Luk
Lukké Tatpon Lutad
Lugot
1
Ngoluk araːlok ilet-gílednam agerkídíːdém, bojéko taniyé adgabla léːpé ikíto. 2 Lendugdokké buluk aíké amikki kaːnéla lubikupénékídíːdok doːyiːdé, ngolum oko okkom lubituːji, édémbulum taniːkídíːdé attag. 3 Odok-légaːpé, ménggésunam Tiopilas, ngo lendodokkébo aíé appíːdém maːbíndanna maka, édémpila sém nokkoloːpé ako akopé adlígbimílo aiyépé émna méːla adlígbidung. 4 Odo nom luyírbinamkídíːdé aroruːpé arrai émnamdém no kinbínna kinyé.Jon Baptismé Onamdém Lunobinam
5 Erodbí Judia moːtagdo migompé doladuːdo ayírdo, Jakaria émnam miríko odo dungngai, bí Abija miríké ope-éraːlokkai; odokké bík yamné Elijabedbí Aaron miríké opelokkaia. 6 Bínyi annyidéi Ruːnék kanggaːlo arolok-duːné taniːai. Ruːtumké takam lujígluroːkídíːdém odokké ipé-gípénamkídíːdém lugéngé kamadopé idagai. 7 Émpigeːla bínyikké ommangé kamangai, kapilaːné Elijabedbí banjidaggaib, odokké bínyi annyipagdéi airuːpé miné-míjídaggaboi. 8 Longéko édílo Jakariaːké opedé mirí-agerém kumliːdo gerra dungngan, bí mirí kísapé Ruːnék kanggaːdo ager-gerra duːto. 9 Ru:tumké kumli araːdo:pé gía:la dunang romnam mirí ager gerdopé po:pélokkébo amin kuːlennam kísapé ku:namé bík amindé lenkang.c 10 Odokké dunang romdí ayírdé aːnamé, kéréngkopé taniyé ruːyido kumna dungngai. 11 Odo Ruːtumké dtayéng-ya:meko dunang romko runggu kéraːdok lagbíkpé bím dakkansuto. 12 Édílo Jakariaːbí bím kaːsuton, bí yallo gíla pésokang. 13 Émpigeːla tayéng-ya:medé bím lutoː 'Jakaria, no pésoyok; kapilaːné Ruːnébí nok kumnamém tattag. Nok yamné Elijabedbí nokképé aoːko obiyé, odokké bík aminém no Jon émna minnígyé. 14 Bí nolum méːpo-ménganém bombiyé, odokké bím onam légaːpé bojéruːngko taniyé méːpoyé. 15 Kapéné bí Ruːtumké kanggaːlo bottéruːné taniːpé badyé. Bí édíloːsin apongémnaː tíngursunam okkomsin tíːmaːyé, bí anédok aki araːbo duːdodokkéboi Angunné Yalolo píːsíːla du:yé.e 16 Bojéru:ngkopé Israel taniːyém bí buluk Ruːné Ruːtumkolo:pé gíladboyéku. 17 Odokké bí Elijaːkéf yalokilaː tornamki, Ruːtumméyang gípoyaːla gíyé, abukídí:dok asiném ao:kídí:do:pé mé:ladmokunam léga:pé odokké agom-tadma:nékídí:dém arolok-duːnékídí:dok méːjoːnamno:pé gíladboyéku-bí Ru:tumké légaːpé taniːyém lennomola duːmoyé."
18 Jakaria:bí tayéng-ya:medém tauto, "Édé arro émna ngo kapé kinyén? Ngo míjíng tani:ko odokké ngok yamnédé:sin miné nékurakkaːbo."
19 Tayéng-ya:medé lulatsuto, "Ngo Gabirielbí, ngo Ruːnék kéraːdo du:do, odokké bí ngom nom luposudopéla: séː ainé lutatsém lubidopé mélíktag. 20 Suːpag kaːlang, édílo:pé séː agomsé aropé imaːyéji no odo longédoːpé agom lulamaːpé ila gommaːla duːyé. Kapila:né no ngok agomém méngkésutomang, okodém buluk ayírraːdo iyérung.
21 Taniːkídíːdé Jakariaːmé toyaːla dungngai, kapila bí kumli araːdo arai araipé dungkaːji émna bulu méngaksukang. 22 Édílo bí gílendokun, bí buluk lédílo agom luposulaːtokumang. Bí kumli araːdo kangorko kaːtopé émna bulu méːto, kapilaːné bí bulum séuki kanggodém léngkantíto émpigeːla bí agom lulamaːpé ila duːyarkang.
