Sanggatokké Méːjoːné Taniːlok Gínam
2
Édílo Erodbí Judiado migompé dola dungnan, odo ayírdo Jisumé Beteleːemdo oto, odokké kangkítok, sanggatokké méːjoːné taniyé Jerusalempé gído, 2 odokké bulu tauto, “Okolon bí séːkom Jiudilok migompé otang? Kapéné ngolu bík takardém sanggaːto kaːto odokké ngolu bím kumkolo gídung.”a3 Édílo migom Erodbí édém tatpaːsuton, bí ngapinsukang, odokké bík lédílo Jerusalemdok tani appíːdé. 4 Bí abíné miríːappíːdémnaː luro luyírnékídíːdém lékkopé gokkumsugeːla bulum tauto, "Kiristomé okolo oyen?”
5 Bulu bím lulatsubito, “Judiaːdok Beteleːemdo, kapéné lungor-lunédé édémpéi adla léːtag:
6 'Odokké no, Juda:dok Beteleːem mongkéno,
no kapésin Judaːdok migomkídí:démyang ameyamang;
kapéné nokkolokké migom dopénko lenyé
sé:kobí ngok tani Israelmé meːr-kaːsíːné kísapé ibiyé.'”b
7 Odo Erodbí méːjoːné taniːkídíːdém gogyula goggeːla éddarro takardé bukkan édém bulukkolok kinnato. 8 Bí bulum Beteleːempé mélígge:la luto, “Gígeːla ko:dém mamila magappoːta. Odokké édílo nolu bím magabyéji ngom lupaːlangku, odo ngo:sin gíla bím kumpé.”
9 Migomdok lunamdém tadnam lédupé bulu buluk lambélo gíkang, odokké kangkítok, bulu oko takardém sanggaːto kaːtagan édé takardé bulum gígébila gídag, okolo koːdé dungngaji odoːpé gígéboto, odokké odo dakkang. 10 Édílo bulu takardém ka:paːsutokuji bulu aipé mé:pokang. 11 Odokké okumdo:pé gíaːnammé, ko:dém bík ané Meriːbí bola duːdopé ka:bekto. Odokké bulu lébíːtunga:la bím kumto. Odo bulu buluk gasumkídíːdém taːsargeːla bím aíném, nampon romnamém odokké dunangém amanpé bito.
12 Odokké ma:nyibo bulum Erotkolo:pé gílatkumaːdopé lupaːnammé; bulu buluk aíké mimoːpé akon lambékolok gílatkangku.
Ijippé Dukpítsunam
13 Édílo bulu gíkangkuji, kangkítok, Ruːtumké tayéng-ya:meko Jusebmé ma:nyibo léngkansugeːla luto, “Daropto, ko:démna bík anédém Ijippé dukpítsubota, odokké ngo édílo:pé nom luma:yéji odoloːpé bollung duːlang, kapéné Erodbí ko:dém mokepé émna asudoukomíloi magoyé”.
14 Édémpila bí darobla ko:démna bík anédém yumé-yumépé Ijippé gípagbokang, 15 odokké odo Erotké simado:pé duːto. Okodém Ruːtumbí lungor-lunéki lunoːbikan édém ilet-gílednam légaːpé édémpé ikang, “Ijibdokké ngo ngok ao:dém goglentoku."c
Koːkangém Mokenam
16 Édílo Erodbí kinpíːton édé méːjon taniːkídíːdé bím yatto émna, bí kínggíp aglíngkang, odokké méːjon taniːkídíːdok lubinam ayírdém sabla Betele:emdoglaː odok kérangké du:né appíːdok milbong aoːkídí:dém sé:kobulu dítag annyikolaː édémyang ameyadagaji bulum pakedo:pé bí lulíkto.
17 Odo lungor-luné Jirimiaké lunamdé ilet-gíletkangː
18 “Ramaːdo kínggíːpé kabnam-
rínamémko tatpaːdung,
ommang légangé Raselbí,
lutupkosuma:pé kabdung,
kapila:né bulu katoma:bong.”
Ijibbokké Gílatkunam
19 Erodbí sinam lédupé, Ruːtumké tayéng-ya:meko Jusebmé Ijibbo ma:nyilo léngkansugeːla luto, 20 “Daropto, koːdémna bík anédém Israel mimoːpé gíbokangku, kapéné sé:kobulu ko:dém mokepé émna madagaji bulu singapkabong.” 21 Édémpila bí darobla, koːdémnaː bík anédém gíbola Israelpé gíkangku.
22 Émpigeːla Arkelasbí bík abu Erotké migom dokodo Judiaːdo migompé dodung émna édílo bí tatton, bí odo:pé gíkupé pésokang. Ma:nyibo lupangém pa:nam légangé, bí Galili moːdumpé gíkang, 23 odokké bí gíla Najaret taondo du:to. Édé lungor-lunékídí:dok lunoːla léːnamdém ilet-gílednammaiː “Bím Najarot émna gogyé."d