Amni Pidnéko Luyisubinam
(Mark 4.1-9; Luk 8.4-8)
13
Odo longgíːdo Jisubí okumdokké gílenna pa:tang ragodo luyírbipé émna tetto. 2 Bík kéraːdo gíkumsun taniyé bojébatsunammé, bí ollungkolo sangaːla odo tetto, odokké taniːappíːdé ragodo dagla dungkang. 3 Odo bí bulum sémpé lula bojéko agomém luyisunamno lubitoː"Aríg-iné taniːkoné amni pitkolo gílenkang. 4 Bí arígdo amni pidla du:dodo, odok akke gubati ruːyido oletkang, odokké péttangé déngala pala dongapto. 5 Akke torné-ílí tayéːlo oletkang, okolo deːtak-amongé kasodaggai. Amniːdé lomdanna saːlengkang, kapilaːné amoːdé bosordaggai. 6 Émpigeːla édílo doːnyé líːsangkan, saːlennékídíːdém kaːsanto, odokké bulu sanapkang kapilaːné bulukké léppíré kamangai. 7 Ake amniyé tang araːlo okepkang, tangkídíːdé buluk lédílo saːjonsula bulum partidamtoku. 8 Émdaggom amni ékkém ainé amoːlo pidlíkto, okolo amni apirdok-língkoko, yíːlaːngkéngko, odokké yíːlaːngumkopé pidlígnamdémyang paːyaːtoku.
9 Séːkké yerungé duːji, bím tadmotok."
Luyisunamdok Légaːdé
(Mark 4.10-12; Luk 8.9-10)
10 Odo luyírsunékídíːdé bíkkodoːpé gíla bím tauto, "No kapila taniːkídíːdém luyisunamki lubidon?"
11 Bí lulatsutoku, "Tayéng-among migomdokodok kinpílaːmaːnamém nolum kinmotag, émpigeːla bulum kinmomang. 12 Séːkké duːji bím abako bisedyé, odo bíkké sabamnamaːnamkopé kayé. Séːkké kamaji, odokké bíkké okkoué duːji édémsin bíkkolokkém laːpagyé. 13 Édémpila ngo bulum luyisunamki lubidoː "Bulu kaːnggom, kaːbegmaːyé; tadgom, tadbegmaːyé odokké tatkinsinmaːyé. 14 Jisoyaːké lungor-lunamdém bulukkolo ilet-gíledyéː
' Nolu tadmo tadmola tadyé émpigeːla édílo:sin tatkinmaːyé;
nolu kaːmo kaːmola kaːyé, émpigeːla édílo:sin kangkinmaːyé.
15 Kapéné buluk asiné kémokang;
odokké bulu buluk yerungki tadngasukang,
odokké bulu buluk amigém migjémamkang.
Émmamílo buluk amigé kaːbegyai,
buluk yerungé tadbegyai,
buluk asiné méngkinyai,
odo bulu ngokkoloːpé gíladyaːkui,
odokké ngo bulum ésaːmoyyakui."
16 Émpigeːla noluk amigkídíːdélang yerungkídíːdé ayang-paːné kapilaːné bulu kaːbeg tadbegdung. 17 Kapéné ngo nolum arodém lubidung, bojéko lungor-lunnéla arolok-duːné taniyé nolu okkom ka:begduːji édém kaːlíːdaggai, émpigeːla bulu ka:paːtomang, odokké nolu okkom tadduːji édém tadlíːdaggai émpigeːla bulu édém tadbektomang."
