito, odokké appíng molamal duːnémna kinamém kaːpídbito. 24 Bík ager-gernamdok doːyíːdém Siriaːdok appíːlo kinapto, édémpila bangkí-bangkípé kila duːném bíkkodoːpé gíboto, séːkobulu kínggíp kila dungngan, uiːpaːnam, agrugiya, odokké yeːném, bí ésaːmotoku. 25 Bottén kéréngkopé taniyé Galili, Dikapolis, Jerusalem, odokké Judiaːdokkélaː Jordon kekonké moːtagdokké bíkkolo gímínto.