Yoddo Longédok Tayéːlo Taunam
(Mark 2ː23-28; Luk 6ː1-5)
12
Yoddo longékolo Jisubí aríglog gípadla gíto. Bíkkol luyírsunékídíːdé kénoːla geu tuːying ékkém bulu pírtungge:la édémbulum doto.a 2 Édílo Parosikídíːdé édém kaːton, bulu bím luto, "Kangkítokǃ Nokkol luyírsunékídíːdé okkom Yoddo longélo ipa:maːji édém idung."3 Bí lulatsuto, "Édílo migom Debidbíːla bík gíjonkídíːdé kénongkan odo bulu okkom iton édém nolu pobeksukímaːnei?b 4 Bí Ruːnék okumdoːpé gíaːto, odokké bíːla bík gíjonkídíːdé tosagla léːnam pitaːdém doto- oko pitaːdém bulu dopamangai, édém mirrongé dopaːdagai. 5 Émmaːmílo Yoddo longé appínglo miríkídíːdé kumli:do Musiːké Luroːdok Yoddo longélok adnam luroém ipitsiridnamdém nolu pobeksukímaːnei, émgom bulum imurnékopé sabmang?c 6 Ngo nolum lubidung kumli:démyaːsin bottéyaːnéko sidé dung. 7 'Ngo ayangém madung, palígnammém mamang,' nolu séː agomkídíːsok légíːdém kinnamka:mílo, nolu imurmaːné taniyém lupagmaːyai.d 8 Kapéné Taniːké Aoːbí Yoddo longédok Ruːtummé."
Alag Asongko Yéːné Taniːdé
(Mark 3ː1-6; Luk 6ː6-11)
9 Jisubí odokké gípagla gíla murong-okumkolo gíaːto, 10 odokké odo alag asongko yé:né taniːko dungngai. Bulu Jisumé lugélaːnamko magola dungngai, édémpila bulu bím tauto, "Yoddo longélo ésaːmopa:dokuyé?"
11 Jisubí bulum luto, "Noluk séːkaiké meːrko dung odokké édé Yoddo longédo korungkolo okepsumílo, nolu édém bugabla édém sosangkumayénei? 12 Taniːkoné meːrkonémyang aipé arré kaya:dagǃ Odok-légaːpé Yoddo longém ainé agerém gerpaːdo." 13 Odo bí édé taniːdém luto, "Nok alagdém maːlento."
Édémpila bí bík alagdém maːlento odokké alagdém aibíndanna aimotoku, odokké édé songkon alagardémpé ikangku. 14 Odo Pasorikídíːdé ruːyoloːpé gílenkang odokké Jisumé kapé mokelaːyéji édém ru:suto.
Ruːnék Balennam Agergerné
15 Édém kinna, Jisubí odokké gípakkang. Odokké bojéko taniyé bíkkol gímínkang, bí buluk appíng kinamém ésaːmotoku, 16 Bí séːkon édém ammem lubima:dopé bí lutumto. 17 Lungor-luné Jisoya:ké lunamdé ilet-gíladnam légaːpé édémpé ikangː
18 Ngok agergernédé bí séːkom ngo balentag,
séːkom ngo aipé-mé:do, séːkkolo ngo méːyumsudo;
ngo ngok yallom bík tayéːlo mélígyé,
odokké bí ngok arodém réngamém lubiyé.
19 Bí lumínusula jénggomaːyé;
odokké lambélo bí jéːla lugoːmaːyé.
20 Édílo:pé arodém bí jikiboma:yéji odolo:pé,
bí sartabnam dorbumém tírsodmaːyé,
odokké mikki sa:la du:né serakiyém mudmidmaːyé.
21 Bík aminno réngamé buluk méːtinsunamém lé:yé."
Jisubíːla Beljebulbí
(Mark 3ː20-30; Luk 11ː14-23)
22 Odo taniːékké Jisukodoːpé uiːpaːnam tani:koném gíbodo, séːko miglula gommadagai, odokké Jisubí bím aimotoku, édémpila bí agom lulalangkula kaːpaːtoku. 23 Taniːappíːdé édém kaːla kangaksula luto, "Bí Debitké Aoːdéyé?"
24 Émpigeːla édílo Parosikídíːdé édém tatpaːsuton, odo bulu luto, "Édém Beljebupkipag, uiːkídíːdok migomdokki, bí uiːyém ménnendung"
25 Jisubí buluk méːladuːnamdém kinge:la bulum luto, "Migomdokokoné odok araːdo aíːaíé angusumílo migomdokodé yokpagyé, odokké nogorkonéla okum-érangésin angusumílo édésin du:yarmaːyé. 26 Uiːbí uiːyém ménnenmílo, bí aíké angupé angusudag. Odo kapé bík migomdokodé duːyaryén? 27 Odokké ngo Beljebupki uiːyém ménnendu:mílo, séːkkoki noluk taniːkídíːdé bulum ménnendang? Édémpila, bulu nolum kébaːbaːnépé iyé. 28 Émpigeːla ngo uiːyém Ruːnék Yaloki ménnendu:mílo, odo Ruːnék migomdokodé noluk araːlo gíangkaːbo.
