Jon Baptiské Lugoːbinam
(Mark 1.1-8; Luk 3.1-18; Jon 1.19-28)
3
Odo longékídí:do Jon Baptisbí Judiaːdok sullipotado lugoːbito, 2 “Méngkutsutokuk, kapéné tayéng-among migomdokodé píngadobo.” 3 Bí édé taniːdé sé:kom lungor-luné Jisoyabí lunoːbikan:“Sullipotadokké séːkaibí jéːla dung,
'Ruːtumké légaːpé lambédém síglennobito,
bík légaːpé bélamém yig émmotok.'”a
4 Jonké bédugasordé ut amítki sumnamai, odokké bík ígíːdo suktam jinrékko yéːréksudagai. Bí boldi-takomémna yumrang tangudém dodagai.b 5 Jerusalemdokkélaː Judiadok appíːlokké odokké Jordandok takam mo:taglokké taniyé bíkkodo:pé gílendo. 6 Odokké buluk paːbém ludesula bulu bík alaglo Jordan Abuːdo baptisém laːto.
7 Émpige:la édílo bí bojéko Parosiéla Soddukié bíkkodoːpé baptis langkolo gído:pé ka:ton, bí bulum lutoː “Nolu tabíké ommangkídínga! Sé:ko nolum a:péné aglídokké duggédopé lunobiton? 8 Méngkutsutak émna léngkanan a:yém e:lang. 9 'Abraambí ngolukképé abu kísapé dung.’ Édém nolu aíém lusulaːpé émna mé:suyok. Ngo nolum lubidung sé: ílíngkídíːsém Ru:nébí Abraamké ommaːpé imolaːdag. 10 Ígíːdém ísíngkídí:dok léppírbo pagablai lé:tuːbo, ainé aːyé eːman ísíng appíːdém kértabge:la umílo érrígyé. 11 Ngo nolum méngkutsukunam légaːpé asiki baptis bidung. Émpige:la ngok lédupé séːko gídu:ji bí ngomyang kínggíːyaːdag, sék létagdémsin ngo jo:bipé ngokké arré kamang. Bí nolum Angunné Yalokilang umíki baptisém biyé. 12 Bík opodé bík alagdo dung, odokké bí bík monora samkodém mopuːyé, bík aːmém kumsudo joːsíːyé odokké amyaːdém dorngasuman umído romnígyé.”
Jisumé Baptis Binam
(Mark 1.9-11; Luk 3.21-22)
13 Odo Jisubí Galiliːdokké Jordandoːpé Jonké alaglo baptis langkolo gído. 14 Émpige:la Jonbí bím bigeːma émna lutumna luto, “Ngo nok alakki baptisém laːpénammé, émpigeːla no ngokkoso:péi gídun?”
15 Émpigeːla Jisubí bím lulatsuto, “Su:pag édémpéi ipoːmoto; takam arolok-duːnamdém ilet-gílednam légaːpé baptis laːnamsé ngolukképé ipénam ageré.” Odo Jonbí togésuto.