Jisubíːla Jon Baptisbí
(Luk 7ː18-35)
11
Édílo Jisubí bíkkol luyírsuné yíːlaːnyídém édémbulum luyírbiton; bí odokké gípagla odok kérangké nogorkídíːdo luyírbikoloːla lugoːbikolo gíkang.2 Édílo Jon Baptisbí Kiristobí okkom iladun édém makanaːdo tatpaːsuton, bí bíkkol luyírsunném bím sidém taudoːpé mélíkto, 3 "Noːíi, édé séːkobí gípénédén, émmaːmílo ngolu séːkai akonémyé toyaːpénamén"? a
4 Jisubí lulatsutoku, "Gílatkangku odokké nolu okkom kaːpaːtatpaːsudun Jonmé lubitaːkuː 5 Migluné kaːpaːdungku, lékíné gíladungku, séːkobulum ngero-ro:tagan bulum naréːmotakku, ruːbené tatpaːdungku, sinném turmodungku, odokké tatpon lutaddém opanném lugoːbidung.b 6 Ayang-paːnédé bulu séːko ngom méːmomaːji."
7 Édílo Jonkol luyírsunékídíːdé gídagaːkun, Jonké doːyingém Jisubí gíkumsunékídíːdém kíbitoː "Nolu sullipottolo okkom kangkolo gílenkan? Ésaré sartabla léːnam dorbumkonémye? 8 Émmam, nolu okkom kangkolo gílenkan? Taniːkolok ainé génammém gérusula duːnamdémyé? Séːkobulu ainé bédugasorém gérusulduːdagji bulu migom-okumkídíːdoːmín duːdang. 9 Odo okkom kangkolo nolu gílenkan? Lungor-lunékonémye? Édé arro, nolu lungor-lunékonémyaːsin bottéyaːnék kaːto. 10 Édé Jonbí sék légaːpé sém adla léːtagː "Ngok barígém ngo nomyang gípoːyaːdoːpé mélígyé, séːko nok légaːpé lambém moninsu:nobiyé.'c 11 Ngo nolum arodém lubidungː Séːkobulum anné otagji buluk araːlo Jon Baptisméyang bottéyaːné séːkosin kamang. Émpigeːla tayéng-among migomdokodok amepagya:nédé bímyang bottéyaːdag. 12 Jon Baptiské longédokké siloloːpé, tayéng-among migomdokodé bolbodapé gíbaddung odokké taniːkídíːdé édém motumkídung.d 13 Kapéné Jonké ayírdoːpé lungor-lunékídíːdéːla Musiːké Luroːdé migomdokodok tayéːlo agomém lutag. 14 Odokké no édém méngkésulíːdagmílo, bí Elijaːbí séːko gípénédén.e 15 Séːkké yérungé duːji, bím tadmotok.f
16 Ngo séː opesém okokki luyisunayan? Bulu réko-kokolok tedla akoném jéːla gogladuːné duːné koːkangémpé idagː 17 'Ngolu noluk légaːpé pempém mudbika, émpigeːla nolu soːtomang; ngolu kabaném kabbika émpigeːla nolu kaptomang.' 18 Édílo Jonbí gíkan, bí domatíːmangai, odokké 'Bíkké uiːyé dung' émna appíngé luto, 19 Édílo Taniːké Aoːbí gíkan, bí doto-tíːto, odokké appíngé luto, 'Kangkíto séː taniːsémǃ Bí dorí tí:rínékola tínguriːko, murkong urnélogla imurnélok ajoné.' Émpigeːla méːjoːnamdém bík agerkokkipag léngkandag."
Méngkutsunam Taonkídíng
( Luk 10ː13-15)
20 Odo Jisubí édé taonkídíːdém lupagbomkang okolo bí bojéko bík méːpílaːmanam agerém gerkan, kapilaːné bulu méngkutsutomang. 21 Korajina, méːdíré nokkoloːpéǃ Betsedanga, méːdíré nokkoloːpéǃ Nolukkolok gernam méːpílaːma:nam agerkídíːdém Tayardoːla Sidondo gernamkaːmílo, bulu longkobong méngkutsula toilaloːla médbulo tedla-duːyaːboi. 22 Émpigeːla ngo nolum lubidung, kébaːbaːdo longédo nolumyang Tayarbíːla: Sidonbí anpopoyaːyé. 23 Odokké no, Kapernau:ma, nom doːmírtoːpéi jo:saːlígyén? Ma, no uiːkoruboːpépag gíiyé. Noluk araːdok inam méːpílaːma:nam agerkídíːdém Sodomdo inamkaːmílo, édé nogordé siloké longésoːpésin duːyaːpé. 24 Émpigeːla ngo nolum lubidung kébaːbaːdo longédo nomyang Sodombí anpopoyaːyé."
Ngokkoloːpé Gíge:la Durasuta
(Luk 10ː21-22)
25 Odo ayírdo Jisubí luto, "Abu, tayéng-amongkéla mo:písok Ruːtuma, ngo nom luyitsudung, kapilaːné no sémbulum méːjo méːlabnélokkémna kinnépaːnélokkém léːsila léːtag odokké ajjiné ko:kangém kinmodung. 26 Arro, Abu, kapéné séː nok asin méːyumsunamé.
27 Séː appíːsém ngok Abubí ngom bitag. Aoːmé Abudok ruːyipé séːkosin kinmang, odokké Abumé Aoːdok ruːyipé séːkosin kinmang, émpigeːla séːkobulum Aoːbí bím kinyépé émna balentuːji bulu kindag.
28 Nolu appíngé séːkobulu tébégném joːla ngalatsulduːji, ngokkosoːpé gíto, ngo nolum durasukkom biyé. 29 Ngok jungoliːdém langgeːla nolukkolo joːlíksutok odokké ngokkolok kinpo:tok, kapéné ngok yallo ajjisunnélang kéíksunné, odokké nolu ngokkolo durasukkom paːyé.g 30 Kapéné ngok binam jungoliːdé étsaːdag odokké ngokkolok joːpénamdé tébégma."