Jisumé onam
(Moti 1.18-25)
2
Fn ,Odo ayírdo Ruman migom Kaisar Agostasbí Ruman migomdokolok appí:lo:pé amin adgabdopé migom lulígnamko lulíkto. 2 Séː amin adgappoːnam agersém Kuriniasbí édílo Siriya:do amo:ru:tumpé ila dungngan odo adgotpoːto. 3 Odo appíngé aí aíké taonpé aminém adgabmokakupé gítoku.4 Édémpila Jusebbí:sin Galilidok Najaret taondokké Debitké taon Judia:dok Beteleːempé gísa:toku, kapila:né bí Debitké opínélaː ope-éra:lokkai. 5 Bí odo:pé amin adgamokakupé Meri:ké lédílo gítoku, sé:kom bíkképé mida:da:pé tatpírra léːtagai, Meri:bí odo ayírdo amírro kala okíramna dungngai. 6 Édílo bulu odo dungngan, odo koːdém onan ayírdé píngangkang, 7 odokké bí bík obopo:lum aoːdém oto. Bí bím nísékki yedla kungkangkolo boyupto, kapila:né buluk léga:pé mibo-okumdo dungkoko katomang.
Meːr-ka:síːnélaː Tayéng-Ya:mekídíng
8 Odokké odok kéra:do meːr-kaːsínékké, buluk meːrkídí:dém aríglo yumédo kanggabla duːyubla dungngai. 9 Bagémpé Ru:tumké tayéng-ya:meko bulum dakkansuto, odokké Ru:tumké unjígdé buluk dungko appí:do unjíkkang, édémpila bulu kínggípé pésokang. 10 Émpige:la tayéng-ya:medé bulum luto, “Nolu pésoyok. Ngo nolum airu:pé mé:popénam ainé lutatko bombitag oko lutaddé takam tani:lok légaːpésin. 11 Siloké longéso noluk légaːpé migom aDebitké taonbo bMoturkubinémé obiag, bí Ru:tum Kiristobí.c 12 Odokké nolu koːko níséglo yedla kungkangkolo boyubla léːdopé pa:yé: Éddéi noluk légaːpé kanggoddé.”
13 Bagémpé kéréngkopé tayéng-amo:tok du:né tayéng-yaːmeyé édé tayéng-ya:medok lédílo dagmínna Ru:némé luyitsula luto,
14 “Írroi tayéːtok-duːné Ru:nékolo:pé,
odokké asin-ansíngé mo:písok taniːlo:pé sék tayéːlo bík ayangé duːdagji.”
15 Édílo tayéng-ya:mekídí:dé bulum mépagla tayéng-amo:pé gíkangkuji, meːrkaːsí:nékídí:dé luposuto, “Kajé ngolu Beteleːempé gíkajé odokké séː lubinamkídíːsém kangkai, okodém Ru:tumbí ngolum lubitagji.”
16 Édémpila bulu lomdanna gíla Meri:mé, Jusebmé odokké koːdém magapto sé:kom kungkaːdo boyubla léːtang. 17 Édílo bulu bím kaːbekton, okkarém ko:dok léga:pé bulum lubinoːbitungan bulu édé agomdém ammem lubitoku . 18 Odokké okodém meːrkaːsíːnékídí:dé bulum lubitoji, édé agomdém tadné appíːdé tadngaksuto. 19 Émpige:la Meriːbí édé agom appí:dém bík asinbo yegla lénggeːla méːyarra duːto. 20 Meːrkaːsíːnékídí:dé bulum lunoːbinamardémpé takamém tatpaːkaːpasunam léga:pé Ru:némé luyitsula gílatkangku.
Jisumé Amin Minnígnam
21 Piːnyiné longédo, édílo bím gatpugnan ayírdé píngangkan, bím Jisu émna minníkto, oko amindém tayéng-ya:medé aki araːbo du:madapé minnobikaji.d
Jisumé Kumliːdo Tolígnam
22 Musiːké adnam Ruːnék Luro lukamdémpé édílo píde ayírdé angkan, édém ibikolo Jusebbíːlaː Meriːbí bím Jerusalem kumliːdoːpé gíbola Ru:tumkolo tolíkto.e 23 Ru:tumké Luroːdo adla léngkamíːdémpé, “Obopoːlum milbong ao:dém Ru:tumkolo:pé bipaːyé”,f 24 odokké okkom Ru:tumké Luroːdo lula léːtuːji, édémpé palígnamko palígdopé: “Pékí pirnyikomanggom parong aoːpírnyiko.”
