MAT 16

Kanggotko Manam

Parosiélang Soddukiyé Jisukodoːpé gído, odokké bulu bím ankaːpé méːla bíkkolok tayéng-amoːtok kanggotko léngkandopé luto. 2 Émpigeːla Jisubí lulatsutoku, "Édílo doːnyé oːadoji, nolu ludo, 'doːréyépé, kapéné doːmírté líːrédag.' 3 Odokké roːrokomdo nolu ludo, 'Silo podongé oyé, kapéné doːmírté líːrégeːla kémodag.' Nolu doːmírtém kanggeːla lukinbilaːdag, émpigeːla nolu ayírkídíːdok kanggoddém lukinbilaːman. 4 Aimaːnéla benggon opeyépag méːpíla:manam kanggotko mado, émgom Jonaːké kanggoddok ruːyipé okkomsin léngkanmaːyé."

Édémpila bí bulum mépagla gípakkang.

Parosikídíːdogla Soddukikídíːdok Kaːrdé

(Mark 8.14-21)

5 Édílo bulu pa:taːdém kongkotoji, luyírsunékídíːdé pita bompénamdém mitpansuːto. 6 Jisubí bulum luto, "Ansulang, Parosikídíːdogla Soddukikídíːdok kaːrdok kekonpé noluk ígíngém yeːréksulang."

7 Bulu édém buluk araːdo luposugeːla luto, "Kapilaːné ngolu pitang aborkosin bommaːla bí sém ludung."

8 Buluk luposunamdém angeːla Jisubí bulum luto, "Nolu méːjíksumaːnékídínga, kapila nolu pitang aborkosin kamaːnamdok tayéːlo luposudun? 9 Nolu suːpésinei kinmaːdan? Lí:yíng angngodok légangé pitaː borngodém, odokké éddíko gempém biːdopé nolu tíkumsukakun édém méːpamaːnei? 10 Émmamílo Lí:yíng appidok légangé pitaː kíníddém, odokké éddíko gempém biːdopé nolu tíkumsukakun? 11 Ngo noluk lédílo pitang doːyingém kímangai émna kapé nolu édém kintoman? Émpigeːla Parosikídíːdogla Soddukikídíːdok kaːr kekonpé ígíngém nolu yeːréksulang."

12 Odo bulu bí bulum pitaːlok lígnam kaːr kekonpé ígíng yeːrésutoka émna lumangai émnamdém tatkinto, émpigeːla Parosikídíːdogla Soddukikídíːdok luyírnamkídíːdok kekonpé yeːréksulang émnamdém tatkinto.

Jisumé Pitorké Ludesunam

(Mark 8.27-30; Luk 9.18-21)

13 Édílo Jisubí Kaiseria Pilipi moːtakpé gíton, bí bíkkol luyírsunékídíːdém tauto, "Taniːkídíːdé Taniːké Aoːmé séːkobí émna ludang?"

14 Bulu lulatsutoku, "Akke Jon Baptisbí émdag, akoné Elijaːbí émdag; odokké suːpaksin akke Jirimiabí mamílo lungor-lunékídíːdok aːko émdag."

15 Bí luto, "Émpigeːla noluka? Nolu ngom séːkobí émdon?"

16 Simon Pitorbí lulatsuto, "No Kiristobí, turné Ruːnék Aoːdé."

17 Jisubí lulatsutoku, "Jonaːké ao Simona, no ayang-paːnéko, kapéné nom taniːkokki édém lumomang, émpigeːla tayéng-amoːtok duːné ngok Abukokki lumotag. 18 Odokké ngo nom lubidung, no Pitorbí, odokké séː torné-ílíng tayéːso ngo ngok kumgom moyé, odokké sinamnok tornamé édém motumnaːmaːyé. 19 Ngo nom tayéng-among migomdokodok edgenanném biyé; no oko okkom sé: mo:píso etkabyéji édém tayéng-amoːto:sin etkabbiyé, odokké no oko okkom séː mo:píso edgeyéji édém tayéng-amoːto:sin edgebiyé."^a

20 Odo bí Kiristobí émnamdém séːkomsin lubimaːdoːpé, bí bíkkol luyírsunékídíːdém torgampé lutumto.

Jisubí bík Sinamdém Lunobinam

(Mark 8.31-9.1; Luk 9.22-27)

21 Édé ayírdokké Jisubí luyírsunékídíːdém lusarbiropto bí Jerusalempé gíparuːyé odokké midum, abín miríkídíːdogla luro luyírnékídíːdok alaglo bojéko ngasodém paːyé, odokké bím mokeruːyé odokké loumné longédo bím turmoyéku.

22 Pitorbí bím gíyodbogeːla bím geːbomkang. "Ruːnébí édémpé imoyokǃ Édílo:sin édémpé nokkolo ipélagimang."

23 Jisubí ngelatsugeːla Pitormé luto, "Uiːya, no ngokkosokké géːrkangǃ No ngok lambé motumnéko; no Ruːnék agomém méːmang, émpigeːla taniːlok agommongém méːdag."

24 Odo Jisubí bíkkol luyírsunékídíːdém luto, "Séːkoi ngok lédulo gímínyeji, bí aíém topaksupoːpaːyé odokké bík kurusdém joːla ngok lédulo gímínpaːyé. 25 Kapéné séːkoi bík turnamdém turra du:mopé méːyéji édé yogyé, émpigeːla séːko ngok légaːpé bík turnamdém yogmoyéji bí édém paːyéku. 26 Taniːkoné moːpísok appíngém paːdaggom, bík aíké iji-yalodém yogmomílo, édé bíkképé oko ainamén? Émmamílo taniːkoné bík iji-yalodém paːlatkunam légaːpé okkom bilaːdang? 27 Kapéné Taniːké Aoːbí bík Abuké unjíglo bík tayéng-yaːmekídíːdok lédílo gíyéku, odokké odo aíké aíké gernam tayéːlo bí amaném biyé. 28 Ngo nolum arodém lubidung, sidok dagla duːné akke sipomaːyé édíloːpé Taniːké Aoːké migompé gíkunamdém bulu kaːmaːyéji.