Jisubí Amni Pidnédém Luyisula Lunamdém Lusarbito
(Mark 4ː13-20; Luk 8ː11-15)
18 "Émpém amni pidnamdém luyisunamdok légí:dé okkon tatkíː 19 Édílo séːkai migomdokodok tayéːdo doːyiːdém tadyé odokké édém tatkima, bík asindo okkom pidlíktungan édém aimaːnéko gíla la:pagdag. Gubati ruːyiːdok pidnam amniːdé édé. 20 Torné-ílíːlo pidnam amniːdé édé séːkoi doːyiːdém taddanna bagémpé édém méːpodanna toríksudag. 21 Émpigeːla bíkké léppíré kamaːnammé, édé kontégongko duːdag. Édílo agomdok légaːpé ngasodéla ipusireːé aːdang, bí lomdanna opagleddag. 22 Tang araːlok oledné amniːdé édé séːkoi doːyiːdém tadge:la toríksuto, émpigeːla séː turnamsok méːdírélang moːpíso mirémníːnamdé bím níːpeddag, odo bí aːyém e:mang. 23 Odokké ainé amoːdok pidnam amniːdé édé séːkoi doːyiːdém tadla édém tatkindag. Bí aːyém eːdag, akke língkoko, akke yíːlaːngkéko odokké akedé yíːlaːngumko eːbadag."
Binoyém Luyisula Lubinam
24 Jisubí abangkoda luyisunamko bulum lubitoː "Tayéng-among migomdokodé sémpé idag. Taniːkoné ainé amniém bík arígdo pidlíkto. 25 Émpigeːla édílo appíngé yupkan, bík mirué gíla geu araːdo binoyém pidlígge:la gíkangku. 26 Édílo geudé saːla bíkan, odo binoyémsin kaːbekto. 27 Ruːtumdok pagbokídíːdé bíkkodoːpé gíge:la bím luto, 'Ruːtuma, no nok arígdo ainé amniyém pidmangalang? Émpém okolokké binoye sangkan?' 28 Bí lulatsutoku, 'Édém mirukoné itag.' Pagbokídíːdé bím tauto, 'Ngolu gíla édébulum bupagdopé no méːdagnei?' 29 Bí lulatsuto, 'Ma, kapilaːné édílo nolu binoyém bupagyéji, buluk lédílo nolu geuémsin busaːtéːlaːdo. 30 Gaddíkumaːdopé annyidéméi lékkopé míːtamopoːto. Gaddoku ayírdo ngo gadbikunékídíːdém lulígyéː Binoykídíːdém gatpoːla jíːríkpé rígla umído rompaglígdopé; odok lédupé geukídíːdém gatkumsuge:la ngok kumsudoːpé jongalígyéku."
Pétu Ammom Luyisula Lubinam
(Mark 4.30-32; Luk 13.18-19)
31 Bí bulum luyisula lubinamko aːkoda lubitoː "Tayéng-among migomdokodé sémpé idag. Taniːkoné pétu ammoko langgeːla bík arígdo pidlíkto. 32 Édé amni araːlok pirmepagyaːné, émpigeːla édílo édé míːtayéji, édé oying baːrilok míːtapagyan amí:pé idag, édémpila doːmírtok péttangé odok réngkékídíːdo dénga:la asubém gi:dag."
Karém Luyisula Lubinam
33 Lékoda bí bulum luyisunam akoda lubitoː "Tayéng-among migomdokodé sémpé idag. Mimékoné kar ékkém langgeːla bojéruːngko pitaːlo odolo:pé yonnusutídag édíloːpé édé appíːdé goːsangammaːji."
Jisuké Luyisunamno Lunam
(Mark 4.33-34)
34 Jisubí taniːkéréːdém lubinam appíːdém luyisulangoː lubito; bí bulum luyisula lubimaːpé okkomsin lubitomang. 35 Édémpé lungor-lunédé okkom lukan édé ilet-gíletkangː
Ngok nappangki luyisula lubiyé,
moːpísém ruːlendokkébo kupsila léːnamkídíːdém ngo bulum lubiyé."a
Binoydém Luyisula Lubinamdém Lusarbinam
36 Édílo Jisubí kéréːdém mépagla gíla okumpé gíaːton. Bíkkol luyírsunékídíːdé bíkkodoːpé gíge:la bím luto, "Arígdok binoydém luyisula lubinamdém ngolum lusarteipén."
