Dumsíg-Migmo Angunam
(Mark 9.2-13; Luk 9.28-36)
17
Longkéng longé lédupé Jisubí bík lédílo Pitormé, Jemsmé odokké bík bíro Jonmé gíbola oudné adiːkoloːpé gísangkang. 2 Odo buluk kanggaːpé bík dumsíg-migmodé angukang. Bík migmodé doːnyítémpé unkang, odokké bík bédugasordé kampotitikang. 3 Odo Musiːbíːla Elijaːbí Jisuk lédílo agom luposula duːdopé luyírsunékídíːdé kaːto. 4 Édémpila Pitorbí Jisumé luto, "Ruːtuma, ngolukképé sok duːnamdé aiyé. No méːduːmílo, ngo poːyub soumko mopé-asongko nokképé, songkondé Musiːképé odokké aːko Elijaːképé."5 Édílo bí lula dungngan, kamponé mukkangko bulum yíːlupto, odokké mukkaːdokké gomukko sémpé lulenkang, "Séː ngok Aoːo, séːkom ngo aipé-méːdag, ngo bím airuːpé méːyumsudo. Bík agomém tadlangǃ"
6 Édílo luyírsunékídíːdé édém tatton, bulu pésola, amoːboːpé pogbumkang. 7 Émpigeːla Jisubí gígeːla bulum pigapto. Odokké bí luto, "Pésoyok, daropto." 8 Édílo bulu ngeːsaːla kaːton, bulu Jisum atéroːdém odo du:dopé kaːto.
9 Bulu adiːtayédokké gíilangkula du:dodo, Jisubí bulum luto, "Édíloːpé Taniːké Aoːmé sikolokké turmokumaːyéji odoloːpé, nolu okkom kaːtoji édém séːkomsin lubiyok."
10 Luyírsunékídíːdé bím tauto, "Émpém Elijaːbí gípoːpaːyéku émna kapila luro luyírnékídíːdé ludang?"
11 Jisubí lulatsutoku, "Elijaːbí aroruːpé, gípoyé odokké appíngém mosíngamyéku. 12 Émpigeːla ngo nolum lubidung, Elijaːbí gípíːladuːbo, émpigeːla bulu bím kangkintomang, odokké buluk méːnam appíːdéméi bím ito. Édémarpé buluk alaglo Taniːké Aoːbíːsin ngasodém dopoːyé."
13 Odo luyírsunékídíːdé tatkinto bí Jon baptiské tayéːlo agomém ludung émna.
Uiːpaːnam Koːko Jisubí Ésaːmotoku
( Mark 9.14-29; Luk 9.37-43)
14 Édílo bulu taniːkérédoːpé gílattokun, odo taniːko Jisukodoːpé gíla bík kanggaːpé lébíːtumangkang. 15 Odokké bí luto, "Ruːtuma, ngok aoːsém ayaːtei. Bíkké agrugiyangé kanamé bí airuːpé kiladung. Bí umíloːmanggom asilo oːatídag." 16 Ngo bím nokkol luyírsunékídíːdoːpé gíboka, émpigeːla bulu bím ésaːmolaːtokumang."
17 Jisubí lulatsutoku, "Nolu méːjígmaːnélang gíyodné opeya, ngo noluk lédílo éddíko duːmínyén? Ngo noluk lédílo éddíko méːyinsula duːyén? Koːdém ngokkosoːpé gíaːbotoǃ" 18 Jisubí uiːdém morítto, odo uiːdé koːdokké gílenkangku, odokké édé ayírdokké koːdé ésangkangku.
19 Odo luyírsunékídíːdé ami kinmangoːpé Jisukodoːpé gíla bím tauto,"Ngolu kapila uiːdém ménpagla:toman?"
20 Bí lulatsutoku, "Kapilaːné noluk méːjíksunamdé píːramdag. Ngo nolum arodém lubidung, nolukké ajjiné pétukíddíko méːjíksunamé kamílo, nolu séː adi:sém, 'Sokké oloːpé gíérkang, émna lumílo, odo adiːdé odokké gíéryé. Nolukké ilaːmaːnam okkosin kamaːyé."
Jisubí Lékoda Bík Sinamdém Lunobinam
( Mark 9.30-32; Luk 9.43-45)
22 Édílo bulu Galiliːdo lékkopé gíkumsuton, bí bulum luto, "Taniːké Aoːmé taniːkídíːdok alaglo yadla-kopagyé. 23 Bulu bím mokeyé, odokké loumné longédo bím turmoyéku."
Odo luyírsunékídíːdé airuːpé méːdírkang.
Kumli:lo Urnam-Murkongém Binam
24 Jisubí:la luyírsunékídíːdé Kaparnaumpé gípíːnam lédupé, kumli:lok murkong urnékídíːdé Pitorkodoːpé gígeːla tauto, "Noluk luyírnébí kumliːlok urnam-murkongém bima:nei?"
25 Bí lulatsuto, "Bí bidag."
Édílo Pitorbí okum araːdoːpé gíaːton, Jisubí lupo:to, "Simona, no okko émna méːdang?" Bí tauto. "Séː mo:písok migomkídíːdé séːkkolok urnam-murkongém urdang- buluk aíké ommaːlog urdagyé amikolog urdang?"
26 Pitorbí lulatsuto, "Amikolok."