Toku-taːtokídíːdok Luyírnam
(Mark 7.1-13)
15
Odo Parosi ékkéla luro luyírné ékké Jerusalemdokké Jisukodoːpé gíla bím tauto, 2 "Kapila nokkol luyírsunékídíːdé toku-taːtobuluk ibomnam ilod-gílotkídíːdém ibomman? Bulu do:ama:dapé lasuksumaǃ"3 Jisubí lulatsutoku, "Odokké kapila nolu noluk ilod-gíloddok légaːpé Ruːnék lulígnamdém iman? 4 Kapéné Ruːnébí lutag, 'Noluk ané abbom ménggésulang' odokké 'Séːkoi bík ané abbom pelígyéji, bí sipéruːnammé.'a 5 Émpigeːla nolu ludo taniːkoné bík ané abbom sémpé lumílo, 'Nolu ngok kaːdumsunam oko okkom paːpénamman édé appíːdém Ruːnékoloːpé amanpé tosaglíktag,' 6 bí 'bík abudém odokki ménggésupé' lagimang. Édémpé noluk ilod-gílotkídíːdok légaːpé, nolu Ruːnék agomém ménggésumang. 7 Nolu séumonékídíngaǃ Jisoya:bí arodaggai édílo bí noluk tayéːlo lungorém lukanː
8 'Séː taniːkídíːsé buluk nappangki ngom ménggésudag,
émpigeːla buluk asinkídíːdé ngokkosokké moːtéːpé dung.b
9 Bulu arrékamapé ngom kumdag;
bulu taniːlok luyírém ngok luro kísapé luyírdag.' "
Taniːyém Naréːmoman Attar
(Mark 7.14-23)
10 Odo Jisubí tani kéréːdém bíkkodoːpé gogge:la luto, "Ngok agomé tadgeːla tatkinnangǃ 11 Taniːkolok nappaːloːpé okko gía:doji édé bím naréːmaːnép imomang, émpigeːla okko bík nappaːdokké gílendoji, édépag bím naréːmaːnép imodag."
12 Odo luyírsunékídíːdé bíkkodoːpé gígeːla bím tauto, "No kindon Parosikídíːdé édílo édém tatton bulu tadaksukang?"
13 Bí lulatsutoku, "Ísíng amíng appíːdém okodém ngok tayéng Abubí lemaːji bulum léppírdokké busayé.c 14 Bulum mépakto, bulu miglun mirro. Miglun taniːkoné miglun taniːkoném gígébomílo, annyidéi koru:lo okesuyé."
15 Pitorbí luto," Luyisubinamdém ngolum lusarkítei."
16 Jisubí bulum tauto, "Suːpésinei nolu tatkinman? 17 Nolu kaːmaːnei okkoi nappaːdo gía:doji édé akiboːpé gídag odokké amírdokké gílendakku? 18 Émpigeːla okkoi nappaːdokké gílendoji édébulu asinbokké gílendag, odokké édébulu tani:yém naréːmaːnép imodag.' 19 Kapéné asindokké aiman méːnamé, mokenammé, benggonam, laːmínsunam, dopsonam, aromaːném lubikunam, aimap lunamé gílendag. 20 Édébulu taniːkoném naréːmaːnép imodag; émpigeːla lasuksuma:pé donamdé bím naréːmaːnép imomang.' "
Mimékolok Méːjíksunam
(Mark 7.24-30)
21 Odokké gípagla, Jisubí Tayardoːpéla Sidon moːtakpé gíkang. 22 Kéraːdokké Konan miméko bíkkodoːpé gíla bí bím kabla luto, "Ruːtuma, Debitké Aoːa, ngok tayéːlo ayaːteiǃ Ngok omédém uiːyé paːla léːnamé bí airuːpé kiladung."
23 Jisubí agom apirkosin lulatsutoma. Édémpila bíkkol luyírsunékídíːdé bíkkodoːpé gígeːla luto, "Bím mélíktoku, kapéné bí ngoluk lédulo gímmína kabla dung."
24 Bí lulatsuto, "Ngom Israelsok yogla duːné meːrkídíngoːdok légaːpé mélíktag."
25 Odo mimédé gíla bík alédo lébíːtumna luto,"Ruːtuma, ngom kaːdumsuteiǃ"
26 Bí lulatsuto, "Ommaːlok donamém laːpaggeːla ikiyém érrígbinamdé ainémang."
27 Bí luto, "Ruːtuma, édé arro, émpigeːla ikiyé buluk ruːtumdok tebuldokké oledné dojerém dodag."
28 Odo Jisubí lulatsuto, "Ané, nok méːjígdé kínggíruːdagǃ Nok konamdém bitagbo." Odokké bík omédé édé ayírradokké ésangkangku.
Jisubí Bojéko Taniːyém Ésaːmokunam
29 Jisubí édém mépagla gíla Galili Paːtang ragodok gíto. Odokké bí adiːkoloːpé gísanggeːla odo tetkang. 30 Bottén kéréngkopé taniyé bíkkodoːpé gído, odokké bulu lébeném, migluném, lambégílamaːném, gommaném gíbodo, bulum bík alédo kédmoto; odokké bí bulum ésaːmotoku. 31 Taniːkídíːdé kaːla kangaksuto édílo gommané agom ludungku, lambégílamaːném ésaːmoto, lébené lambégídungku odokké migluné kaːpaːdungku. Odo bulu Israelké Ruːnémé luyitsuto.
Jisubí Lí:yíng Appiko Taniːyém Dobonam
(Mark 8ː1-10)
32 Jisubí bíkkol luyírsunékídíːdém bíkkodoːpé goggeːla luto, "Séː taniːkídíːsém ngo ayaːpé-méːdag; bulu ngok lédílo loumko duːmínna dung odokké suːpag dopénam okkosin kamang. Bulum ngo kéno:pé mélíglíngkuma, séːko kindang bulu lambédo kéttablaːdo."
33 Bíkkol luyírsunékídíːdé luto, "Síddíko taniːyém dobonam légaːpé píːnamkopé donamém ngolu okolok séː sullipotaːso paːyén?"
34 Jisubí tauto, "Nolukké éddíko pitangé dun?"
Bulu lulatsutoku, "Kínítko, odokké pirmené ongngo pirnyi-pirumko."
35 Bí taniːkídíːdém amo:do teddopé lulíkto. 36 Odo bí pitang kíníddémna ongokídíːdém laːto, odokké bí aipai bige:la édémbulum pentuːto odokké luyírsunékídíːdém bito, odokké bulu taniːkídíːdém orbito. 37 Bulu appíngé dola dotísukang. Odok lédupé luyírsunékídíːdé gempa kínítko biːdopé mépagnam dongadém tíkumsutoku. 38 Séːkobulu dotoji sabnamé lí:yíng appiko idagai, néːng-ommangkídíːdém saptémaːpé.
39 Jisubí gíkumsunékídíːdém mélíkkunam lédupé, bí olluːdo sangaːla Magadanké kéraːpé gíkang.