37 Bí lulatsuto, "Séːkobí ainé amniyém pittoji bí Taniːké Aoːdé. 38 Arígdé moːpísé, odokké ainé amniːdé migomdokodok ommangkídíːdé. Binoydé aimaːnédok ommangkídíːdé, 39 odokké Uiːbí édé mirudé séːko binoydém pidlíkto. Gatkunamdé moːpísok gíngabné ayírdé, odokké gatkunékídíːdé tayéng-yaːmekídíːdé. 40 Kapé binoykídíːdém busanggeːla umílo romton, édémíːpé ayírdok gíngabdodo iyé. 41 Taniːké Aoːbí bík tayéng-yaːmekídíːdém urrígyé, odokké bulu bík migomdokodokkém séːkobulu paːbém imodagji odokké séːkobulu aimaːném iladuːji bulum laːpagamyé. 42 Bulu bulum dorra duːné umído érrígyé, okolo kabnamé odokké iːpang rékkérépsunamé duːyé.b 43 Odo arolok-duːnékídíːdé buluk Abuké migomdokodo doːnyitémpé unyé. Séːkké yerungé duːji, bím tadmotok."
Léːsilléːnam Aín-murkongém Luyisula Lubinam
44 "Tayéng-among migomdokodé sémpé idag. Taniːkoné arígkolo léːsil léːnam aín-murkongém paːnamémpé. Bí lékoda édém léːsitoku, odokké bí méːpola gíla bík kanam appíngém kopaggeːla édé arígdém rédag."
Bakorém Luyisula Lubinam
45 "Lékoda, tayéng-among migomdokodé attar-rénékonékonémpé idag séːko ainé bakorém magodang. 46 Édílo bí aipé arékanék paːdang, bí gíla bík kanam appíngém kopaggeːla édé bakordém rédag."
Ésabém Luyisula Lubinam
47 "Lékoda, tayéng-among migomdokodé sémpé idag. Mosuang ékké buluk ésabdém paːta:do érrígla odokki bangkí bangkín ongngom érgapto. 48 Édílo ésabdé bingkan, bulu ésabdém ragodoːpé sosato. Odokké bulu tedaːla ainé ongokídíːdém gempakídíːdo tíkumsuto, émpigeːla aimaːné ongokídíːdém érpakto. 49 Moːpísok gíngabdo ayírdo édémarpé iyé. Tayéng-yaːmékídíːdé gíla aimaːnékídíːdém arolok-duːnékídíːdokkém bapansuyé 50 odokké bulum dorra duːné umído érrígyé, okolo kabnaméla iːpang rékkérépsunamé kayé.
Annolang Akuné Aín-murkong
51 Jisubí tauto, "Nolu édé appíːdém tatkintoyé?"
Bulu lulatsutoku, "Éí, tatkinto."
52 Bí bulum luto, "Odok-légaːpé luro luyírné appíngém séːkom tayéng-among migomdokodok tayéːlo luyírbitang, bí okumkolok ruːtum kísanéko séːko bík kumsudok anu élang aku aín-murkongém bomnendakku."
Jisumé Najaret Taondo Lupagnam
(Mark 6.1-6; Luk 4.16-30)
53 Édílo Jisubí édé luyisunamkídíːdém lungapton, bí odokké gípakkang. 54 Bík aíké taondoːpé gílangkula, bí taniːkídíːdém buluk murong-okumdo luyírbito, odokké bulu tadla tadngaksuto. Édémpila bulu tauto,"Okolok séː taniːsé séː méːjoːnamsémna méːpílaːmaːnam tornamém paːton? 55 Bí ísíːmistridok aoːdémaːnei? Bík anédok aminém Meri émmaːnei, odokké bík bírokídíːdé Jems, Jusep, Simon odokké Judaːbulumaːnei? 56 Bík bírmo appíːdé ngoluk lédílo duːmínmaːnei? Émpém okolok séː taniːséː séː appíːsém paːton?'" 57 Odokké bulu bík angupé iropkang.