Moti
Motiké Tatpon Lutad
Jisu Kiristok Ta:toyaːyokídíng
1
Abraamké ao Debid, odokké Debitké ao Jisu Kiristoké ope:lok amin adgabla léːnam potindé.2-6 Abraambí Isakké abudé, Isagbí Jakupké abudé, Jakubbí Judaːkéla: bík bírrangkídí:dok abudé, Judaːbí Perejkéla: Jeraːké abudé, bínyik anédé Tamarbí, Perejbí Ejronké abudé, Ejronbí Ramkéa abudé, Rambí Aminadapké abudé, Aminadabbí Nasonké abudé, Nasonbí Salmonké abudé, Salmonbí Boajké abudé, bík anédé Raabbí, Boajbí Obetké abudé, bík anédé Rutbí, Obedbí Jesiːké abudé, odokké Jesi:bí migom Debitké abudé.b
6b-11 Debidbí Solomonké abudé, bík anédé Uria:ké yamnédé, Solomonbí Reːobomké abudé, Reːobombí Abija:ké abudé, Abijaːbí Asa:kéc abudé, Asa:bí Jeːosapatké abudé, Jeːosapadbí Jeːoramké abudé, Jeːorambí Ujjia:ké abudé, Ujjia:bí Jotamké abudé, Jotambí Aajké abudé, Aajbí Ijekia:ké abudé, Ijekia:bí Manasseːké abudé, Manasseːbí Amonké abudé, Amonbí Josiaːké abudé, odokké Josiaːbí Jekoniaːkéla: bík bírrangkídíːdok abudé édílo bulum Bebilonpé yébomkakuji.d
12-16 Bebilonpé yébomkunam lédupéː Jekonia:bí Siltielkée abudé, Siltielbí Jerubbabelké abudé, Jerubbabelbí Abiutké abudé, Abiudbí Eliakimké abudé, Eliakimbí Ajorké abudé, Ajorbí Jadokké abudé, Jadogbí Akimké abudé, Akimbí Eliutké abudé, Eliudbí Eliːjarké abudé, Eliːjarbí Mattanké abudé, Mattanbí Jakupké abudé, odokké Jakubbí Josepké abudé:ai, Meriːké milboːdé, Jisumé onédé, sé:kom Kiristo émdoji.
17 Édémpila Abraamkodokké Debitkodo:pé yíːlaːpi opeːko, Debitkodokké Bebilonpé yebomkudodo:pé yíːlaːpi opeːko odokké yébomkudodokké Kiristokodo:pé yíːlaːpi opeːko.
Jisu Kiristomé Onam
18 Jisu Kiristomé onamdé sémpé idaggai: Bík ané Meriːmé Josepképé mida:pé émna tatpírra léːtagai, émpige:la bínyi lékkopé duːjonsumangoːdapé, bím Angunné Yaloki amírro kadopé pa:to. 19 Émpigeːla bík milbong Jusebbí arolok-duːné tani:kai odokké bí bím taniːkanggapé anyisumogemang émna méːla asoːpé mépakpé méːto. 20 Émpigeːla bí édémpé mé:dodém, kangkítok, Ruːtumké tayéng-ya:meko bím ma:nyiːbo lénkansuge:la luto, “Debitké ao Jusep, Meriːmé yamnépé nok okumpé gíbokupénamdém pésoyok, kapila:né bí séːkom amírro kaladuːji bí Angunné Yalokolokké. 21 Bí aoːko oyé, odokké no bím Jisuf émna aminém minníkpaːyé, kapila:né bí bík tani:kídí:dém buluk imurkídíːdokkém moturbinédé.”
22 Okodém Ruːtumbí lungor-lunédokki lunola léːtang édé appíːdém ilet-gílednam légaːpé sémpé ikang: 23 “Kangkítok, mímbírko ko:ko amírro kala aoːko oyé, odokké bík aminém Immanuel émna minnígyé, (okodok légíːdé, "Ru:nébí ngoluk lédílo dung").g