29 Séːkosin kínggín taniːkolok okumnoːpé gíaːla édíloːpé bím ríngappoːmaːyéji bík attarém bompaglangkumang; bím rínggabmílo bík attarém bompaglaːyeku.
30 Séːko ngok lédílo duːmaːji bí ngok angupé duːdag, odokké séːko ngok lédílo tíkumsumaːji bí pidjernéko. 31 Édémpila ngo nolum lubidung, taniːlok appíng paːbémna Ruːném lukaːnamém méːyinsubiyé, émpigeːla Ruːnék Yaloké kekonpé lukaːnamdém méːyinsubimaːyé. 32 Séːkai Taniːké Aoːké angupé agom lumílo bím méːyinsubiyé, émpigeːla séːkai Angunné Yaloké kekonpé lumílo bím, séː ayírso:sin odokké aːpéné ayírdo:sin méːyinsubimaːyé."
Ísíng Amíngkola Bík Aːyédé
(Luk 6ː34-45)
33 "Ísíngkoném aimotok odo odok aːyédé aiyé, émmamílo ísíngkoném aimap imotok odo odok aːyédé aimaːyé, kapéné ísíngkoném bík aːyédokki kangkindo. 34 Nolu tabíkídínga, kapé nolu aimanggeːla oːkai ainéko lulangkan? Kapéné asin araːbo biːpokpogmílopag nappaːdokké lulendo. 35 Ainé taniːdé ainé attarém bík ainém mékumsudokkém laːlendo, odokké aiman taniːdé aiman attarém bík aiman mékumsukodokkém laːlendo.
36 Émpigeːla ngo nolum lubidung taniyé buluk luseluyela lunam agom appíːdok lugaːdém kébaːbaːdo longédo lubisupaːyéku. 37 Kapéné nok lunam agomdé nom imurkamang émna lukanbiyé émmamílo nok lunam agomdé nom imurnéko émna lukanbiyé.
Kanggotko Manam
(Mark 8ː11-12;Luk 11ː29-32)
38 Odo Parosiéla luro luyírné ékké bím luto, "Luyír-abu, nokkolok ngolu méːpílaˑmaːnam kanggotko kaːlíːdung."
39 Bí lulatsuto, "Aimaːnéla benggon opeyé méːpílaːmaːnam kanggotko kaːpé émna magodagǃ Émpigeːla lungor-luné Jonaːké kanggodé:maːmílo okkomsin léngkanma:yé. 40 Kapéné Jonaːbí longé loumkola yumé yuːumko kapé pirtan ongo aki araːdo dungngan, édémíːpé Taniːké Aoːbí longé loumkola yumé yuːumko among araːbo duːyé. 41 Ninebeːdok taniːkídíːdé séː opekídíːsok lédílo kébaːbaːdo longédo daksaːmínge:la bulum lupagyé, kapéné Jonaːké lugoːbidodo bulu méngkutsuka, odokké Jonaːméyaːsin bottéyaːnéko sidé dung. 42 Pékíːké Raniːdé kébaːbaːdo longédo séː opesok lédílo daksaːmíngeːla bulum lupagyé; kapéné bí mo:písok duːtérbokké Solomonké méːjoːnam agomém tatkolo gíka, odokké suːpag Solomonméyaːsin bottéyaːnéko sidé dung."e
Aiman Yalodok Gílatkunam
43 "Édilo aiman yaloko taniːkolokké gílendakkun, bí pítírné dungkokoloːpé gíla durasukoko magodag; émpigeːla yalodé dungkoko paːmaːmílo. 44 Odo bí ludag, 'Ngok mépagla gíko okumdoːpé ngo gílatkupé.' Édémpila bí gíladdakku odokké okumdém kumrukpé, pétpuːla odokké tíyinsula léːdopé paːdag. 45 Odo bí gíla bímyang aiyaːman kínítko yallom bík lédílo gía:bodakku, odokké bulu gíaːla odo duːdag. Odokké édé taniːdok turnamdé poːpékédémyang aiyamap idag. Séː ayírsok aiman taniːkídíːdok lédílo édémpépag iyé."
Jisuk Anédéːla Bírrangkídíːdé
(Mark 3.31-35; Luk 8.19-21)
46 Jisubí gíkumsunékídíːdém do:yíng kíbilduːdodo bík anédéːla bírrangkídíːdé gípíːdo. Bulu bím luposupé méːla ruːyído dakto. 47 Odo taniː ako Jisumé lubito, "Nok oːbíːla nok bírrangkídíːdé nom luposupé méːla ruːyélé dagla dung."