23 Odokké bí kumliːdok loːnítkopé gerpénam bík agerdém geramgeːla, bí bík okumpé gíkangku. 24 Odok lédupé bík yamné Elijabedbí amírro kala poːlo píngokopé okumdokké gílen-gíama:pé duːto. 25 Elijabedbí luto,"Ruːné Ruːtumbí ngom sém ibitag. Séː longékídíːsoːsin bí ngom kaːsímosíːdag odokké ngok anyisunamém taniːkídíːsok araːlokkém laːpagbitag."
Jisumé Onamdém Lunoːbinam
26 Elijabetké poːlo píkéngko amírro kala duːdodo, Ruːnébí tayéng-ya:me Gabirielmé Galiliːdok Najaret émnam taonkoloːpé mélíkto, 27 édé mímbírdoːpé, sék amin Meri, bím migom Debitké openégíːlok Jusep émnam taniːdokképé midaːdaːpé tatpírra léːtagai. 28 Tayéng-ya:medé bíkkodo:pé gígeːla luto, “Asin-aséngém bidung, édé no sé:ko bojéru:ngko ayangém paːnédé! Ru:tumbí nok lédílo dung.”
29 Bík lunam agomkídíːdém tadla Meriːbí méngkintomang odokké édé kapiné agomén émna méngaksukang. 30 Émpigeːla tayéng-ya:medé bím luto, "Meri, no pésoyok, no Ruːnékolok ayangém paːtag. 31 Odokké kangkítok, no amírro kala koːko oyé, odokké bík aminém no Jisu émna minnígyé. 32 Bí bottéru:né taniːpé badyé odokké bím Tayéːtok duːné Ruːnék Ao:o émna gogyé. Ruːné Ru:tumbí bík taːto Debitké migom-tetkodém bím biyé. 33 Odokké bí Migompé dola Jakupkolokké lenné ope appíngém loːdílongkípé kaːsíːla duːyaryé; odokké bík migomdokodokké édíloːsin dotéré kamaːyé."g
34 Meriːbí tayéng-ya:medém tauto, “Édémpé kapé ilaːyén, kapila:né ngo mímbírkomín, ngo amilo gímadada?”
35 Tayéng-ya:medé lulatsuto, "Angunné Yalodé nok tayéːlo gíaːyé, odokké Tayéːtok duːné Ruːnék tornamé nom uktidyé. Édémpila nok opénam angunné atérdém, Ruːnék Ao:o émna gogyé. 36 Odokké kangkítok, nok aíːtani Elijabedbí bík miné ayírso ko:ko opé émna iladung, bím banjinéko émna ludungai émpigeːla bí poːlo píkéngkopé amírro kala du:bo. 37 Kapéné Ruːnék ilamaːnamé okkosin kamang."h
38 Meriːbí lulatsuto,"Ngo Ruːtumké pagnéko, nok lunamdémpéi ngokkolo ikaːlangka." Odokké tayéng-ya:medé bím mépagla gíkangku.
Meriːbí Elijabetmé Gíkaːla Kaːnam
39 Oddung Meriːbí lomdanna lenna Judia adiːdok taonkoloːpé gíkang, 40 okolo bí Jakariaːké okumdoːpé gíaːla Elijabedmé kumríksuto. 41 Édílo Elijabedbí Meriːké kumríksunamdém tadbektoji, bík ko:dé aki araːbo sumkíkang, odokké Elijabedbí Angunné Yalolo píːsíngkang. 42 Bí bottépé jéːla lutoː "Mimé ara:lok airu:pé ayang-paːyanédé no, odokké nok opénam koːdé:sin ayang-paːnéko! 43 Émpigeːla kapila ngo siddík ayangém pa:dun, ngok Ruːtumké anédé ngokkosoːpé gídon? 44 Nok kumríksunadém ngok yeruːsé tatpasu:dannammei, aki ara:sok du:né koːsé méːpola sumkíkang. 45 Ayang-pa:nédé bí sé:ko aropé méngkésutoji, okodém Ru:tumbí bím lutoji édém iledru:yé émnaǃ"
Meriːké Luyitsula Monam Niːtom
46 Meriːbí lutoː
"Ngok asinsé Ruːtummé luyitsudung;
47 odokké ngok iji-yalosé ngom Moturbikuné Ruːnékolo méːpodung,
48 Kapéné bí bík pagnéké ajjisula duːnamsém méːpaːbila duːdag.
Suːkkolokké takam opeyé ngom ayang-pa:né émna gogyé,
49 kapéné Kínggíːtaríːné Atérbí ngokképé
bottéru:né agerém gerbitag- bík aminé angunné.
