Jon Baptiské Sinam
(Mark 6.14-29; Luk 9.7-9)
14
Odo ayírdo Galili moːtagdok ruːtum Erodbí Jisuk agerkídíːdém tatpaːsuto, 2 odokké bí bík pagbokídíːdém luto, "Bí aroruːpé Jon Baptisbí; bí sikolokké turdungkuǃ Édémpila méːpílaːmaːnam tornamé bíkkolo agergerradung."3 Kapéné Erodbí Jonmé poːpéloːbo sogabmoto, odokké bím rínna makanaːlo tumto. Bík bíro Pilipké yamné Erodiaːké légangé bí édémpé ito. 4 Kapéné Jonbí Erodmé lutíkaː "No Erodiaːmé midamonamdé momurdag." 5 Erodbí Jonmé mokepé méːto, émpigeːla bí Jiudikídíːdém pésokang, kapilaːné bulu Jonmé lungor-lunéko émna sabdagai.
6 Erotké onam-longédo Erodiaːké omédé bulum soːbila Erodmé airuːpé méːyumsumoto 7 édémpila bí okkomméi koyeji édéméi bím bipé émna Erodbí pesubila luto.
8 Bík anédok luyírnamdém tadgeːla bí luto, "Sido ngom arémkolo Jon baptiské tukkudém biː."
9 Migomdé méːdírkang, émpigeːla takam mibokídíːdok tadgaːlo bí pesubinamé, bí bík konamdém bidopé lulíkto. 10 Édémpé bí Jonké tukkom makana:do papírmoto. 11 Jonké tukkudém arémkolo bomaːla ko:néːdém bito, odokké koːnédé édém bík anédoːpé bomkang. 12 Jonkol luyírsunékídíːdé gíge:la bík simaːdém laːtoku odokké bím yusíːto. Odokké bulu gíla Jisumé lubito.
Jisubí Lí:yíng Angngokoném Dobonam
(Mark 6.30-44; Luk 9.10-17; Jon 6.1-14)
13 Édílo Jisubí Jonkolo okko kapikaːji édém tatton, bí odokké gípagla ollungkolo saːla atéroːdé rongngamnékoloːpé gíkang. Taniːkídíːdé bík gípagnamdém tatto, édémpila bulu buluk taoném mépagla aléki bík lédulo gímínto. 14 Édílo Jisubí olluːdokké gíiton bí bottén kéréngkopé taniːyém kaːpaːsuto, bí bulum ayaːpé-méːto, odokké bí buluk kinamém kaːpídbito.
15 Yummaryírnammé bíkkol luyírsunékídíːdé bíkkodoːpé gíge:la luto, "Sidé airuːpé araːné duːtakko, odokké ayírésin kamaːbo. Taniːkídíːsém mélíktokubo, odo bulu doːlungkídíːdoːpé gíla buluk légaːpé donamém résuyépé."
16 Jisubí lulatsutoku, "Bulukké gíkupénam ager kamang. Nolu aíkídíːdé bulum oːkaiko dodopé bitopén."
17 Bulu lulatsuto, "Ngolukké pitang borngongkola ongo pirnyongko sidé dung."
18 Bí luto, "Édémbulum ngokkosoːpé bomaːto." 19 Odokké bí taniːkídíːdém nésin tayéːdo teddopé lulíkto. Pitang borngodémna ongo pirnyidém langgeːla bí tayéːtoːpé ngeːsaːto, odokké bí aipai bigeːla pitangkídíːdém pentuto. Odo bí luyírsunékídíːdém édémbulum bito odokké luyírsunékídíːdé taniːkídíːdém orbito. 20 Bulu appíngé dola dotísukang, odokké luyírsunékídíːdé gempém yí:laːnyíko biːdopé dongadém tíkumsutoku. 21 Édé doné taniːkídíːdém sabnamé, néːngémna koːkangém saptémaːpé, líːyíng angngo kíramkopé idagai.
Jisubí Asi Tayéːlo Lambégínam
(Mark 6.45-52; Jon 6.15-21)
22 Odo Jisubí luyírsunékídíːdém olluːdo saːla paːtaːdok kekonpé gínomoto, odokké bí taniːkídíːdém mélígamtoku. 23 Bí taniːkídíːdém mélíkkunam lédupé, adiːtayéngkoloːpé kumkolo atéroːdé gísangkang. Édílo yummayírkan, bí odo atéroːdé dungngai, 24 émpige:la olluːdé ragodokké abako moːtéːpé kolenkangaboi, odo ésaré olluːdok kekonpé sarnamé, olluːdém siyadé kuyikusaːto.
25 Roːrokompé Jisubí asi tayéːdok lambégíla, bulukkodoːpé gído. 26 Édílo bulu bím asi tayéːdo lambégídopé ka:ton, bulu yallo gíla pésokang. Bulu pésola kabla jeːla luto, "Sidé uiːko."
27 Émpigeːla Jisubí oddar bulum lutoː "Asiné kínggítokǃ Pésoyok. Sidé ngoːmín."
28 Pitorbí lulatsutoku, "Ruːtuma, édé no:mílo, ngom asi tayéːdok nokkodoːpé gídoːpé lulíktei."
29 Bí luto, "Gíto." Édémpila Pitorbí olluːdokké gíila asi tayéːdok lambégíla Jisukodoːpé gído. 30 Émpigeːla édílo bí ésardém kaːton, odo bí pésokang, odokké asi kéígboːpé jíngarobomkang. Odokké bí kabla luto, "Ruːtuma, ngom bugapteiǃ"
31 Jisubí lomdanna bík alakki maːríksula bím sogapto odokké bí luto, "No ajjioːko méːjíksunna, kapila no méːmoton?"
32 Odokké édílo bínyi olluːdo sangatokun, ésardé sarngasukang. 33 Odo séːkobulu olluːdo dungngan bulu bím sémpé lula kumto, "Aroruːpé no Ruːnék Aoːdé."
Gennesaretdo Jisubí Kinném Ésaːmotoku
(Mark 6.53-56)
34 Bulu kongkoːla Genesaretpé kongato. 35 Odokké édílo odok taniːkídíːdé Jisumé kangkinton, bulu kérangké doːlungkídíːdoːpé lutadém lulíkto. Taniːkídíːdé buluk kiné-ramné appíːdém bíkkodoːpé gíbodo. 36 Odokké kinékídíːdé bík gasor tuːyidém gakkídopé bulu kumna luto, odokké séːkobulu bím gakkítoji bulum ésaːmotoku.