Jon Baptiské Lugoːbinam
(Moti 3.1-12; Mark 1.1-8; Jon 1.19-28)
3
Ruman migom Taiberias Kaisarké migompé dola yí:la:ngnané dítagdo- édílo Pontias Piladbí Judiaːdo amoːru:tumpé ila dungngan, Erodbí Galilidok migomdéːai, bík bíro Pilibbí Ituriadoglaː Tarakonitisdok, odokké Laisaniasbí Abilenidok migomdéːai. 2 Annaskélaː Kaipaské abíngaryan mirípé ila du:dodo, Ru:nék gomugé Jakaria:ké ao Jonkoloːpé sullipotadoːpé gído. 3 Bí Jordon abung kérangké takam mimongkídí:do:pé gíla imurkídí:dokkém méːyinsubinam légaːpé méngkutsunam baptis laːnamko lugoːbito. 4 Kapé édém lungor-luné Jisoya:ké potindok agomkídíːdo adla léːtagː"Séːkaiké gomukko sullipotado jé:la dung,
'Ru:tumké lambédém síglennoːbitog,
Bík bélamém yig émmotok.a
5 Jikoːné appíːdém gépinambiyé,
takam adiːémnaː díːtém labyinamsubiyé.
Gé:né lambékídíːdém yig émmoyéku,
gíyíng-gíson lambém gípomoyéku.
6 Odokké takam taniyé Ru:nék moturbinam agerdém kaːbegyé.”
7 Jonkolo baptis langkolo gílenné taniːkídí:dém bí luto, “Nolu tabí ommangkídínga! Sé:ko nolum a:péné aglíːdokké duggédo:pé lupa:binoton?" 8 Méngkutsunamdém léngkanam légaːpé e:pénam apa:yém e:motok. Odokké nolu aíé lurobyok, ‘Ngoluk abu kísapé ngolukké Abraambí dung odok-légaːpé mokemoram paːmaːyé émna méːsuyok.’ Kapéné ngo nolum lubidung séː ílíngkídísokkém Ru:nébí Abraamképé ommangém lenmolaːdag. 9 Ígíːdém ísíngkídí:dok léppírbo pagabla lé:tag, odokké oko ísí:dé ainé a:yem e:maːyeji édém kértabgeːla umído érrígyé.
10 Odo gíkumsunékídí:dé bím tauto, “Émpémílo ngolu okkom ipaːyén?”
11 Jonbí lulatsuto, “Séːkké galug bornyiko du:ji kamaːnédém aborko bisutok, odokké séːkké donamé du:ji bí:sin kamaːnédém bisutok.”
12 Murkong urnékídí:déːsin baptis langkolo gído. Bulu tauto, “Luyír-abu, ngolu okkom ipaːyén?”
13 Odo bí bulum luto, “Noluk urpénamdém urrang, édémyang urbadyok."
14 Odo maglíng ékké bím tauto, “Odokké ngolu okkom ipaːyén?”
Bí lulatsuto, “Murkongém rodgoːyok odokké aroma:pé:sin ammem lugénggoyok, noluk pa:namdoi nolu mé:tíːsulang.”
15 Tani:kídí:dé Kiristobí gígoryépé émna toyaːla dungngai odokké buluk appíngké asinbo méngaksuto aropé Jonbíːi Kiristobín émna. 16 Jonbí bulum appíngém lulatsubito, “Ngo nolum asiki baptisém bidung. Émpige:la ngomyang kínggíːya:néko gído, sék létagdok ríbbídémsin taːsarbinan arré ngokké kamang. Bí nolum Angunné Yalokilaː umíki baptisém biyé. 17 Bík monora-samko lottadém mopunggeːla geu-a:mkídí:dém kumsudo jongkumsukupé bík opodé bík alagdo dung, émpige:la amyangkídí:dém bí unggasuman umído romnígyé.
18 Odokké Jonbí bojék agomki bulum lusaːlígla tatpon lutaddém lubito. 19 Émpige:la édílo Jonbí Erod Antipasmé, bík bírodok yamné, Erodiamé la:la duːnam léga:péla: takam aiman ager-gernam légaːpé géːton. 20 Erodbí bojéko imurém inam tayéːlo akoda isedlíktoː Bí Jonmé makanaːlo tumto.
Jisuké Baptis Laːnam
(Moti 3.13-17; Mark 1.9-11)
21 Édílo tani appíːdém baptis bila dungngan, Jisumésin baptisém bito. Odokké bík kumna du:dardo, tayéng yabgo síggekang, 22 odokké Angunné Yalobí amír-adinpé bík tayé:do:pé pékí apirkonémpé déːyikang. Odokké tayéng-amo:tokké gomukko ludopé tatto; “No ngok Ao:o, sé:kom ngo aipé-méːdoji; nokkolo ngo méːyumsudag.”b
Jisuké Taːto-Yayokídíng
(Moti 1.1-17)
23 Jisubí dítak yíngumkopé idagaboi édílo bí bík agerém gerropton. Bí Jusepké aoːo, émnapag amme méːdagai, Jusebbí Eliké ao:o, Elibí 24 Mattatké, Mattadbí Lebiké, Lebibí Melkiké, Meligbí Jannaiké, Jannaibí Jusepké, Jusebbí 25 Mattatiaské, Mattatiasbí Amoské, Amosbí Naumké, Naumbí Esliké, Eslibí Naggaiké, Naggaibí 26 Maatké, Maadbí Mattatiaské, Mattatiasbí Semeinké, Semeinbí Josekké, Josegbí Jodaké, 27 Jodabí Joananké, Joananbí Resaké, Resabí Jerubbabelké, Jerubbabelbí Siltiaké, Siltiabí Neriké, 28 Neribí Melkiké, Melkibí Addiké, Addibí Kosamké, Kosambí Elmadamké, Elmadambí Erké, 29 Erbí Josuaké, Josuabí Eliejarké, Eliejarbí Jorimké, Jorimbí Mattatké, Mattadbí Lebiké, 30 Lebibí Simionké, Simionbí Judaké, Judabí Jusepké, Jusebbí Jonamké, Jonambí Eliakimké, 31 Eliakimbí Meliaké, Meliabí Mennaké, Mennabí Mattataké, Mattatabí Natanké, Natanbí Debitké, 32 Debidbí Jesiké, Jesibí Obetké, Obedbí Boajké, Boajbí Salmonkéc, Salmonbí Nasonké, 33 Nasonbí Amminadapké, Amminadabbí Adminkéd, Adminbí Arniké,Arnibí Ejronké, Ejronbí Perejké, Perejbí Judaké, 34 Judabí Jakupké, Jakubbí Isakké, Isagbí Abraamké Abraambí Teraké, Terabí Naorké, 35 Naorbí Serukké, Serugbí Reuké Reubí Pelekké, Pelegbí Eberké, Eberbí Silaké, 36 Silabí Keinanké, Keinanbí Arpakatké Arpakadbí Semké, Sembí Noaké, Noabí Lamekké, 37 Lamegbí Metuselaké, Metuselabí, Inokké, Inogbí Jaretké, Jaredbí Malalelké, Malalelbí Kenanké. 38 Kenanbí Enoské, Enosbí Setké, Sedbí Adomké, Adombí Ruːnéké ao:ai.