50 Séːkobulu bím pésola ménggésuyéji
bík ayangé ope opeloːpé du:yaryé.
51 Bottéruːné agerém bík alakki bí gerbitag;
séːkobuluk asin-ara:dokké pakkísíkkíné émna méːsudagji, bí bulum ménpidménrítto.
52 Bí migom donném migom-tetkolokkém ményíngamto
émpigeːla ajjisunném bottén taniːpé badmoto.
53 Bí kénoːla du:ném ainé donamém domoto
émpigeːla mirémném angaraːpé mélíktoku.
54 Bík pesunammém méːpaːla
bí bík pagbo Israelmé ka:dumsuto,
55 Ruːtumbí Abraamélang bík ommangém loːdílongkípé,
bí ayangém léngkanamdém méːpaːtíto."
56 Meriːbí Elijabetké lédílo poːlo píum kíramkopé du:míngeːla okumpé gílattoku.
Jon Baptismé Onam
57 Édílo Elijabetké koːdém onan ayírdé píngangkan, bí ko aoːko oto. 58 Ru:tumbí bím bojéko ayangém léngkanto émna bík kumrí-do:rélaː aíːtani:kídí:dé tatpaːsula bulusin bík lédílo mé:pomínto.
59 Piːnyiné longédo bulu koːdém gatpukapé gíboto, odokké bulu bík aminém bík abudok amin minkamdémpé Jakaria émna minníkpé ito, 60 émpigeːla bík anédé lutumna luto, "Édémpémang! Bím Jon émna minníkpa:yé."
61 Bulu bím luto, "Noluk aíːtani araːlo séːkkésin édémpé minnam aminé kamang." 62 Odo bulu bík abudém séuki taukaːto, bí okko émna koːdém aminém minpé méːladun émna.
63 Jakaria:bí séukokki adgéngko koto, odokké bí appíngém méngaksudopé atto, "Bík aminé Jon." 64 Oddar bí agom lulangkangku odokké bí Ruːném luyitsubomkang. 65 Kumrí-do:rí appíngé péssamkang, odokké adi mimong Judiaːdok tani:appí:dé édé doːyiːdém kítaksukang. 66 Séːkoi édém tatpaːsutoji bí édém bík asinbo méːyartíla duːto, odokké tauto, "Émpém séː koːsé okopé badyén?" Kapéné Ruːtumké tornamé bík tayéːlo dung.
Jakaria:ké Lungor-Lunam
67 Jonké abu Jakaria:bí Angunné Yalolo pí:sí:la lungorém lutoː
68 “Írroi Ru:tummé, Israelké Ru:némé,
kapila:né bí gígeːla bík tani:kídí:sém répíttoku.
69 Bí ngoluk légaːpé bík pagbo Debitké okumnokké,
kínggíːné moturbinék dagrobmoto.
70 Kapé bí bík angunné lungor-lunékídí:dokki po:pélo:bo lunongkaji,
71 bí ngolum ngoluk mirulokkémna,
ngolum tayumnékídíːdok alaglokkém moturbinam biyé,
72 ngoluk abukídí:dém ayangém léngkannam légaːpéla
bík angunné luségdém mé:paːnam légaːpé.
73 Ngolum ngoluk mirukídí:dok alaglokké mopídyé émna,
ngoluk abu Abraammé bí pesubito,
74 odokké pésso kamaːpé bík agerém germoyé.
75 Ngoluk turdag takamdo
bík kangga:lo angunnéloːla arolok-duːla:dopé.
76 "Odokké no, ngok ao:a, nom Tayéːtok duːné Ruːnék lungor-lunédé émna gogyé;
kapéné no Ru:tumméyang gípola gíla bík lambém,
bík légaːpé síglennoːbiyé.
77 Moturbikunamdém buluk imurém méːyinsunamki pa:tag émna,
bík tani:kídíːdém kinmonam léga:pé lubiyé.
78 Kapilaːné ngoluk Ruːnék aipé asin-aya:namno,
líːsaːné doːnyidok moturbinamdém tayéng-amoːtokké ngolukkoloːpé kangaːmoyé
79 kémolok duːnémnaː siko koruːlok duːném píang binam légaːpé,
ngoluk lambém asin-ansí:né lambédo gíbonam légaːpé."
80 Odokké koːdé bottéla yalolo kínggíngkang; odokké bí Israel tani:kídí:dém gíkansumado ayírdo:pé sullipotado du:to.