25 Odo ayírdo Simion émnam tani:ko Jerusalemdo dungngai, sé:kobí arolok-duːla Ruːnémé ménggésunékai. Bí Israelmé moturbikunémé toyaːla dungngai, odokké Angunné Yalobíːsin bík lédílo dungngai. 26 Ruːtumké pesubinam Kiristomé kaːpomaːdapé bí siporuːmaːyé émna Angunné Yalobí bím kinnomoto. 27 Yaloké gíbonamki bí kumli:dok araːdoːpé gía:to. Édílo ané-abudé ko Jisumé Ruːnék Luroːdok adnam ilot-gíloddém ibikolo araːdo gíabola dungngan. 28 Simionbí bím bík alagdo bogabgeːla Ru:némé luyitsula luto:
29 “Ru:tuma, kapé no lubisutang,
suːpag no nok pagbomé ansíngopé mélíkteikuboi.
30 Kapéné ngok amiksé nok moturbinam agerém kaːsutagbo,
31 okodém no takam tani:ké kaːpaːngkolo moninsutang,
32 píangkoném Jiudiman tani réngamé kaːnaːdopé
odokké nok tani: Israelmé unjígém léngkandopé .g"
33 Odo bík ané-abudé okkom bík léga:pé lutoji édém mé:pílaːtomang. 34 Odo Simionbí bulum peyubito odokké bík ané Meri:mé luto: “Israel ara:so bojéru:ngko taniːyém opagleddopélaː daksaːdokupé séː ko:sém mélíktag; odokké odok kanggotpé taniyé bík kekonpé luyé. 35 Édémpila bojéru:ngkolok asin araːbok mé:la duːnamém léngkanbiyé. Odokké yoksakoné nok aíké asindémsin níkkuryé.”
36-37 Odo Aserké opíndok, Panuelké omé, Anna émnam airu:pé miné-nékuragné lungor-luné mimékosin dungngai. Bík midaːmonam lédupé bík milbo:dok lédílo bí kínít dítakko duːjonsuto, odokké odok lédupé bí yí:pi:nyílaː appi dítakkopé tumbola dung. Bí kumli:dém mépagmaːpé longém-yummém loːdípé menna kumna du:yardung. 38 Odo ayírrado bí bulukkodo:pé gísaːla Ru:némé aipai bito odokké sé:kobulu Jerusalemmé répítkunémé toya:la dungngaji bulum ko:dok léga:dém lubito.
Najaretpé Gílatkunam
39 Édílo Jusebbíːlaː Meriːbí Ru:nék Luroːdok takam ipénamkídí:dém ingapton, bulu buluk aíké taon Galilidok Najaretpé gílattoku. 40 Odokké ko:dé bottéla kínggíːla airu:pé mé:joːné taniːpé ikang, odokké Ru:nék aséngé bík tayéːlo dungkang.
Kumli:do Ko Jisubí
41 Dítak dítaglo Jisuk ané-abudé Gíbo:la donamh gíːdíːdém dokolo Jerusalempé gídagaii. 42 Édílo bí yí:la:nyi dítakko ikan, poːpélok ilot-gílot kísapé bulu gíːdí dokolo gísaːto. 43 Gíːdí:dém dongabnam lédupé, édílo bík ané-abudé okumpé gítokun, ko Jisubí Jerusalemíːdo du:tetkang, émpige:la édém bulu kintomang. 44 Buluk léddulo bí gímíndungkupé émna mé:la, bulu longé lo:buːngko gítoku. Odokké bulu bím buluk aíːtaniːkídí:doglaː ajonkídí:dok ara:do mago:to. 45 Édílo bulu bím mabeksutoman, bulu bím magapkakupé Jerusalempé gílattoku. 46 Longé loum lédupé bulu bím kumli lotta:do, luro luyírnékídí:dok lédílo tedla, buluk luyírém tadla bulum tadlatsulangkula du:dopé paːto. 47 Séːkoi bík lunamdém tatton bí bík kinnamdémnaː bík lulatsukunamkídíːdém tadla tadngaksuto. 48 Édílo bík ané-abudé bím ka:toji, bulusin méngaksukang. Bík anédé bím luto, "Ao:a, kapila no ngolum sémpé ngalatsumodun? Nok abubíːlaː ngo méːdír-méːsola nom magoladung.
49 Bí luto, "Nolu kapila ngom magoldun? Nolu kinmanei ngo ngok Abuké okumso du:pénamdém." 50 Émpigéːla bí bulum okko émna lutoji édém bulu tatkintomang.